Arakh to „baro štit andi vera“

1-2. (a) Premalo Efešanima 6:16, sose valjani amendže o „baro štit andi vera“? (b) Ko kola pučiba ka dobina odgovorija?

DA LI isi tut „baro štit andi vera“? (Čitinen Efešanima 6:16.) Sigurno isi tut. Sar so o baro štit arakhi to telo, i vera arakhi tut kotar o lošna buča ko sveto sar soj tane o nemoral, o nasilje hem ando avera buča kola o Devel na mangela.

² Ama, avdije živinaja ko „poslednja dive“. Odoljese, but putija amari vera ka ovel ispitimi (2. Tim. 3:1). Sar šaj te džane da li to štit andi vera tano zoralo? So šaj te čere te šaj ti vera te ovel zoralji? Ko akava članko ka dobina odgovorija ko akala pučiba.

DIKH SAVO TANO TOKLO ŠTIT

3. Sar o vojnikija arakhlje pe štitija hem sose?

³ Ko purano vreme, o vojnikija hine ljen štitija kola hine učharde kožaja. Te šaj i koža pobuter te trajini hem i rđa te na ovel ko metalna delija ando štit, o vojnikija makhlje peklje štitija uljeja. Ked jekh vojniko dikhlja so oljeso štit hine oštetimo, ov sig posig dikhlja te popravini lje te šaj te ovel spremno te džal ko aver maribe. Sar akava primer tano povezimo amare veraja?

4. Sose valjani te dikhe savo tano toklo štit andi vera hem sar šaj odova te čere?

⁴ Sar o vojnikija ko purano vreme hem amen valjani redovno te dikha savo tano amaro štit andi vera te šaj te ova zaštitime ked odova ka valjani. Sar hrišćanja, amen hijam ko duhovno maribe hem amare dušmanja tane o lošna duhovna sile (Ef. 6:10-12). Niko aver našti ko toklo than te ičeri toklo štit andi vera. Sar šaj tu te ove sigurno so tiklji vera ka ovel zoralji ked ka ove ko pharipa? Najangljeder, molin tut e Devljese te pomožini tut. Palo odova, ko e Devljeso Lafi dikh sar o Jehova dikhela upro tute hem adžahar dikh hem tu kokri tut (Jevr. 4:12). Ki Biblija pisini: „Nek ovel tut poverenje upro Jehova celone viljeja hem ma te ovel tut poverenje ko toklo džandipe“ (Posl. 3:5, 6). Dži akala mislija tane ki ti godi, razmislin ando odluke kola andžan akana sigende. Na primer, da li ačhiljan bizo pare? Da li tegani setindžan tut ko e Jehovaso obećanje ando Jevrejima 13:5: „Niked na ka mukhav tut hem niked na ka irinav tuče mo dumo“? Da li odova obećanje uverindža tut so o Jehova ka pomožini tut? Ako hine adžahar, odova mothovi so šukar arakheja toklo štit andi vera.

5. So šaj ka arakhe ked ka ispitine ti vera?

⁵ Ked ka ispitine savi tani ti vera, šaj ka ove iznenadimo odoljeja so ka arakhe. Šaj ka arakhe mane kola disavo vreme na dikhljan. Na primer, šaj ka dikhe so o bare brige, o hovajbe ja o obeshrabrenje slabondža ti vera. Ako diso adžahar desindža pe tuče, so šaj te čere tiklji vera te na slaboni pana pobuter?

ARAKH TUT ANDO BARE BRIGE, HOVAJBA HEM OBESHRABRENJE

6. Sostar valjani te brinina amen?

⁶ Disave bučendže tano šukar te brinine tut. Na primer, amen šaj brininaja amen odoljestar da li čeraja o buča kola o Jehova hem o Isus mangena (1. Kor. 7:32). Ja šaj čerdžam disavo baro greh, hem tegani brinina amen so šaj te čera te šaj te ačhova amala e Devljeja (Ps. 38:18). Ja šaj brininaja amen kotar amaro rom ja romni, andi amari porodica ja ando amare phralja hem phenja (1. Kor. 7:33; 2. Kor. 11:28).

7. Premalo Poslovice 29:25, sose na valjani te dara ando manuša?

⁷ Ked but brininaja amen, tegani amari vera šaj te slaboni. Na primer, šaj but brininaja amen odoljestar so ka ha ja so ka urava (Mat. 6:31, 32). Odoljese so but brininaja amen, šaj ko prvo than ka čhiva o materijalna buča. Čak šaj te počmina te manga o materijalna buča. Ako mukhaja odova te ovel, amari vera ko Jehova šaj te slaboni hem amaro amaljipe oljeja na ka ovel zoralo (Mar. 4:19; 1. Tim. 6:10). Ako but brininaja amen šaj te pera ki pana jekh zamka. Šaj but te brinina amen so avera manuša mislinena amendar. I dar ando odova te na maren amendže muj ja te na protivinen pe amendže šaj te ovel pobari, nego i dar te na čera diso so o Jehova na mangela. Odoljese te na pera ki odija zamka, te dara ando manuša, valjani te molina e Jehova te del amen pobari vera hem hrabrost. (Čitinen Poslovice 29:25; Luka 17:5.)

