„Nek avel to Kraljevstvo“

O Jehova obećinđa: „Više na ka ovel rojbe, dukha, nabormipa, ni meribe. Ka kosav svako asvi kotar tumare jaćha. Ka bistren sa o lošna buća kola hine angleder.“

O Jehova ćhivđa e Adame hem e Eva ko edensko vrt te živinen ko mir hem te oven bahtale. On valjanđe te služinen pe nebesko Dadese hem te pheren i phuv pe ćhavencar. O Adam hem i Eva na šunđe e Devle, ama olesi namera na meninđa pe. Ki akija knjiga dikhljam so sa e Jehovase lafija uvek ispuninena pe. Sar so o Jehova obećinđa e Avrahamese, prekalo oleso Kraljevstvo celo phuv ka ovel blagoslovimi.

Pana hari, o Beng, olese demonija hem sa o lošna manuša više na ka oven. Tegani sare ka slavinen e Jehova hem samo olese ka služinen. Na ka ova naborme hem na ka mera. Svako dive ka ovel amen volja te ušta hem ka ova bahtale so hijam đivde. Celo phuv ka ovel raj. Sare ka ovel len so te han hem kaj te živinen. O manuša ka oven šukar jekh jekheja hem na ka oven nasilna. Na ka dara ando divlja životinje.

But ka ova bahtale ked o Jehova ka počmini te uskrsnini e manušen. Jedva ađićeraja te dikha e manušen ando purano vreme sar soj tane o Avelj, o Noje, o Avraham, i Sara, o Mojsije, i Ruta, i Jestira hem o David. On ka pomožinen amen te ćera i phuv te ovel raj. Uvek ka ćera o buća kola ka anen amenđe bahtalipe.

O Jehova mangela tu te ove odothe. Akana našti ni te zamisline so tegani ka sikljove ando Jehova. Odolese, svako dive ćer sa so šaj te ove paše e Jehovaja hem akana hem zauvek!