Ko hine o Jov?

Ki phuv Uz, živinđa jekh manuš kova služinđa e Jehovase. Oleso anav hine Jov. Ov hine but barvalo hem hine le bari porodica. Hine but šukar manuš, pomožinđa e ćororenđe, e udovicenđe hem e ćhavenđe kola hine bizo roditeljija. O Jov ćerđa šukar buća. Ama, da li odova značini so na hine le nisavo problemi ko životi?

O Jov na đanđa so o Satana dikhela le. O Jehova phenđa e Satanase: „Dikhljan li me sluga e Jove? Nane nijekh sar oleste ki phuv. Ov šunela man hem ćerela šukar buća.“ O Satana phenđa lese: „Normalno so ka šunel tut. Tu zaštitineja le hem nagradineja le. Dinđan le phuv hem životinje. Le olestar sa, pa ka dikhe da li ka služini tuće.“ O Jehova phenđa: „Šaj te iskušine le. Ama, na ismineja te mudare le.“ Sose o Jehova mukhlja o Satana te iskušini e Jove? Odolese so hine sigurno so o Jov ka aćhol lese verno.

O Satana ćerđa e Jovese nekobor phare nevolje. Prvo, bićhalđa e manušen kola vićinđe pe Savejcija te ćoren e Jovese guruven hem e heren. Palo odova, pojavinđa pe jag ando nebo hem thabilje sa e Jovese bakre. A avera manuša, kola vićinđe pe Haldejcija, ćorđe olese kamilen. O sluge so arakhlje akale životinjen hine mudarde. Palo odova, alji i najbari nevolja. Sa e Jovese ćhave mulje ked upro lende pelo o ćher kuri ćedinđe pe. E Jovese hine but pharo, ama na ćhinavđa te služini e Jehovase.

O Satana manglja o Jov te patini pana pobuter. Odolese ćerđa te oven le čirija ko celo telo. O Jov hine le but bare dukha hem na đanđa sose ovena lese sa akala lošna buća. Ama, hem ponodri služinđa e Jehovase. O Jehova dikhlja sa so ulo e Jovese hem hine but radosno so aćhilo lese verno.

Palo disavo vreme, o Satana bićhalđa trine manušen kola phenđe lese: „Sigurno ćerđan disavo greh, ama garaveja. Odolese, o Devel kazninđa tut.“ O Jov phenđa: „Na ćerđum ništa lošno.“ Ama, tegani počminđa te mislini soj tane o nevolje ando Jehova hem phenđa so o Jehova nane pravedno premalo leste.

Jekh terno manuš kova vićinđa pe Elijuj šunđa so vaćerena. Ko krajo, ov phenđa: „Odova so vaćerena nane tačno. O Jehova tano but pobaro ando odova so amen mislinaja. Ov niked na ćerela diso lošno. Dikhela sa hem pomožini e manušenđe ked isi len problemija.“

Tegani o Jehova počminđa te vaćeri e Joveja hem phenđa lese: „Kaj hijan le ked ćerđum o nebo hem i phuv? Sose vaćereja so na hijum pravedno? But vaćerđan, ama na đaneja sose ovela sa akava.“ O Jov priznajinđa so grešinđa hem phenđa e Jehovase: „Grešinđum. Me samo šunđum tutar, ama akana ćaće penđarava tut. Tu šaj sa te ćere. Kajinava man aso sa so vaćerđum.“

Ked sa odova završinđa pe, o Jehova saćarđa e Jove hem dinđa le pobuter nego so hine le angleder. O Jov živinđa pana but berša hem hine bahtalo. O Jehova nagradinđa e Jove so hine lese poslušno, čak ked odova na hine lokho. Da li hem tu ka ove poslušno sar o Jov? Ka aćhove li verno e Jehovase bilo so te ovel?