49. LEKCIJA
Sar šaj ti porodica te ovel bahtali? – 1. deo
Ko dive ked lena pe, o ćhavo hem i ćhaj tane but bahtale hem mangena zauvek te ovel ađahar. Odova ćaće šaj te ovel. O hrišćanija kola tane beršencar ko brak hem kola trudinena pe te ićeren pe ko biblijake savetija, đanena so odova šaj te ovel.
1. Premali Biblija so o roma valjani te ćeren?
O Jehova dinđa e romese te ovel poglavari ki porodica. (Čitinen Efešanima 5:23.) Ov mangela o rom te anel o odluke kola ka oven šukar asi celo porodica. Ki Biblija pisini: „Romalen, mangen tumare romnjen“ (Efešanima 5:25). So odova značini? O rom kova mangela pe romnja ka ovel šukar premalo late hem ked tane kokri hem ked tane avere manušencar. Ov arakhi pe romnja, dela sa pestar oj te ovel bahtali hem te ovel la sa so valjani olaće (1. Timoteju 5:8). Soj tano najvažno, ov pomožini la te aćhol paše e Jehovaja (Matej 4:4). Na primer, odova šaj te ćerel ked molini pe hem ked čitini i Biblija pe romnjaja. Ked o rom mangipaja brinini pe kotar pi romni hem ov ka aćhol paše e Jehovaja. (Čitinen 1. Petrova 3:7.)
2. Premali Biblija so o romnja valjani te ćeren?
E Devleso Lafi phenela so i romni valjani hor te poštujini pe rome (Efešanima 5:33). Odova šaj te ćerel ađahar so razmislini kotar pe romese šuže osobine hem odolestar kobor ov trudini pe oj hem o ćhave te ovel len sa so valjani. Isto ađahar, i romni koja poštujini pe rome podržini o odluke kola ov anela, ljubazno tani pe romeja hem šukar vaćeri olestar, čak iako ov na služini e Jehovase.
3. Sar šaj o rom hem i romni te zorjaćeren po brak?
I Biblija phenela so o rom hem i romni „ka oven jekh telo“ (Matej 19:5). Odova značini so on valjani te den sa pestar te na šudron jekh jekhestar. Odolese tano važno te arakhen vreme jekh jekhese hem phravdo te vaćeren jekh jekheja ando odova sar osetinena pe hem so mislinena. Osim o Jehova, niko hem ništa na valjani te ovel olenđe považno ando olengo bračno drug. Posebno valjani te pazinen te na oven but paše nekasa ko nane olengo rom ja olengi romni.
SIKLJOV POBUTER
Dikh kola načelija andi Biblija šaj te zorjaćeren to brak.
4. Romalen – mangen tumare romnjen hem brininen tumen olendar
I Biblija phenela so „o roma valjani te mangen pe romnjen sar poklo telo“ (Efešanima 5:28, 29). So odova značini? Dikhen o VIDEO, hem palo odova vaćeren ando akava pućibe.
Sar šaj o rom te mothovi so mangela pe romnja hem so brinini pe olatar?
Čitinen Kološanima 3:12, hem palo odova vaćeren ando akava pućibe:
Sar šaj o rom te mothovi akala osobine?
5. Romnjalen – mangen hem poštujinen tumare romen
I Biblija phenela so i romni valjani te poštujini pe rome, čak iako ov na služini e Jehovase. Čitinen 1. Petrova 3:1, 2, hem palo odova vaćeren ando akala pućiba:
Ako to rom na služini e Jehovase, sigurno mangeja hem ov te služini lese jekh dive. Odolese, so bi ovela pošukar – stalno te propovedine lese ili te ove šukar, ljubazno hem te mothove so poštujineja le? Sose?
Šukar tano o rom hem i romni te anen disave odluke zajedno. Ama, podijekh puti i romni šaj na ka složini pe odoleja so olako rom mangela te ćerel. Tegani, oj šaj mirno te vaćeri pe romeja hem te phenel lese so mislini. Ama, valjani te mothovi lese so poštujini le. Isto ađahar, na valjani te bistrel so o Jehova e romese dinđa odgovornost te anel odluke pe porodicaće. Oj valjani te del sa pestar te podržini olese odluke. Čitinen 1. Petrova 3:3-5, hem palo odova vaćeren ando akava pućibe:
Sar tano e Jehovase ked dikhela so i romni poštujini pe rome?
6. O problemija ko brak šaj te rešinen pe
Ko svako brak isi problemija. Odolese, o rom hem i romni valjani te den sa pestar te rešinen pe problemija. Dikhen o VIDEO, hem palo odova vaćeren ando akava pućibe.
So mothovi so o rom hem i romni kotar video durilje jekh jekhestar?
So ćerđe te šaj palem te oven paše jekh jekheja?
Čitinen 1. Korinćanima 10:24 hem Kološanima 3:13. Palo odova so ka čitinen akala stihija vaćeren ando akava pućibe:
Sar šaj akala savetija te pomožinen e romese hem e romnjaće te zorjaćeren po brak?
I Biblija phenela so valjani te poštujina jekh jekhe. Odova značini so valjani te ova šukar jekh premalo aver hem te haljova jekh jekhe. Čitinen Rimljanima 12:10, hem palo odova vaćeren ando akala pućiba:
Da li o rom hem i romni valjani te dikhen ko prvo ka mothovi poštovanje? Sose mislineja ađahar?
AKO NEKO PHENELA: „Na hijam paše sar angleder.“
Sar šaj te objasnine so i Biblija šaj te pomožini olenđe?
SO SIKLJILJAM
O rom hem i romni šaj te oven bahtale ako mangena jekh jekhe, ako poštujinena jekh jekhe hem ako ićerena pe ko biblijake načelija.
Te ponovina
So šaj o rom te ćerel te šaj o brak te ovel bahtalo?
So šaj i romni te ćerel te šaj o brak te ovel bahtalo?
Kola načelija šaj te pomožinen tut te zorjaćere to brak?
RODE POBUTER
Dikh so šaj te pomožini tut te ovel tut bahtali porodica.
Dikh o video kova mothovi sose tano šukar ked ko brak ićeraja amen ko biblijake načelija.
So značini te ove podložno te romese?
„Romnjalen, sose valjani te oven podložna tumare romenđe?“ (Stražarska kula, 15. maj 2010)
Sar jekh bračno par uspinđa te rešini disave ozbiljna problemija ko po brako?