O Devel ćerđa o nebo hem i phuv

O Jehova tano amaro Stvoritelj. Ov ćerđa sa, hem o buća kola šaj te dikha hem o buća kola našti te dikha. Angleder so ćerđa o buća kola šaj te dikha, ov ćerđa but, but anđelija. Da li đaneja koj tane o anđelija? On služinena e Jehovase hem slična tane sar oleste. Amen našti te dikha len, isto sar so našti te dikha e Jehova. O prvo anđeo kas o Jehova ćerđa ulo oleso pomoćniko. Akava anđeo pomožinđa e Jehovase ked ćerđa o ćerenja, o planete hem sa avera buća. Jekh ando odola planete tani i Phuv, jekh but šužo than kaj živinaja.

Palo odova, o Jehova spreminđa i phuv te šaj koro late te živinen o manuša hem o životinje. Ov ćerđa o Kham te del svetlost e phuvjaće. Isto ađahar, ćerđa o planine, o okeanija hem o reke.

So ulo palo odova? O Jehova phenđa: „Ka ćerav i ćar, o kašta hem avera biljke.“ Tegani, andi phuv počminđa te barjol razno voće, povrće hem luluđa. Palo odova, o Jehova ćerđa razna životinje, sar soj tane o životinje so letinena, so plivinena, so prastana hem so ripinena ki phuv. Disave tane tikne, sar soj tane o šošoja, a disave tane bare, sar soj tane o slonija. Koja životinja tu najviše mangeja?

Palo odova, o Jehova phenđa e prvone anđelese: „Hajde te ćera e manuše.“ O manuša valjanđe te razlikujinen pe ando životinje. Ov manglja on te ćeren razna buća, te vaćeren, te asan hem te molinen pe. Isto ađahar, ov manglja on te brininen pe andi phuv hem ando životinje. Đaneja li ko hine o prvo manuš? Hajde te dikha.