Da li džandžan?

So čerdža jekh nastojnik ko purano vreme?

KO PURANO vreme, o nastojnik hine lje zadatko te nadgledini sa o buča kola čerena pe ko oljese gospodareso čher. Ki hebrejsko hem ki grčko čhib o lafi kova tano prevodimo sar „nastojnik“ disavo puti odnosini pe ko nadglednik ja e čhereso upravitelj.

Ked o Josif, e Jakoveso čhavo, hine rob ko Egipat, ov ulo nastojnik ko peklje gospodareso čher. Oljeso gospodar „sa so hine lje dindža ljese ko vasta“ (Post. 39:2-6). Palo odova, kokri o Josif ked ulo moćno vladari ko Egipat, hine lje jekh nastojniko kova brinindža pe ando oljeso čher (Post. 44:4).

Ko e Isusese dive, but manuša kola hine ljen piklji phuv živindže ko dizja, dur kotar peklje imanja. Odoljese, on čhivdže e nastojnikonen te nadgledinen sa o buča kola o radnikija čerena odothe svako dive.

Ko šaj hine te ovel nastojnik? O rimsko pisco, kova živindža ko prvo veko, o Kolumela phendža so o robo valjani te ovel neko „ko džanela šukar te čerel i buti“. Ov valjani te brinini pe „i buti te ovel čerdi, ama na te ovel grubo e radnikonencar“. Isto adžahar, phendža so o šukar nastojnik na mislini so sa džanela hem spremno tano te sikljol neve buča.

Ko e Devljeso Lafi koristini pe o primer ando nastojniko te šaj te mothovi koja sličnost isi maškar oljesi buti hem maškaro disave buča kola čerena pe ki skupština. Na primer, o apostol Petar ohrabrindža e phraljen hem e phenjen te „služinen jekh jekhese... sar šukar nastojnikija ando e Devljeso bizaslužimo šukaripe“ (1. Petr. 4:10).

O Isus koristindža o primer ando nastojnik ked vačerdža i priča koja šaj te arakha ko Luka 16:1-8. Ked vačerdža o proročanstvo ando odova so ka ovel znako andi oljesi prisutnost, o Isus phendža peklje učenikonendže so ov ka čhivel e „verno hem e razborito robo“ ja e „verno nastojniko“. Odolje nastojnikosi najvažno buti ka ovel te del i duhovno hrana e Hristese sledbenikonendže ko poslednja dive (Mat. 24:45-47; Luka 12:42). But hijam zahvalna so o verno nastojnik ko celo sveto dela amen o publikacije kola zorjačerena amari vera.