Ked neko kas mangaja aćhavi e Jehova

1. Sar šaj neko te osetini pe ked neko andi olesi porodica ovela isključimo?

DA LI tano neko andi ti porodica isključimo? Ako tano ađahar, đanaja so odova but dukhala tut. Amari phen koja vićini pe Hilda,b phenela: „Me hem mo rom hijam le 41 berš zajedno. Ked ov mulo, mislinđum so odova tano diso najpharo so desinđa pe maje ko životi. Ama, ked mo ćhavo, mi bori hem olenge ćhave aćhavđe e Jehova, mo vilo phađilo.“

2-3. Premalo Psalam 78:40, 41, sar o Jehova osetini pe ked neko ando olese sluge irini lese po dumo?

² Zamislin samo kobor e Jehovase hine pharo ked disave anđelija irinđe lese po dumo (Jud. 6). Isto ađahar, zamislin sar hine lese ked o Izraelcija but putija buninđe pe protiv oleste. (Čitin Psalam 78:40, 41.) Ov sigurno so te nebesko Dade dukhala ked neko kas mangeja aćhavi le. Ov haljola ti dukh. Odolese, ov dela po lafi so ka pomožini tut hem so ka ohrabrini tut.

³ Ko akava članko ka dikha, so valjani te ćera te šaj o Jehova te pomožini amen ked neko andi amari porodica tano isključimo. Isto ađahar, ka dikha sar šaj te pomožina averenđe ki skupština ked neko andi olengi porodica tano isključimo. Najangleder, te dikha sar na valjani te razmislina.

MA KRIVIN KOKRI TUT

4. Sar but roditeljija osetinena pe ked olenge ćhave aćhavena e Jehova?

⁴ Ked o ćhavo ja i ćhaj aćhavi e Jehova, but putija o roditeljija mislinena so valjanđe te ćeren diso pobuter te pomožinen pe ćhavenđe te aćhon ko ćaćipe. Ked oleso ćhavo hine isključimo, amaro phral o Luka phenđa: „Krivinđum kokri man. But putija naštinđum te sovav sebepi odova. Disavo puti runđum hem mo vilo dukhandilo.“ I Elizabeta, amari phen kaso ćhavo tano isključimo, phenela: „Pućljum man kaj pogrešinđum. Mislinđum so na sikavđum le šukar.“

5. Koj tano odgovorno ked neko aćhavi e Jehova?

⁵ Amen na valjani te bistra so o Jehova svakonese amendar dinđa slobodno volja. Odova značini so svako amendar kokri odlučini da li ka šunel e Jehova ja na. Disave roditeljija na mothovđe šukar primer pe ćhavenđe. Ama, olenge ćhave odlučinđe te služinen e Jehovase hem te aćhon lese verna. Ki aver strana, disave roditeljija but šukar sikavđe pe ćhaven. Ama, o ćhave ipak odlučinđe te aćhaven e Jehova. Akava mothovi so svako amendar valjani kokri te odlučini da li ka služini e Jehovase (Is. Nav. 24:15). Ako hijen tužna sose tumaro ćhavo ja tumari ćhaj više na služini e Jehovase, ma mislinen so tumen hijen kriva sebepi odova.

6. Sar šaj o ćhave te osetinen pe ked neko ando olenge roditeljija više na služini e Jehovase?

⁶ Disavo puti, neko ando roditeljija šaj te aćhavi hem e Jehova hem pe porodica (Ps. 27:10). Odova šaj te ovel but pharo e ćhavenđe, sose o roditeljija hine lenđe but baro primer. I Estera, kaso dad hine isključimo, phenela: „But runđum sose mo dad na samo so durilo ando Jehova, već hem odlučinđa so više na mangela te služini olese. Mangava me dade. Odolese ked hine isključimo, stalno pućljum man sar tano olese. Čak, hine man panična napadija.“

7. So o Jehova osetini premalo terne kase neko ando roditeljija tano isključimo?

⁷ Ternalen, amenđe tano but žao ako neko ando tumare roditeljija tano isključimo. Oven sigurna so o Jehova đanela sar tano tumenđe. O Jehova but mangela svakone tumendar. Uzo odova, o Jehova hem te phralja hem te phenja tane but bahtale sose tu aćhiljan verno. Ma bistri, so tu na hijan odgovorno aso odova so te roditeljija ćerena. Sar so vaćerđam angleder, svako isi le pravo te odlučini da li ka služini e Jehovase ja na. Svako e Jehovaso sluga valjani kokri te „akhari po pharipe“ (Gal. 6:5, fusn.).

