O Isus palem pojavini pe e apostolenđe

Disavo vreme palo odova so o Isus pojavinđa pe e apostolenđe, o Petar đelo te astari maćhen ko Galilejsko more. O Toma, o Jakov, o Jovan hem pana disave apostolija đelje oleja. Celo rat hine ko more, ama ništa na astarđe.

Tajsato dive, rano sabale, on dikhlje jekhe manuše kova bešela ki obala. Ov dural pućlja len: „Da li astarđen diso?“ On phenđe lese: „Na.“ Tegani o manuš phenđa lenđe: „Forden tumare mreže ki desno strana ando čamco.“ Ked ćerđe odova, i mreža odobor pherdilji maćhencar so naštine te ikalen la. O Jovan kotar jekhvar haljilo so odova manuš hine o Isus hem phenđa: „Odova tano o Gospod.“ O Petar odmah ripinđa ko pani hem plivinđa đi i obala. Avera apostolija alje čamcoja.

Ked reslje ki obala, on dikhlje e Isuse sar pekela maro hem maćhe ki jag. O Isus phenđa lenđe te anen nekobor maćhe kola on astarđe hem vićinđa len te han maro.

Palo maro, o Isus pućlja e Petare: „Da li mangeja man pobuter ando akala maćhe?“ O Petar phenđa: „Ja, Gospode, tu đaneja so mangava tut.“ O Isus phenđa: „Tegani parvar me bakren.“ O Isus palem pućlja e Petare: „Da li mangeja man?“ O Petar phenđa: „Gospode, tu đaneja so mangava tut.“ O Isus phenđa: „Parvar me bakren.“ Ov hem o trito puti pućlja le isto pućibe. Tegani o Petar ulo but tužno. Ov phenđa lese: „Gospode, tu sa đaneja. Tu đaneja so mangava tut.“ O Isus pana jekh puti phenđa: „Parvar me bakren.“ Palo odova podstakninđa le te đal palo leste.