O David hem o Golijat

O Jehova phenđa e Samuilese: „Đa ko Jesejeso ćher. Jekh ando olese ćhave ka ovel aver kralj ko Izrael.“ Tegani o Samuilo đelo ko Jesej. Ked dikhlja olese najphuredere ćhave, mislinđa: „O Jehova sigurno akale birinđa.“ Ama, o Jehova phenđa e Samuilese so na birinđa ole. Ov objasninđa lese: „Me dikhava savo tano e manušeso vilo, a na sar izgledini.“

Anglo Samuilo ikljilje pana šov e Jesejese ćhave. Ama, o Samuilo phenđa lese: „O Jehova na birinđa nijekhe olendar. Isi tut li pana ćhave?“ O Jesej phenđa lese: „Isi man pana jekh, ov tano najtikno. Vićini pe David hem arakhi e bakren.“ Ked o David alo, o Jehova phenđa e Samuilese: „Ole birinđum!“ O Samuilo ćhorđa ulje upro oleso šero hem ađahar pomazinđa le te ovel aver kralj ko Izrael.

Palo disavo vreme, hine maribe maškaro Izraelcija hem o Filistejcija. Ki olengi strana hine jekh but baro vojniko, kova vićinđa pe Golijat. Ov svako dive marđa muj e Izraelcenđe hem vaćerđa: „Hajde, nek avel neko te borini pe mancar. Ako ov pobedini, amen ka ova tumare robija. Ama, ako me pobedinava, tegani tumen ka oven amare robija.“

Jekh dive, o David alo ko than kaj hine i izraelsko vojska te anel diso hajbase pe phralenđe, kola hine vojnikija. Ked šunđa so o Golijat vaćeri, o David phenđa: „Me ka borinav man oleja.“ O kralj Saul phenđa lese: „Tu hijan pana tikno.“ Ama, o David phenđa: „O Jehova ka pomožini man.“

O Saul dinđa e Davidese pi oprema aso maribe, ama o David phenđa: „Na hijum siklo te akharav akija oprema.“ O David lelja pi praćka hem đelo ki jekh reka. Odothe birinđa panđ okrugla bara hem ćhivđa len ki pi torba. Palo odova, prastandilo premalo Golijat. O Golijat phenđa lese: „Ava koro mande, tikneja. Ka parvarav e ćiriklen hem e divlja životinjen tuvaja.“ Ama, o David na darandilo, već phenđa lese: „Tu aveja te napadine man e mačeja hem e kopljeja, a me avava ko Jehovaso anav! Tu na borineja tut protiv amende, nego protiv o Devel. Sarine kola tane akate ka dikhen so o Jehova tano pozoralo ando mač hem ando koplje. Avdije ov ka del tumen ko amare vasta.“

Tegani, o David ćhivđa jekh bar ki praćka hem počminđa te vrtini la sa pe snagaja. Uzi Jehovasi pomoć, o bar khuvđa e Golijate pravo ko ćekat. Tegani ov pelo ki phuv hem mulo. Ked dikhlje odova, o Filistejcija počminđe te našen. Da li hem tu isi tut poverenje ko Jehova sar so hine le o David?