„Kaj hine o Devel?“

KED OVENA O LOŠNA BUČA, DA LJI PUČEJATU: „KAJ HINE TEGANI O DEVEL?“ JA KED HINETU PHARIPA KO TO DŽIVDIPE ŠAJ PUČLJANTU: „DA LJI O DEVEL AKHARI GAJLJA MANDAR?“

Šaj tano tuče sar e Šilače, koja živini ki Amerika. Oj hine bajačerdi ki familjija koja verujia but ko Devel. Oj phenela: „Kotar tiknipe verujium so isi Devel sose Ov čerdžamen. Ama, niked na hijumlje paše oljeja. Mislijum so dikhelama, ama samo dural. Na mislijum so o Devel mrzinima, ama ni na verujium so akhari gajlja mandar.“ Sose i Šila adžahar mislija? Oj phenela: „Ki mi familjija o lošna buča alje jekh palo jekh hem odoljese dičhilo amendže so o Devel hič na pomožinimen.“

Šaj hem tu verujineja so isi Svemoćno Devel, sar i Šila. Ama palje pučejatu da lji ov čače akhari gajlja tutar. O pravedno manuš o Jov, kova verujia upro moćno hem mudro Devel, isto adžahar mislija (Jov 2:3; 9:4). Palo odova so o Jov nakhlja but lošna buča, kola alje jekh palo jekh hem koljengo krajo samči na dičhilo, ov pučlja e Devlje: „Sose irineja toklo muj hem sose dikhejama sar dušmane?“ (Jov 13:24).

So phenela i Biblija odoljestar? Da lji valjani e Devlje te krivina ked ovena o lošna buča? Da lji isi disavo dokaz so o Devel akhari gajlja kotar sa o manuša hem svakonestar amendar? Da lji šaj svako amendar čače te džanel, da lji o Devel dikhela amen, haljola amen, džanela sar tano amendže ja pomožini amen ked isimen problemija?

Ko avera teme ka dikha, sar o buča kola o Devel čerdža sikavena amen so ov akhari gajlja amendar (Rimskonendže 1:20). Isto adžahar ka dikha, so i Biblija vačeri amendže odoljestar. So pobuter ka pendžare e Devlje prekalo odova so ov čerdža hem prekalo oljeso Lafi, pana pobuter ka ove sigurno so ov akhari gajlja tutar (1. Jovaneso 2:3; 1. Petareso 5:7).