O Jehova but blagoslovindža man sose oponašindžum o primer kotar zrela phralja

Bijandiljum ki diz Kvibek, ki kanadsko pokrajina kuri vačeri pe francusko čhib. Me roditeljija, o Luj hem i Zelija, mothovdže maje baro mangipe. Mo dad hine ladžutno hem manglja te čitini. But mangljum te pisinav hem odolese mo čefi hine jekh dive te ovav novinar.

Ked hine man oko 12 berš, me dadeso kolega o Rodolf Susi hem oleso amal, alje koro amende čhere. On hine e Jehovase svedokija. Na džandžum but olendar hem iskreno na hine man ni želja te džanav pobuter andi odija religija. Ama, sviđindža pe maje so ko amare pučiba odgovorindže andi Biblija ko ljubazno hem logično način. Odova sviđindža pe hem me roditeljendže, odolese sare počmindžam te proučina i Biblija.

Ko odova vreme, dželjum ki katoličko škola. Podijekh puti, vačerdžum me amalencar kotar razred ando odova so sikljiljum ko mo biblijako kurs. Me nastavnikija kola hine sveštenikija saznajindže sostar amen vačerdžam. Umesto te koristinen i Biblija, te bi dokažinen so na hijum u pravu, jekh olendar optužindža man anglo celo razred so čerava i pobuna. Iako na hine maje sajekh, odova so ulo hine maje blagoslov sose ko asavko način haljiljum so verska sikajba kola sikavena nane u skladu odoleja so phenela i Biblija. Tegani osetindžum so othe na hine mo than. Uzi me roditeljengi dozvola, nakhljum ki aver škola.

SAR SIKLJILJUM TE UŽIVINAV KI SLUŽBA?

Iako pana proučindžum i Biblija, but sporo napredujindžum, sose darandiljum te džav ki služba kotar čher ko čher. I Katoličko crkva hine la baro uticaj hem but protivindža pe amare službače kotar čher ko čher. O Moris Diplesi, premijer kotar Kvibek, podržindža i crkva. Sebepi olesi podrška, but putija disave nasilna manuša čerdže problemija hem mardže amare phraljen. Čače hine potrebna hrabrost te propovedini pe ko odova vreme.

O phral Džon Rej, kova hine ko enjato razred andi škola Galad, pomožindža maje te savladinav i dar koja hine man. Odova phral hine but iskusno, ponizno, blago hem pristupačno. Iako akava phral na savetujindža man često, olestar but sikljiljum. Hine lese but pharo te vačeri francusko čhib hem odolese dželjum oleja često ki služba hem pomožindžum olese te sikljol odija čhib. Odova so često hijum le zajedno oleja pomožindža maje hem me te ovav e Jehovaso svedoko. Krstindžum man ko 26. maj 1951. berš, deš berš palo moklo prvo kontakt e Jehovase svedokonencar.

Ki amari tikni skupština ki diz Kvibek hine poviše pionirija nego li objaviteljija. Olengo šukar primer podstaknindža man hem me te ovav pioniri. Ked setinava man, tegani koristindžam samo i Biblija ki služba kotar čher ko čher. Sebepi so na hine amen literatura, morandiljam te sikljova te koristina i Biblija pošukar te šaj te branina o čačipe. Odolese trudindžum man te sikljovav e biblijake stihija. Ipak, but manuša na manglje te čitinen i Biblija ako na hine la dozvola aso štampanje kotar i Katoličko crkva.

Ko 1952. berš, ženindžum man jekha verno phenjaja, kotar mi skupština, koja vičindža pe Simon Patri. Selindžam amen ko Montreal, hem već aso jekh berš dobindžam jekha čhaja hem čhivdžam lako nav Liz. Iako angleder te ženina man čhinavdžum i pionirsko služba, mi romni hem me trudindžam amen te živina skromno te šaj pobuter te čera buti ki skupština.

Palo deš berš, počmindžum te razmislinav da li šaj palem te ovav pioniri. Ko 1962. berš, hijum le ko Seminar aso naimenovana phralja kova trajindža jekh masek ko Betel, ki Kanada. Mancar ki soba hine o phral Kamil Uelet. Iako odova phral hine porodično manuš, ov hine but revno ki služba. Oleso primer ačhavdža baro utisak upro mande. Ko odova vreme, na hine but phralja kola hine len čhave hem kola ujedno hine o pionirija. Ama, o phral Kamil hine le baš odova cilj. Sa odova vreme dži hijam le zajedno ov ohrabrindža man te razmislinav kotar me okolnostija. Palo samo nekobor masek, haljiljum so šaj palem te ovav stalno pioniri. Disave mislindže so na andžum i mudro odluka, ama me ipak uljum pionir. Hijum le uverimo so o Jehova ka blagoslovini mo trud ki služba.

