O hrabro Jodaj

I Jezavelja hine la ćhaj koja vićinđa pe Gotolija. Oj hine but lošno, isto sar pi daj. Olako rom hine o kralj andi Juda. Ked ov mulo, počminđa te vladini olako ćhavo. Ama, ked hem ov mulo, i Gotolija ćhivđa kokri pes te ovel kraljica ki Juda. Tegani, oj manglja te uništini celo kraljevsko porodica hem odolese počminđa te mudari sarinen kola šaj te oven kraljija ko olako than. Oj čak mudarđa pe unukonen! Sarine darandilje olatar.

O prvosvešteniko, o Jodaj hem olesi romni i Josaveja, đanđe so odova so i Gotolija ćerela tano but lošno. Olengo životi hine ki opasnost sose garavđe jekhe olake unuko ko hram hem barjaćerđe le. Oleso anav hine Joas.

Ked o Joas hine le efta berš, o Jodaj vićinđa sa e zapovednikonen hem e Leviten hem phenđa lenđe: „Terđoven anglo hramese udara hem ma mukhen nikas te khuvel andre.“ Tegani, o Jodaj ćhivđa e Joase te ovel kralj ki Juda hem ćhivđa lese kruna ko šero. O manuša andi Juda počminđe te vićinen: „Nek ovel đivdo o kralj!“

I kraljica Gotolija šunđa sar pištinena o manuša hem odmah đelji ko hram. Ked dikhlja e neve kralje, počminđa te vićini: „Ćerđen plan protiv mande!“ O zapovednikija astarđe e lošno kraljica, ikalđe la ando hram hem mudarđe la. Ama, da li palo olako meribe o narodo počminđa te služini e Jehovase?

O Jodaj pomožinđa e narodose te ćeren savez e Jehovaja koleja obećinđe so ka služinen samo olese. O Jodaj phenđa lenđe te rušinen e Valeso hram hem te phagen o idolija ko kotora. Ov ćhivđa e sveštenikonen hem e Leviten te služinen ko hram te šaj o narodo palem te služini samo e Jehovase. Isto ađahar, ov ćhivđa e stražaren te arakhen o hram te na bi khuvela niko koj tano nečisto. Palo odova, o Jodaj hem o zapovednikija legarđe e Joase ki kraljevsko palata hem ćhivđe le te ovel kralj. O narodo andi Juda hine but radosno. Akana, i lošno Gotolija više na hine hem on palem šaj hine te služinen e Jehovase, a na e hovavne devlese, e Valese. Odolese so hine hrabro, o Jodaj pomožinđa bute manušenđe.