29. LEKCIJA

So ovela e manušencar ked merena?

Štampimo izdanje

Da li našalđan nekas kas mangljan? Sigurno tano tuće but pharo. Šaj pućeja tut: „So ovela e manušencar palo meribe? Da li palem ka dikha amare manglen kola mulje?“ Ki akija hem ki aver lekcija, ka dikha so i Biblija vaćeri odolestar.

1. So ovela e manušencar ked merena?

O Isus phenđa soj tano o meribe sar sojbe. Sose šaj te phena odova? Ked jekh manuš sovela, ov na đanela so ovela. Ked neko merela, ov više na osetini nisavi dukh, niti patini. I Biblija phenela: „O mule ništa na đanena.“ (Čitinen Propovednik 9:5.)

2. Sose tano šukar te đana o ćaćipe ando meribe?

But manuša darana ando meribe hem ando mule. Ama, odova so i Biblija vaćeri ando mule šaj but te utešini tut. O Isus phenđa: „O ćaćipe ka oslobodini tumen“ (Jovan 8:32). Disave religije phenena so palo meribe amari duša hem ponodri živini. Ama, i Biblija odova na sikavi. I Biblija phenela so o mule na patinena. On ništa na đanena hem našti te povredinen amen. Odolese, na valjani te ićera amen ko disave običaja ja te ćera disave buća kolencar mothovi pe čast e mulenđe. Isto ađahar, na valjani te molina amen asi olengi duša.

Disave manuša phenena so šaj te vaćeren e mulencar. Ama, on našti te ćeren odova, sose sar so sikljiljam „o mule ništa na đanena.“ On mislinena so vaćerena e mulencar, ama u stvari vaćerena e demonencar kola ćerena pe soj tane o manuša kola mulje. Ked đanaja so ovela e manušencar palo meribe, odova arakhi amen ando demonija. O Jehova đanela so o demonija mangena te povredinen amen. Odolese, ov phenela amenđe so na valjani te probina te vaćera e mulencar. (Čitinen Ponovljeni zakoni 18:10-12.)

SIKLJOV POBUTER

Sikljov so ovela e manušencar palo meribe hem sose šaj te ova sigurna so o Devel, kova tano pherdo mangipe, na mučini e manušen kola mulje.

Jekh manuš aćhilo bizi romni hem o ćhave aćhilje bizi daj. On tane ki đenaza hem bešena ki klupa. O amala hem i familija ćedinđe pe te utešinen len.

3. So ćaće ovela e mulencar?

Ki celo phuv, o manuša verujinena ko različita buća ando odova so ovela e manušencar palo meribe. Ama, našti sa odola buća te oven ćaće.

Ko so verujinena o manuša ko than kuri tu živineja?

Dikhen o VIDEO kova mothovi so i Biblija sikavi odolestar.

VIDEO: So ovela e manušencar ked merena? – insert (1:19)

Kolaž: O slike ando video „So ovela e manušencar ked merena? – insert.“ 1. Nekaso trupo tano ki bolnica ko kreveti. 2. O manuš bešela maškaro duj manuša hem sovela đi putujini vozeja.

Čitinen Propovednik 3:20, hem palo odova vaćeren ando akala pućiba:

Premalo akava stih, so ovela e manušencar ked merena?
Da li akava stih mothovi so amari duša ja amaro duh đala te živini ko disavo aver than?

I Biblija vaćeri so e Isuseso amal, o Lazar, mulo. Čitinen Jovan 11:11-14, hem dikhen sar o Isus objasninđa so ulo e Lazareja hem palo odova vaćeren ando akala pućiba:

Sova o Isus uporedinđa o meribe?
So akava primer mothovi odolestar so ovela e manušencar palo meribe?
Sar osetineja tut ked đaneja o ćaćipe ando meribe?

4. O ćaćipe oslobodini amen

Ked đanaja so ovela e manušencar palo meribe, tegani na daraja ando mule. Čitinen Propovednik 9:10, hem palo odova vaćeren ando akava pućibe:

Da li o mule šaj te povredinen amen?

Ked đanaja so i Biblija vaćeri ando mule, tegani na ka verujina ko disave hovajba hem na ka ićera amen ko disave običaja. Čitinen Isaija 8:19 hem Otkrivenje 4:11, hem palo odova vaćeren ando akava pućibe:

So mislineja, sar o Jehova osetini pe ked dikhela so ićeraja amen ko disave običaja hem so rodaja pomoć ando mule?

Kolaž: Razna običaja e mulenđe. 1. Jekh manuš ko koćja molini pe anglo spomenik hem anđa but buća hajbase. 2. Trin manuša ando disavo pleme tane uravde ko kostimija hem ćhelena. 3. Ki jekh parada o manuša isi len maske sar lobanja hem isi len but bare kosturija ko Dive ando mule. — Ked đanaja o ćaćipe ando meribe, amen hijam oslobodime ando običaja kola o Jehova na mangela

5. O ćaćipe utešini amen

But manuša verujinena so palo meribe ka oven mučime aso lošna buća kola angleder ćerđe. Ama, utešno tano te đana so palo meribe nijekh manuš na patini, čak ni okova so angleder ćerđa but lošna buća. Čitinen Rimljanima 6:7, hem palo odova vaćeren ando akava pućibe:

I Biblija phenela so o manuš kova mulo tano oslobodimo ando pe grehija. Tegani, da li tano logično te verujina so palo meribe o manuša ovena kaznime aso lošna buća kola angleder ćerđe?

So pobuter penđaraja e Jehova, pana pobuter hijam uverime so o mule na patinena. Čitinen Ponovljeni zakoni 32:4 hem 1. Jovanova 4:8, hem palo odova vaćeren ando akala pućiba:

Šaj li te zamisline jekhe Devle kova isi le asavke osobine, a kova mučini e manušen palo meribe?
Da li utešini tut odova so i Biblija vaćeri ando mule? Sose mislineja ađahar?

AKO NEKO PHENELA: „Darava so ka ovel mancar palo meribe.“