8. So valjani te čera ako neko počmini te vačeri amendže razna hovajba?

⁸ O Beng, kova tano „o dad ando hovajbe“, prekalo manuša koljen ov kontrolišini širini o hovajba ando Jehova hem ando amare phralja hem phenja (Jov. 8:44). Na primer, o otpadnikija prekalo veb-sajtija ja prekalo radio, prekali televizija ja prekalo novine, vačerena hovajba andi e Jehovasi organizacija. Odola hovajba tane jekh ando „e Lošnosese strele kola thabljona“ (Ef. 6:16). So valjani te čera ako neko počmini te vačeri amendže asavke hovajba? Amen na ka šuna ljen. Sose? Odoljese so verujinaja e Jehovase hem isi amen poverenje ko amare phralja. Odoljese, nisar na mangaja te ova ko kontakt e otpadnikonencar. Podijekh puti šaj interesini amen te šuna so on phenena, ama nane amen ni jekh razlog te šuna ljen niti te khuva ki rasprava oljencar.

9. Sar šaj o obeshrabrenje te utičini upro amende?

⁹ Sebepi o obeshrabrenje amari vera šaj te slaboni. Disavo puti, sebepi o problemija but hijam obeshrabrime. Amen haljovaja so našti te phana amare jačha anglo problemija. Ama, na valjani samo te mislina ando problemija. Ako razmislinaja samo ando problemija, šaj te bistra sa o šukar buča kola o Jehova obećindža amendže (Otkr. 21:3, 4). Šaj te ova odobor obeshrabrime so šaj te našala amari snaga hem te čhinava te služina e Jehovase (Posl. 24:10). Ama, amen ne mora adžahar te nakha.

10. So sikljovaja kotar jekh phen?

¹⁰ Jekh amari phen andi Amerika, brinini pe ando poklo nabormo rom. Ko jekh ljil kova bičhaldža ki amari centrala, oj pisindža sar olaki vera ačhilji zoralji: „But putija hine amen stresna situacije hem hijam lje obeshrabrime, ama amari nada hine zoralji. But hijum zahvalno sa e bučendže kola o Jehova dela amen te šaj te zorjačera amari vera hem te ohrabrina amen. O savetija hem ohrabrenje čače valjanena amendže. On pomožinena amen te na pera hem te istrajina ko kušnje kola o Beng koristini te peravi amen.“ So sikljovaja kotar akija phen? Sikljovaja so amen šaj te pobedina o obeshrabrenje. Sar? Ma te bistre so o Beng iskušini amen prekalo amare pharipa. Nek ovel tut poverenje ko Jehova so ov ka utešini tut. Isto adžahar, cenin sa so o Jehova dela tut te šaj te zorjačere tiklji vera.

11. Kola pučiba valjani te puča amen te šaj te dikha da li tani amari vera zoralji?

¹¹ Da li dikheja so tiklji vera valjani te ovel pozoralji? Da li ko masekija kola nakhlje uspindžan te na brinine tut odobor but? Da li hine tuče pharo te na šune e otpadnikonen hem te na khuve ki rasprava oljencar? Ako hijan lje obeshrabrimo, da li uspindžan te pobedine o obeshrabrenje? Ako uspindžan, tegani tiklji vera tani zoralji. Ama, šukar tano te arakha amen sose o Beng koristini hem avera buča protiv amende. Akana ka dikha jekh ando odola buča.

ARAKH TUT ANDO MATERIJALIZAM

12. So šaj te ovel ako mangaja o materijalna buča?

¹² Ako mangaja o materijalna buča, amari vera šaj te slaboni hem tegani na ka da amaro najšukar e Jehovase. O apostol Pavle phendža: „Nijekh vojniko nane posvetimo odoljese te zaradini but pare, sebepi so mangela te čerel i volja okoljesi kova ljelja lje te ovel oljeso vojniko“ (2. Tim. 2:4). E rimsko vojnikonendže na hine dozvolimo te čeren nijekh aver buti. So šaj hine te ovel ako jekh vojniko na šundža akava?

