HRIŠĆANSKO DŽIVDIPE
„O Pavle zahvalisalo e Devljese hem zorjačerdža pe“
Ked i skupština ko Rim šuja so o Pavle avela koro oljende, bičhaldža nekobor phraljen te ikljon anglo oljeste. Akala phralja putuije koro 65 kilometrija. Sar utičija upro Pavle oljengo mangipe hem odova so dije sa pestar? „Ked dikhlja ljen, o Pavle zahvalisalo e Devljese hem zorjačerdža pe“ (Čer 28:15). O Pavle hine pendžarutno ko odova so zorjačerdža e skupštinen koljen posetija. Ama, akava puti dži hine phanlo, avera zorjačerdže olje (2Ko 13:10).
Avdije o pokrajinska nadglednikija džana ko skupštine te šaj te zorjačeren e phraljen hem e phenjen. Sar sa e Devljese sluge hem on podijekh puti tane čhinde, akharena gajlja disose ja obeshrabrinena pe. Sar šaj te zorjačere e pokrajinsko nadgledniko hem oljese romnja ked ka aven aver puti ki tiklji skupština? So šaj tu te čere te šaj jekh jekhe te zorjačeren? (Ri 1:11, 12).
Dža ko sastankija e službače. O pokrajinsko nadgledniko zorjačeri pe ked dikhela so o objaviteljija dena sa pestar te šaj te ovel ljen berečetija kotar celo kurko ked tano ov ki poseta (1So 1:2, 3; 2:20). Da li šaj te ove pomoćno pioniri ko masek ked ov avela ki tiklji skupština? Da li šaj te dža oljeja ja oljese romnja ko tereni ja ko biblijako kurs? On tane bahtalje ked džana ki služba sarinenca hem okoljenca soj tane neve ja okoljenca so mislinena so na čerena odobor šukar pi služba.
Mothov sajgija. Da li šaj te vičine e pokrajinsko nadgledniko hem oljese romnja te aven koro tute te soven ja te han maro? Adžahar ka mothove so mangeja ljen. Ma bistre so on na adžičerena te čere diso posebno oljendže (Lu 10:38-42).
Šun o savetija hem uputstvija hem čer ko odova. O pokrajinsko nadgledniko mangipa pomožini amen te dikha kuri šaj te ova pana pošukar ki amari služba e Jehovase. Podijekh puti šaj ka delmen but ozbiljno savet (1Ko 5:1-5). Ov bahtaljipa ka čerel piklji služba ked ka dikhel so hijam poslušna hem podložna (Jev 13:17).
Mothov zahvalnost. Vačer e pokrajinsko nadglednikose hem oljese romnjače so but značija tuče oljengi poseta. Odova šaj te phene oljendže lično ja šaj te pisine oljendže jekh tikno ljil. (Ko 3:15).