So šaj te ćere te šaj e Devleso Lafi ćaće te koristini tuće?

Da li dijekhvar valjanđan te ćere disavi buti asi koja mislinđan soj tani but phari? Tegani, te šaj te ovel tuće polokho, šaj odlučinđan te ćere odija buti hari pohari. Ađahar tano hem ked valjani te počmine te čitine i Biblija. Šaj pućeja tut: „Kotar te počminav?“ Ki akija lekcija, ka dikha kola buća šaj te pomožinen tut te uživine đi čitineja hem proučineja e Devleso Lafi.

1. Sose tano šukar svako dive te čitina i Biblija?

O manuš kova svako dive čitini i Biblija, ja „e Jehovaso zakon“, ka ovel but bahtalo. (Čitinen Psalam 1:1-3.) Odolese, šukar tano svako dive te arakhe barem nekobor minutija te čitine i Biblija. So pošukar penđareja e Devleso Lafi, pana pobuter ka uživine đi čitineja le.

2. So valjani te ćera ked čitinaja i Biblija?

Ked čitinaja i Biblija, valjani hari te terđova hem te razmislina ando odova so čitinaja. Umesto samo te čitina i Biblija, šukar tano hor te razmislina odolestar so čitinaja (Isus Navin 1:8, fusnota). Odolese, đi čitineja, puć tut: „So akava sikavi man ando Jehova? Sar šaj te ćerav akava ko mo životi? Sar šaj akava te koristinav te pomožinav averenđe?“

3. Sar šaj te arakhe vreme te čitine i Biblija?

Da li tano tuće pharo te arakhe vreme te čitine i Biblija? Ako tano ađahar, ma mislin so hijan jedino. De sa tutar „mudro te koristine o vreme“ kova isi tut (Efešanima 5:16). Odolese, so šaj te ćere? Razmislin ked šaj tu te čitine. Disave čitinena i Biblija svako sabale. Avera ćerena odova hari kasnije, šaj ked isi len pauza ki buti. Disave avera čitinena i Biblija angleder te soven. So tu mislineja, kova vreme tano tuće najšukar?

SIKLJOV POBUTER

4. So šaj te ćere te uživine đi čitineja i Biblija?

Šaj tano tuće pharo te počmine te čitine i Biblija. Ama, sar so šaj te sikljove te uživine ko habe kova niked angleder na haljan, isto ađahar šaj te sikljove te uživine đi čitineja i Biblija. Čitinen 1. Petrova 2:2, hem palo odova vaćeren ando akava pućibe:

• Ako čitineja i Biblija svako dive, so mislineja da li hari pohari ka počmine te uživine đi čitineja la?

Dikhen o VIDEO kova mothovi sar disave počminđe te uživinen te čitinen i Biblija. Palo odova, vaćeren ando akala pućiba.

VIDEO: O terne kola sikljilje te mangen e Devleso Lafi (5:33)

• Sova borinđe pe disave terne ando akava video?

• So pomožinđa lenđe hem ponodri te čitinen i Biblija svako dive?

• So ćerđe te šaj pana pobuter te uživinen đi čitinđe i Biblija?

Sar te počmine te čitine i Biblija:

• Birin o prevod kova tano tačno hem lokho te haljol pe. Šaj te čitine o prevod Novi svet ki srpsko ćhib.

• Počmin te čitine o deo kova tuće najviše sviđini pe. Ako mangeja te đane sar te ćere odova, dikh i tabela „Čitin i Biblija svako dive.“

• Obeležin kaj resljan. Koristin i tabela „Kaj resljum“ koja tani dindi ki akija publikacija.

• Koristin i aplikacija JW Library^®. Ako isi tut odija aplikacija ko to telefoni ja ko disavo aver uređaj, kuri god te ove, šaj te čitine ja te šune o audio-snimak andi Biblija ko razna ćhibja.

• Koristin o dodatkija ko prevod Novi svet ki srpsko ćhib. Odothe ka arakhe mape, tabele hem but avera buća kola ka pomožinen tut pana pobuter te uživine đi čitineja i Biblija.

5. Pripremin tut aso kurs

Čitinen Psalam 119:34, hem palo odova vaćeren ando akava pućibe:

• Sose tano šukar te moline tut angleder te čitine i Biblija ja angleder te pripremine tut aso kurs?

Sar šaj te koristini tuće odova so sikljoveja andi Biblija? Đi pripremineja tut aso kurs, ćer akala buća:

1. 1. Čitin o prvo deo andi lekcija.

2. 2. Phrav hem čitin o stihija hem pokušin te haljove sar tane povezime odoleja so čitineja ki odija lekcija.

3. 3. Podvucin nekobor lafija kola tane odgovor ko pućibe. Odova ka pomožini tut ked ka ovel tut kurs.

Da li đanđan?

E Jehovase svedokija koristinđe nekobor različita prevodija andi Biblija. Ama, amen posebno ceninaja o prevod Novi svet sose tano tačno, šaj lokho te haljol pe hem koristini e Devleso anav. (Dikh o članko ko amaro sajt „Da li e Jehovase svedokija isi len pi Biblija?“)

SO SIKLJILJAM

Te šaj te koristini tuće odova so sikljoveja andi Biblija, arakh vreme te čitine la, molin tut te šaj te haljove odova so čitineja hem pripremin tut šukar aso svako kurs.

Te ponovina

• So šaj te ćere te šaj e Devleso Lafi ćaće te koristini tuće?

• Ked šaj te čitine hem te proučine i Biblija?

• Sose tano šukar te pripremine tut aso kurs?

RODE POBUTER

Dikh so šaj te ćere te uživine pana pobuter đi čitineja i Biblija.

„Da li šaj te uživine đi čitineja i Biblija?“ (Stražarska kula, br. 1/2017)

Sikljov ko kola trin načinija šaj te čitine i Biblija.

„Sar šaj i Biblija te pomožini man? – 1. deo: Penđar i Biblija pana pošukar“ (članko ko amaro sajt)

Sikljov sar šaj pana pobuter te uživine đi čitineja i Biblija.

„Sar šaj i Biblija te pomožini man? – 2. deo: Uživin đi čitineja i Biblija“ (članko ko amaro sajt)

Dikh kola savetija dena disave manuša kola beršencar čitinena i Biblija.

Hor proučin (2:06)