13. Sose o vojniko na valjandža te čerel nijekh aver buti?

¹³ Zamislin akija situacija. Sabalje tano. O vojnikija uštilje, ljelje pe mačija hem vežbinena aso maribe. Ama, jekh oljendar nane odothe. Ov dželo ko pazari te biknel o habe. Račate, o vojnikija proverinena piklji vojno oprema hem oštrinena peklje mačija. Ama, okova so biknela ko pazari, spremini o habe kova ka biknel tajsa. Tajsato dive, sabalje, o dušmanja avena hem iznenada napadinena ljen. So mislineja, kova vojniko ka ovel spremno aso maribe hem kova vojniko ka čerel oljeso komandanti te ovel bahtalo? Ako bi valjani tu te dža ko odova maribe, uzo kova vojniko bi mangeja te ove – uzo okova kova spremindža o habe ja uzo okova kova spremindža pe aso maribe?

14. Sar e Hristese vojnikonendže, soj tano amendže najvažno?

¹⁴ Amen hijam sar odola šukar vojnikija kola hine spremna. Amendže tano najvažno amare Komandantija, o Jehova hem o Hrist, te oven bahtalje. Odova tano amendže považno ando sa so šaj te dobina ko e Bengeso sveto. Amaro vreme hem amari snaga mangaja te koristina te služina e Jehovase hem te arakha amaro baro štit andi vera. Isto adžahar, mangaja te ovel amen hem sa avera delovija andi duhovno ratno oprema.

15. Kova upozorenje o apostol Pavle dindža amen hem sose?

¹⁵ Amen valjani uvek te ova oprezna. Sose? O apostol Pavle upozorindža e hrišćanen ked phendža so okola kola manglje te oven barvalje „durilje andi vera“ (1. Tim. 6:9, 10). O lafi „durilje“ značini so amen šaj sa pobuter hem pobuter te manga te ovel amen buča kola na valjanena amendže. Tegani, ko amaro vilo šaj te barjon „but nerazumna hem lošna želje“. Ama, na valjani te bistra so o Beng koristini akala želje protiv amende te šaj te slaboni amari vera.

16. Premalo Marko 10:17-22, ando kola pučiba valjani te razmislina?

¹⁶ Šaj isi amen odobor pare so šaj te čina but buča. Da li tano diso pogrešno ako činaja o buča kola na valjanena amendže? Nane. Ama, razmislin ando akala pučiba: Iako šaj te čina but buča, da li čače isi amen vreme hem snaga te sikljova sar te koristina odola buča? Isto adžahar, da li šaj te počmina te manga o materijalna buča kola isi amen? Šaj li odova so mangaja o materijalna buča, te čerel te ova sar o terno manuš kova odbindža e Isuseso poziv? (Čitinen Marko 10:17-22.) Kobor tano pošukar te živina skromno hem te koristina amaro vreme hem amari snaga te čera e Devljesi volja!

DE SA TUTAR TIKLJI VERA TE AČHOL ZORALJI

17. So na valjani te bistra?

¹⁷ Na valjani te bistra so amen hijam ko maribe hem so svako dive valjani te ova spremna te borina amen (Otkr. 12:17). Amare phralja hem phenja našti te akharen amaro štit. Amen valjani te da sa amendar amari vera te ačhol zoralji.

18. Sose o vojnikija ko purano vreme morandilje te arakhen peklje štitija?

¹⁸ Ko purano vreme, ako jekh vojniko hine hrabro ko maribe oljese mothovdža pe bari čast. Ama, ako jekh vojniko irini pe čhere bizo poklo štit, odova bi ovela but bari ladž. O rimsko istoričar Tacit pisindža: „Najbari ladž hine ako bi jekh vojniko našalji poklo štit.“ Odoljese, o vojnikija morandilje te den sa pestar te arakhen peklje štitija.

19. Sar šaj te arakha amaro štit andi vera?

¹⁹ Amen arakhaja amaro štit andi vera adžahar so hijam redovna ko amare sastankija hem adžahar so propovedinaja averendže (Jevr. 10:23-25). Isto adžahar, svako dive čitinaja e Devljeso Lafi hem molinaja e Jehova te pomožini amen te ičera amen ko oljese lafija (2. Tim. 3:16, 17). Tegani, nijekh oružje kova o Beng koristini protiv amende na ka ovel uspešno (Is. 54:17). Amaro „baro štit andi vera“ ka zaštitini amen. Uzo odova, amen hem amare phralja hem phenja ka ačhova hrabra. Svako dive amen ka pobedina hem ka uspina amari vera te ačhol zoralji. Hem soj tano najvažno, ka ovel amen čast te ova ki e Isusesi strana ked ka pobedini e Benge hem okoljen kola šunena lje (Otkr. 17:14; 20:10)