47. LEKCIJA

Da li hijan spremno te krstine tut?

Štampimo izdanje

Đi akana sigurno sikljiljan but buća ando Jehova. Šaj disave buća menjinđan ko to životi. Ama, šaj isi diso so ćhinavi tut te predajine to životi e Jehovase hem te krstine tut. Ki akija lekcija, ka dikha so šaj nekas te ćhinavi te krstini pe hem so šaj te ćerel te resel đi o krštenje.

1. Kobor šukar valjani te penđare i Biblija angleder te krstine tut?

Te šaj te krstine tut, valjani „šukar te penđare o ćaćipe“ (1. Timoteju 2:4). Odova na značini so valjani te đane sar te odgovorine ko svako pućibe kova neko šaj te ovel le. Čak hem okola soj tane beršencar krstime valjani hem ponodri te sikljon (Kološanima 1:9, 10). Tu valjani šukar te haljove o osnovna e biblijake sikljoviba. O starešine ka pomožinen tut te dikhe kobor đaneja.

2. So valjani te ćere angleder te krstine tut?

Angleder te krstine tut, tu valjani „te pokajine tut. . . hem te irine tut e Devlese.“ (Čitinen Dela apostolska 3:19.) Odova značini so valjani te mothove soj tano tuće žao aso lošna buća kola angleder ćerđan hem te rode ando Jehova te oprostini tuće. Isto ađahar, valjani te cide tut ando lošna buća hem te živine ađahar sar so rodela o Devel. Uzo odova, valjani redovno te đa ko amare sastankija hem ki služba.

3. Sose na valjani te mukhe i dar te ćhinavi tut te krstine tut?

Disave darana so na ka ićeren pe ko lafi kova dinđe e Jehovase. Ćaće, podijekh puti sare amen šaj te grešina. Čak hem disave verna murša hem đuvlja kolendar i Biblija vaćeri podijekh puti grešinđe. Ama, o Jehova na rodela amendar te ova savršena. (Čitinen Psalam 103:13, 14.) Ov tano bahtalo ked dikhela so daja lese amaro najšukar. Šaj te ova sigurna so ov uvek ka pomožini amen sose uverini amen so „ništa našti te ulavi amen kotar oleso mangipe.“ (Čitinen Rimljanima 8:38, 39.)

SIKLJOV POBUTER

Da li isi diso so ćhinavi tut te krstine tut? Dikh sar odova so deja sa tutar te penđare e Jehova hem so prihvatineja olesi pomoć šaj te pomožini tut te rese đi o krštenje.

Kolaž: Jekh terni romni koja proučini isi la razna problemija kolencar borini pe te avel đi o krštenje. O slike ponovinena pe ki akija lekcija.

4. Penđar e Jehova pana pošukar

Kobor šukar valjani te penđare e Jehova angleder te krstine tut? Tu valjani te đane odobor kobor valjani tuće te šaj te mange le hem te ovel tut želja te ćere odova so ov rodela. Dikhen o VIDEO kova mothovi sar odova ćerena disave manuša kola proučinena. Palo odova, vaćeren ando akava pućibe.

VIDEO: O drumo đi o krštenje (3:56)

So pomožinđa disave manušenđe te oven spremna aso krštenje?

Čitinen Rimljanima 12:2, hem palo odova vaćeren ando akala pućiba:

Da li hijan sigurno so odova sostar i Biblija sikavi ja odova so e Jehovase svedokija sikavena tano ćaćipe?
So šaj te ćere ako na hijan sigurno?

5. So šaj te ćhinavi amen te krstina amen?

Odija romni ćhivela i Biblija ki pi tašna, a olaki daj pištini upro late.

Ked odlučinaja te predajina amen e Jehovase hem te krstina amen, sare šaj te ovel amen disave pharipa. Kola pharipa hine la jekh romni? Dikhen o VIDEO, hem palo odova vaćeren ando akala pućiba.

VIDEO: O mangipe premalo Jehova dela amen snaga (5:22)

Kola pharipa hine la i Narangerel?
Sar o mangipe premalo Jehova pomožinđa laće te ikljol ko krajo odole pharipencar?

Čitinen Poslovice 29:25 hem 2. Timoteju 1:7, hem palo odova vaćeren ando akava pućibe:

So šaj te del amen hrabrost?

6. Ov sigurno so o Jehova ka pomožini tut

Jekh romni propovedini jekha phure romnjaće. I phen koja proučini olaja đala olaja ki služba.

O Jehova ka pomožini tut te ćere odova so ov mangela. Dikhen o VIDEO, hem palo odova vaćeren ando akala pućiba.

VIDEO: O Jehova ka pomožini tut (2:50)

Sose jekh manuš hine ko duj gođa da li te krstini pe ja na?
Sar odova so sikljilo pomožinđa lese te ovel sigurno so o Jehova ka pomožini le?

Čitinen Isaija 41:10, 13, hem palo odova vaćeren ando akava pućibe:

Sose šaj te ove sigurno so šaj te ćere odova so phenđan ked predajinđan to životi e Jehovase?

7. Ov zahvalno aso Jehovaso mangipe

So pobuter razmislineja odolestar kobor o Jehova mangela tut, pana pobuter ka ove lese zahvalno hem sebepi odova ka mange zauvek te služine lese. Čitinen Psalam 40:5, hem palo odova vaćeren ando akava pućibe:

Sose tu hijan zahvalno e Jehovase?

O prorok Jeremija but manglja e Jehova hem oleso lafi. Ov hine zahvalno so šaj te akhari oleso anav. Ov phenđa: „Ked te lafija alje maje, nakhavđum len. Toklo lafi radujinđa man hem pherđa mo vilo, sose me akharava to anav“ (Jeremija 15:16). So bi tu pheneja: