Koj tano krivo?

Ako o muke na avena kotar Devel, sose tegani isi odobor baro bokhaljipe, čoripe, maribe, bare nabormipa hem prirodna katastrofe? E Devljeso Lafi, i Biblija, mothovi amendže trin glavna razlogija sose o manuša isiljen muke:

1. O manuša mangena samo pes, isiljen bokhalji jakh hem mrzinenape. „O manuš vladini upro manuš ko oljeso lošnipe“ (Vačerutno 8:9). But puča o manuša isiljen muke sose upro oljende vladinena manuša kola tane nesavršena, lošna hem mangena samo pes.

2. O vakti hem o buča kola na adžičera. But puča o manuša isiljen muke sose „o vakti hem o buča kola na adžičerdže arakhena sarinen oljen“ (Vačerutno 9:11). Odova tano sose o manuša tane ko pogrešno than, ko pogrešno vakti, sebepi so ovena lošna buča, o manuša na arakhenape ja čerena greške.

3. O lošno vladari akalje svetoso. I Biblija mothovi o najbaro razlog sose o manuša isiljen muke. Oj vačeri so o „celo sveto tano ko Lošnonese vasta“ (1. Jovaneso 5:19). Odova lošno tano o Beng, o Satana. Ov tano jekh zoralo duh kova angljeder hine e Devljeso anđeo ama „na ačhilo ko čačipe“ (Jovan 8:44). Avera anđelija dželje palo Beng, bunisalje protiv o Devel te šaj te čeren peklje želje hem adžahar ulje demonja (1. Mojsieso 6:1-5). Kotar odova vakti, o Beng hem oljese demonja dena sa pestar te oveljen sa pobaro hem lošno uticaj upro odova so ovela ko sveto. Odova dičhola sa pobuter ko amaro vakti. Akana o Beng tano but holjamo hem „hovavi celo sveto“, odoljese tano but „pharo e phuvjače“ (Pučaribe 12:9, 12). Čače, o Beng tano but lošno vladari. Ov tano bahtalo ked dikhela so o manuša isiljen muke. O Beng tano krivo sose o manuša isiljen muke, a na o Devel.

RAZMISLIN AKALJESTAR: Samo džiko koj tano lošno hem nanelje vilo, šaj te čerel e manušendže kola nane kriva te oveljen muke. Ama, o Devel nane asavko. I Biblija phenela: „O Devel tano mangipe“ (1. Jovaneso 4:8). Sebepi so sa čerela mangipa „dur tano kotar čačutno Devel te čerel lošnipe, hem kotar Svemoćno te na ovel pravedno“ (Jov 34:10).

Ama šaj pučejatu: „Pana kobor vakti o Svemoćno Devel ka mukel e Bengese te ovel lošno vladari?“ Sar so dikhljam, o Devel mrzini o lošnipe hem but dukhalalje ked isimen muke. Uzo odova, oljeso Lafi vačeri amendže: „Sa tumare gajlje forden koro oljeste sose ov akhari gajlja tumendar“ (1. Petareso 5:7). O Devel mangela amen hem isilje moć te cidel sa o muke hem i nepravda. Akaljestar ka vačera ko aver članko.a