Duj neve članija ko Vodeće telo

KO 5. OKTOBAR ko 2024. berš hine phendo jekh posebno obaveštenje ko godišnjo sastanko: O phral Džodi Džejdli hem Džejkob Ramf hine naimenujime te služinen ko Vodeće telo ando Jehovase svedokija. Akala duj phralja već beršencar verno služinena e Jehovase.

O phral Džejdli bijandilo ki država Misuri, ki Amerika hem barilo ko ćaćipe. Olesi porodica živinđa ko than kaj hine samo nekobor Svedokija. Ov upoznajinđa bute phralen hem phenjen kotar razna thana kola alje othe te propovedinen. Upro leste but utičinđa olengo mangipe hem jekhipe. Krstinđa pe ked hine tinejdžer ko 15. oktobar ko 1983. berš. Ov but manglja i služba hem pali srednjo škola ko septembar ko 1989. berš, počminđa te služini sar pioniri.

Ked hine terno, olese roditeljija legarđe ole hem olese phenja te posetinen o Betel. Odija poseta podstakninđa len te ćhiven pese cilj te služinen ko Betel hem o solduj ispuninđe odova cilj. Ov đelo ko Betel, ko Volkil ko septembar ko 1990. berš. Prvo ćerđa ko Odeljenje aso čistibe hem kasnije ko Odeljenje asi zdravstveno nega.

Tegani, o skupštine ki špansko ćhib but napredujinđe hem valjanđe lenđe phralja. Odolese, ov počminđa te služini odothe hem te sikljol španski. Hari palo odova, upoznajinđa e phenja Damaris, koja služinđa sar pionirka ki odija pokrajina. Ko krajo, on lelje pe hem oj alji te služini zajedno oleja ko Betel.

Ko 2005. berš, on ikljilje ando Betel te šaj te brininen pe ando pe roditeljija. Ko odova vreme služinđe sar stalna pionirija. O phral Džejdli služinđa hem nekobor putija sar instruktor ki Škola aso pionirija. Isto ađahar, služinđa hem ko Odbor aso odnosija e bolnicencar hem ko Regionalno odbor asi gradnja.

Ko 2013. berš, o phral hem i phen Džejdli hine vićime palem te služinen ko Betel hem te pomožinen te gradinen pe o objektija ko Vorvik. Palo odova, služinđe ko Paterson hem ko Volkil. O phral Džejdli služinđa ko Odeljenje aso projektovanje hem gradnja hem ki Služba asi saradnja e bolnicencar. Ko mart 2023. berš, počminđa te služini sar pomoćniko ko Službeno odbor. Ked razmislini ando pe zaduženja, ov phenela: „Ked dobinaja neve zaduženja, podijekh puti daraja. Ama, baš tegani valjani te oslonina amen upro Jehova sose ov pomožini amen te ćera odova so rodela amendar.“

O phral Ramf bijandilo ki Kalifornija, ki Amerika. Đi hine tikno, olesi daj hine neaktivno, ama trudinđa pe te sikavi le o ćaćipe. Isto ađahar, svako berš đelo te posetini pe baba koja verno služinđa e Jehovase. Oj pomožinđa le te ovel le želja te đanel pana pobuter andi Biblija. Odolese, ked hine le 13 berš kokri rodinđa te proučini. Ko 27. septembar ko 1992. berš, ked hine tinejdžer, ov krstinđa pe. Olesi daj palem ulji aktivno, a oleso dad hem olese phralja hem phenja krstinđe pe.

Ked hine terno, o phral Ramf dikhlja kobor tane o pionirija bahtale. Odolese, palo odova so završinđa i srednjo škola, ko septembar ko 1995. berš ulo pioniri. Ko 2000. berš, preselinđa pe ko Ekvador te služini odothe kaj tani pobari potreba. Odothe upoznajinđa e Inga, jekha pionirka kotar Kanada, hem ko krajo lelje pe. Palo odova so lelje, pe on služinđe ki jekh diz ko Ekvador kuri hine hari objaviteljija. A avdije uduri isi jekh revno skupština.

Sar đelo o vreme, i phen hem o phral Ramf hine namenujime te služinen sar specijalna pionirija, a kasnije služinđe ki pokrajinsko služba. Ko 2011. berš, hine vićime te đan ko 132. razred ki škola Galad. Pali škola služinđe ko panđ različita phuvja hem uživinđe đi služinđe ko Betel, ki misionarsko hem ki pokrajinsko služba. Isto ađahar, o phral o Ramf hine instruktor ki Škola aso objaviteljija ando Kraljevstvo.

Sebepi i pandemija andi koronavirus, on irinđe pe ki Amerika. Hine vićime te đan ko Betel ko Volkil hem o phral Ramf dobinđa obuka ko Službeno odeljenje. Palo odova, palem hine bićhalde te služinen ki podružnica ko Ekvador hem odothe o phral služinđa ko Odbor andi podružnica. Ama, ko 2023. berš hine vićime ko Vorvik. Ko januar ko 2024. berš, ov hine naimenujimo te služini sar pomoćniko ko Službeno odeljenje. Ked razmislini ando odova kaj sa služinđa, ov phenela: „Nane važno o than kaj služineja, već o manuša kolencar sarađujineja.“

Amen but ceninaja odova so ćerena akala duj phralja hem ćaće poštujinaja asavke phralen (Fil. 2:29).