Viljestar šukar aljen

Kase šaj te phena šukar aljen? Svakonese ko avela ko amare sastankija, okoljendže kola avena prvo puti hem okoljendže soj tane but vakti amenca (Ri 15:7; Jev 13:2). Isto adžahar, odola šaj te oven amare phralja kola alje andi aver phuv ja amare phralja kola nane aktivna, a alje palo but berša. Sar bi tuče ovela te ove ko oljengo than? Sigurno ka ovel tuče but šukar ked bi on avena hem viljestar pozdravinenape tuva (Mt 7:12). Odoljese, de tutar sa ked aveja ki dvorana te pozdravinetu sarinenca angljeder o sastanko hem palo sastanko. Ked čera odova, tegani maškaro amende barjola o mangipe hem odova anela bari čast e Jehovase (Mt 5:16). Disavo puti našti te resa te vačera sarinenca kola alje, ama sare ka osetinenpe šukar ako amen da sa amendar te pozdravinamen sarinenca.a

I sajgija na mothovipe samo ked isimen disave posebna sastankija sar soj tano o Dive ked setinamen ko Isuseso meribe, nego valjani uvek te čera odova. Ked prvo puti avena o manuša hem dikhena amaro mangipe, odova ka ohrabrini oljen te slavinen e Devlje hem te oven amenca ki čačutni religija (Jv 13:35).