Pučiba ando čitaocija

Da li o „plod ando duho“ uključini samo o osobine kola pominena pe ko Galatima 5:22, 23?

Akala stihija vačerena ando enja hrišćanska osobine: „A o plod ando duho tano: mangipe, radost, mir, strpljenje, ljubaznost, šukaripe, vera, blagost, samokontrola. Protiv asavke buča nane nijekh zakon.“ Ama, akala nane jedina šuže osobine kola e Devleso duho pomožini amen te razvijina.

Sar džanaja odova? O apostol Pavle angleder te pomini o plod ando duho, pisindža: „A o delija ando telo... tane: blud, melalipe, grešna postupkija čerde bizi ladž, idolopoklonstvo, vračanje, neprijateljstvo, svađe, ljubomora, pištibe, prepirke, podele, sekte, zavist, matibe, razuzdana zabave hem slično“ (Gal. 5:19-21). O Pavle šajindža te vačeri pana disave buča sar soj tane okola kola tane opisujime ko Kološanima 3:5. Slično odoleja, palo odova so nabrojindža o enja šukar osobine, ov phendža: „Protiv asavke buča nane nijekh zakon.“ O Pavle na pomindža sa o šukar osobine kola šaj te razvijina odolese so isi amen pomoć ando sveti duh.

Odova šaj te dikha ked uporedinaja akala osobine odoleja so o Pavle pisindža e skupštinače ko Efes: „O plod andi svetlost bijani svako vrsta ando šukaripe, andi pravednost hem ando čačipe“ (Ef. 5:8, 9). O „šukaripe“, i pravednost hem o čačipe tane „plod andi svetlost“, ama isto adžahar tane hem „o plod ando duho.“

Isto adžahar, o Pavle podstaknindža e Timoteje te razvijini „pravednost, odanost premalo Devel, vera, mangipe, istrajnost hem blagost“ – šov šukar osobine (1. Tim. 6:11). Samo trin ando akala osobine – i vera, o mangipe hem i blagost tane spomenime sar „plod ando duh.“ Ama, o Timotej valjandža te razvijini hem avera osobine sar soj tane pravednost, odanost premalo Devel hem istrajnost. Ov džandža so ka valjani lese i pomoć ando sveti duh te šaj te razvijini akala osobine (Uporedin e stihonencar ando Kološanima 3:12; 2. Petrova 1:5-7).

Šaj te phena so o osobine kolendar vačeri pe ko Galatima 5:22, 23 nane jedina kola valjani te razvijina. E Devleso sveti duh šaj te pomožini amen te razvijina odola enja osobine kola tane spomenime sar „plod ando duho.“ Ama, isi pana osobine kola valjani te razvijina te šaj te ova zrela hrišćanija hem te šaj te urava „i nevi ličnost koja tani čerdi premali e Devlesi volja, ki čačutni pravednost hem ki vernost“ (Ef. 4:24).