O suno ando baro kaš

Jekh rat, o Navuhodonosor hine le strašno suno. Odolese vićinđa sa e mudra manušen te vaćeren lese so značini o suno. Ama, niko naštine te objasnini lese. Ko krajo, o kralj vaćerđa e Daniloja.

O Navuhodonosor phenđa e Danilose: „Ko suno dikhljum jekh kaš. Barilo odobor but, so reslja đi o nebo. Šaj hine te dikhel pe ando svako than ki phuv. Hine le šuže listija hem but plodija. O životinje hine odmorinena pe tali olesi senka hem o ćiriklja ćerđe gnezdo ko olese grane. Tegani jekh anđeo huljilo ando nebo hem phenđa: ’Ćhinen o kaš hem olese granke. Ama, mukhen o stablo e korenoncar hem okolo leste ćhiven sastronale hem bakarna okovija. Nek oleso vilo menini pe ando manušikano ko životinjsko hem odova ka trajini efta vremenija. Sa o manuša ka dikhen so o Devel tano Vladari hem so ov dela o kraljevstvo kase mangela.‘“

Ked o Jehova mothovđa e Danilose so značini o suno, ov but darandilo. O Danilo phenđa e kraljese: „Pošukar akava suno te vaćeri ando te dušmanija, ama ov vaćeri tutar. O baro kaš so hine ćhindo, tu hijan. Ka našale o kraljevstvo hem ka ha ćar ko njive sar divljo životinja. Ama, odova so phenđa o anđeo te mukhel pe o stablo e korenoncar značini so palem ka ove kralj.“

Palo jekh berš, o Navuhodonosor phirđa ko ravno krov ki pi palata hem dikhlja kobor tano šužo o Vavilon. Ov phenđa: „Kobor šuži diz gradinđum! Ćaće hijum but važno manuš!“ Đi vaćerđa, jekh glaso ando nebo phenđa lese: „Navuhodonosor! To kraljevstvo ka lel pe tutar.“

Ko odova trenutko, o Navuhodonosor našalđa pi godi hem ulo sar divljo životinja. Morandilo te đal andi palata hem te živini e divljo životinjencar. Olese bala barilje sar o perje ando orao, a olese noktija sar e ćirikljenge kandže.

Ked nakhlje efta berš, o Navuhodonosor palem ulo normalno hem o Jehova ćerđa le te ovel kralj ko Vavilon. O Navuhodonosor phenđa: „Hvalinava e Jehova, e Kralje ando nebo. Akana đanava so o Jehova tano Vladari. Sikavi e ponosno manušen te oven ponizna hem dela kraljevstvo okolese kas mangela.“