IRINDŽAM AMEN KO KVIBEK, AMA SAR SPECIJALNA PIONIRIJA

Ko 1964. berš, mi romni hem me hijam le naimenujime sar specijalna pionirija ki diz Kvibek, ko than kuri bariljam. Odothe služindžam nekobor berš. Iako ko odova vreme, o protivljenje na hine odobor baro sar angleder, ipak pana hine amen protivljenje.

Jekh subota popodne, dolindža man i policija ko Sent Mari, jekh tikni diz koja hine paše uzo Kvibek. O policajco ljegardža man ki policija hem phanlja man ko zatvor, sose propovedindžum kotar čher ko čher bizi dozvola. O sudija kova čerdža ko mo slučaj vičindža pe Bajaržon, lestar o manuša darandilje. Ov pučlja man ko ka ovel mo advokati. Ked mothovdžum lese so odova tano o Glen Hau,a amaro phral kova hine pendžarutno advokati, o sudija samo phendža: „Na, samo na ov!“ Olesi reakcija hine očekivano sose amaro phral hine pendžarutno sar advokati kova uspešno branini amare phraljen. Hem čače hine adžahar. O sud sigate obavestindža man so o optužbe protiv mande više na postojinena.

Sebepi o protivljenje ko Kvibek, hine but pharo te arakha than kova ka iznajmina te bi čeraja amare sastankija. Jedino so uspindžam te arakha tani jekh purani garaža ki koja na hine grejanje. Te bi barem hari tačareja la prekalo jevend, o phralja koristindže i peć ko lož ulje. Svako puti, amen bi avaja nekobor satija angleder hem bi čedaja amen uzi odija peć te bi vačeraja jekh jekhese amare ohrabrujuća iskustvija.

But tano šukar so šaj te dikha kobor amaro delo napredujindža palo nekobor berš. Ki 1960-ta berša ki diz Kvibek, ki regija Kot Nor hem ko poluostrvo Gaspe hine samo nekobor tikne skupštine. Avdije ko odola thana isi pherdo phralja kola čedena pe ko but šuže dvorane.

POZIV ASI POKRAJINSKO SLUŽBA

Mi romni Simon hem me hijam le vičime ki pokrajinsko služba ko 1970. berš. Palo trin berš, hijum le naimenimo sar oblasno nadgledniko. Ko odola berša, sikljiljum but kotar iskusna phralja sar soj tane o Lorije Somurb hem o Dejvid Splejn,c kola tegani hine pokrajinska nadglednikija. Palo svako kongres, o Dejvid hem me vačerdžam ando odova sar te poboljšina amen ko amaro poučavanje. Setina man ked jekh puti o Dejvid phendža maje: „Mo phral Leons, uživindžum ko to zaključno govor. Hine šukar, ama me bi čerava trin govorija kotar odova materijali.“ Hine man odija navika te čhivav but informacije ko me govorija. Valjandžum te ovav pojednostavno.

O oblasno nadgledniko hine le zaduženje te posetini e pokrajinsko nadglednikon te bi ohrabrini len. Ama, but objaviteljija ando Kvibek but šukar džandže man. Odolese, ked bi avava ki poseta ko pokrajinsko nadgledniko, on manglje te džan mancar ki služba. Iako uvek uživindžum olencar ki služba, na hine man vreme te ovav odole pokrajinsko nadglednikoja. Ki jekh situacija, o pokrajinsko nadglednik podsetindža man ko ljubazno način: „Šukar tano so provodineja vreme te phraljencar, ama ma bistre so aljan man te posetine. Hem maje valjani ohrabrenje.“ Akava ljubazno savet pomožindža maje te ovav uravnoteženo.

Nažalost, ko 1976. berš, desindža pe maje jekh bari tragedija. Mi mangli romni, i Simon but naborsali hem ko krajo mulji. But mangljum la sose oj manglja e Jehova hem hine samopožrtvovano. Ama, odova so hine man but buti ki služba, pomožindža maje te nakhav odova pharipe hem zahvalno hijum e Jehovase sose hine uzalo mande ko odola phare trenutkija. Palo odova, ženindžum man jekha revno phenjaja koja vičini pe Kerolin Eliot. Oj hine pionir koja vačerdža i englesko čhib hem koja alji ko Kvibek te bi služini ko than kuri isi potreba. I Kerolin hine pristupačno phen, koja but brinindža pe averendar, pogotovo okolendar kola tane ladžutne hem usamljena. But značindža maje olaki podrška ki amari putujućo služba.

