Sar tano e Devleso anav?

Ked mangeja nekas te penđare, verovatno prvo pućeja: „Sar tano to anav?“ Ako bi odova pućeja e Devle, so bi ov phenela tuće?

„Me hijum o Jehova. Odova tano mo anav“ (Isaija 42:8).

Da li već šunđan aso odova anav? Šaj na šunđan. Odova nane ništa čudno, sose ko but prevodija andi Biblija odova anav pisini samo ko nekobor thana, a ko disave prevodija tano potpuno ikaldo ja umesto odova anav tani ćhivdi i titula „GOSPOD“. Ama, e Devleso anav ki izvorno ćhib pomini pe oko 7 000 putija. Odova anav sastojini pe ando štar hebrejska suglasnikija kola ki latinica pisinena pe sar JHVH, a ki romani ćhib tano prevodimo sar „Jehova“.

E Devleso anav but putija pomini pe ko hebrejsko tekst, a hem ko but avera prevodija

SOSE TANO E DEVLESO ANAV VAŽNO?

Važno tano e Devlese. E Devlese niko na dinđa anav, već ov kokri pese birinđa le. Ov phenđa: „Akava tano mo anav zauvek hem ađahar ka ovav penđardo andi generacija ki generacija“ (Izlazak 3:15). Ki Biblija, e Devleso anav pomini pe pobuter ando sa olese titule, sar soj tane: Najbaro, Dad, Gospod hem Devel. Oleso anav pomini pe pobuter putija hem ando avera manušenge anava, sar soj tane: Avraham, Mojsije, David hem Isus. Soj tano pana považno, o Jehova mangela sare te đanen oleso anav. Ki Biblija pisini: „Nek đanen o manuša so jedino tu, kaso anav tano Jehova, hijan Najbaro upri celo phuv“ (Psalam 83:18).

Važno tano e Isusese. O Isus ki molitva Očenaš, koja vaćerđa te bi sikavi pe učenikonen sar te molinen pe, phenđa: „Nek svetini pe to anav“ (Matej 6:9). Ov molinđa pe e Devlese: „Mo Dad, proslavin to anav“ (Jovan 12:28). E Isusese hine najvažno te slavini pe e Devleso anav hem odolese ki molitva šaj hine te phenel: „Me vaćerđum lenđe to anav hem ponodri ka vaćerav le“ (Jovan 17:26).

Važno tano okolenđe so penđarena e Devle. E Devlese sluge ko purano vreme haljilje so olengo životi zavisini ando odova da li penđarena hem poštujinena e Devleso anav. Odolese, i Biblija phenela: „Zorali kula tani e Jehovaso anav. Koro late našela o pravedno manuš hem arakhi zaštita“ (Poslovice 18:10). „Svako ko vićini e Jehovaso anav ka ovel spasimo“ (Joilo 2:32). I Biblija mothovi so premalo odova anav ka oven penđarde okola so služinena e Devlese. Koro late pisini: „Sose sa o narodija ka služinen pe devlese, a amen ka služina e Jehovase, amare Devlese, ki celo večnost“ (Mihej 4:5; Dela apostolska 15:14).

SO ODOVA ANAV MOTHOVI AMENĐE ANDO DEVEL?

Mothovi koj tano o Devel. But izučavaocija mislinena so o anav Jehova značini „Ov ćerela te ovel“. Kokri o Jehova pobuter objasninđa amenđe so značini oleso anav ked phenđa e Mojsijese: „Ka ovav sa so mangava te ovav“ (Izlazak 3:14). E Devleso anav mothovi amenđe so ov nane samo Stvoritelj kotar sa, već so šaj te ćerel hem sa okova so stvorinđa – hem okova soj tano đivdo hem okova so nane đivdo – te ovel sa so valjani te bi ispunini pi namera. E Devlese titule opisinena kobor tano ov baro, moćno ja savo autoritet isi le. Ama, jedino oleso anav, Jehova, mothovi koj tano ov ćaće hem so šaj te ovel.

Mothovi soj tano zainteresimo amenđe. O značenje ando Devleso anav mothovi so ov brinini pe kotar sa so ćerđa, a odova uključini hem amen, e manušen. U stvari, odova so mothovđa amenđe po anav, mothovi so mangela te penđara le. Ov mothovđa po anav čak angleder so bijandiljam. O Devel na mangela te dikha le sar neko koj tano but dur amendar hem kas našti te penđara, već sar neko kasa šaj te ova paše amala (Psalam 73:28).

Ked koristinaja oleso anav, mothovaja so ov tano važno amenđe. Na primer, sar ka osetine tut ako neko kasa mangeja te ove amal hić na vićini tut ko anav? Sar đala o vreme, šaj pućeja tut da li hijan važno odola osobaće. Ađahar tano hem e Devleja. O Jehova mothovđa amenđe po anav hem mangela te koristina le. Ako ćeraja ađahar, tegani ka mothova so mangaja te ova paše oleja. Ov čak dikhela okolen „kola razmislinena ando oleso anav“ ili „kola ceninena oleso anav“ (Malahija 3:16; fusn.).

Te šaj te penđara e Devle, najangleder valjani te đana kova tano oleso anav. Ama, odova nane sa. Važno tano te penđara e osoba koja akhari odova anav hem te sikljova savo tano o Devel.