BUT VAŽNO BERŠ

Ko januar 1978. berš, dobindžum zaduženje te ovav instruktori ko prvo razred andi pionirsko škola, ko Kvibek. Hine man bari trema sose niked na dželjum ki odija škola hem sa odova hine maje diso nevo. Osetindžum man sar polazniko. Ama, ko odova prvo razred hine but iskusna pionirija. Iako me hijum le instruktor but sikljiljum olendar.

Palo odova, ko 1978. berš, ko olimpijsko stadion ko Montreal, hine ičerdo o međunarodni kongres e temaja „I vera koja pobedini“. Ko odova kongres hine prekalo 80 000 manuša. Odova hine najbaro kongres kova ičerdža pe ko Kvibek. Moklo zaduženje hine te odgovorinav ko pučiba kola o novinarija hine len kotar amaro kongres. Ko odova kongres alje but novinarija hem me vačerdžum olencar. Hijum le oduševimo sa e bučencar kola pisindže ja vačerdže amendar. Pobuter ando 20 satija ki televizija hem ko razna radio stanice vačerdža pe ando amaro kongres. Ko novine ikljilje stotine člankija amendar. Sare dobindže but šukar svedočanstvo.

NEVO ZADUŽENJE

Doživindžum jekh bari promena ko 1996. berš. Sar krstisaljum služindžum ko Kvibek, ko područje kuri vačerdža pe francusko čhib. Ama, palo odova dobindžum zaduženje te džav ko Toronto, ko područje kuri vačeri pe englesko čhib. Osetindžum so na hijum odobor sposobno te čerav odija buti hem darandiljum sar ka ičerav govorija ki englesko čhib, sose na džandžum odobor šukar te vačerav engleski. Te šaj te čerav odova morandiljum često te molinav man e Jehovase hem potpuno te osloninav man upro leste.

Ked setinava man, šaj te phenav so uživindžum odola duj berša dži služindžum ko Toronto. Mi romni, i Kerolin strpljivo pomožindža man pošukar te sikljovav i englesko čhib. Ama, hem o phralja hine maje bari podrška hem baro ohrabrenje. But sigate hine amen but neve amala.

Iako hine man but obaveze angleder o pokrajinsko sastanko, na hine maje pharo te džav ki služba kotar čher ko čher jekh sati ko petak popodne. Možda pučena tumen: „Sose džala ki služba jekh dive angleder o pokrajinsko sastanko ked isi le but obaveze?“ Ama, maje odova but značindža sose ki služba hine man but šuže razgovorija kola ohrabrindže man. Hem akana, uvek osetinava man pobahtalo pali služba.

Kotar 1998. berš, i Kerolin hem me služinaja ko Montreal sar specijalna pionirija. Beršencar, mi buti hine te organizujinav o propovednička akcije. Isto adžahar, hine man saradnja e medijencar hem amaro cilj hine te pomožina e manušendže te na ovel len predrasude premalo e Jehovase svedokija. Mi romni hem me akana propovedinaja e manušendže kola akana sigende alje ki Kanada. But olendar mangena pobuter te džanen kotar i Biblija.

Ked akana razmislinava kotar 68 berš ko kola služindžum e Jehovase, osetinava so o Jehova čače blagoslovindža man. Iako ko početko na hine maje lokho, but hijum bahtalo so sikljiljum te uživinav ki služba hem te pomožinav bute manušendže te pendžaren o čačipe. Mi čhaj hem mo džamutro počmindže te služinen sar stalna pionirija ked barilje olenge čhave. But hijum bahtalo ked dikhava so mi čhaj tani odobor revno asi služba. Posebno hijum zahvalno e phraljendže kola mothovdže maje šukar primer hem dindže man mudra savetija. Sa odova but pomožindža maje te ovav duhovno zrelo manuš hem te čerav razna zaduženja kola dobindžum ki e Jehovasi organizacija. Dikhljum so sa odova na bi uspinaja ked ne bi ovel amen o moćno e Jehovaso sveti duh kova pomožindža amendže (Ps. 51:11). Hem avdije hijum zahvalno e Jehovase so dindža man odija bari čast te hvalinav oleso nav (Ps. 54:6).