8. So šaj te ćere đi ađićereja te irini pe e Jehovase neko kas mangeja? (Isto ađahar, dikh o okvir „Irinen tumen e Jehovase.“)

⁸ Ked neko aćhavi e Jehova, tu na našaleja ti nada so jekh dive ka irini pe e Jehovase. Ama, đi tegani, so šaj te ćere? De sa tutar ti vera hem ponodri te ovel zorali. Ađahar, ka de šukar primer te porodicaće hem okolese kova tano isključimo. Isto ađahar, odova ka del tut snaga te izdržine odija dukh. Odolese, so šaj te ćere te šaj ti vera hem ponodri te ovel zorali?

SO ŠAJ TE ĆERE TE ŠAJ TI VERA HEM PONODRI TE OVEL ZORALI?

9. So šaj te ćere te šaj ti vera hem ponodri te ovel zorali? (Isto ađahar, dikh o okvir „O stihija kola šaj te utešinen tut.“)

⁹ Hem ponodri ćer o buća kola ka pomožinen tut te ovel tut zorali vera. Odova tano važno sose ađahar ka pomožine hem te porodicaće. Sar šaj te ćere odova? Svako dive čitin e Devleso Lafi hem hor razmislin ando odova so čitinđan. Isto ađahar, de sa tutar te ove redovno ko sastankija. Amari phen i Džoana, kaso dad hem i phen aćhavđe e Jehova, phenela: „Ked ki Biblija čitinava andi Avigeja, andi Jestira, ando Jov, ando Josif hem ando Isus, odova pomožini man te ovel man mir ko vilo. Olengo primer but ohrabrini man hem pomožini man hem ponodri te ovav bahtali. Isto ađahar, amare savremena đilja but ohrabrinena man.“

10. Sar o lafija ando Psalam 32:6-8 šaj te pomožinen tut ked hijan but tužno?

¹⁰ Vaćer e Jehovase sar osetineja tut. Ked hijan but tužno, ma ćhinav te moline tut e Jehovase. Rode ando Jehova te pomožini tut ki ti situacija te dikhe ađahar sar so ov dikhela hem „te pomožini tut te haljove o buća hem te sikavi tut kole drumoja valjani te đa.“ (Čitin Psalam 32:6-8.) Iako šaj te ovel pharo te phene e Jehovase sar ćaće osetineja tut, ov sigurno so ov haljola ti dukh. O Jehova but mangela tut hem odolese phenela tuće te phrave lese to vilo (Izl. 34:6; Ps. 62:7, 8).

11. Premalo Jevrejima 12:11, sose valjani te ovel amen poverenje upro Jehova? (Isto ađahar, dikh o okvir „O isključenje mothovi kobor o Jehova mangela amen.“)

¹¹ Podržin e starešinengi odluka. O isključenje tano način sar o Jehova mothovi po mangipe. Ađahar, ov pomožini okolese kova grešinđa, ama hem štitini celona skupština. (Čitin Jevrejima 12:11.) Ked tano neko isključimo, disave amare phralja hem phenja šaj te phenen so o starešine na anđe šukar odluka. Ama, ma bistri so on obično na mangena te phenen o lošna buća kola odija osoba ćerđa. Amen na đanaja sa so ulo. Odolese, mudro tano te ovel amen poverenje upro starešine, sose on ićerena pe ko e biblijake načelija hem sudinena „ko e Jehovaso anav“ (2. Let. 19:6).

12. Sose tano šukar te prihvatina i disciplina koja avela ando Jehova? Vaćer jekh primer.

¹² Ked podržinaja e starešinengi odluka, ađahar pomožinaja odola osobaće te irini pe e Jehovase. „Hine amenđe but pharo te na ovel amen nisavo kontakt amare ćhaveja“, phenela i Elizabeta, kolatar angleder vaćerđam. „Ama ked irinđa pe e Jehovase, ov phenđa so hine šukar odova so hine isključimo. Kasnije, ov kokri phenđa soj tano zahvalno aso buća kola sikljilo. Haljiljum so e Jehovasi disciplina tani uvek aso amaro šukaripe.“ Olako rom, o Mark, phenela: „Beršencar palo odova, amaro ćhavo phenđa maje so jekh ando razlogija sose irinđa pe e Jehovase tano sose na hijam le oleja ko nisavo kontakt. But hijum bahtalo so o Jehova pomožinđa amenđe te ova lese poslušna.“

13. Ko šaj te pomožini amen ked tano amenđe pharo?

¹³ Vaćer okolencar kola haljona sar osetineja tut. Družin tut e iskusno phralencar hem phenjencar kola ka pomožinen tut te na našale ti nada (Posl. 12:25; 17:17). I Džoana, kolatar angleder vaćerđam, phenela: „Hijum le but usamljeno. Ama, odova so vaćerđum me amalencar but pomožinđa man.“ Ama, so šaj te ćere ako neko vaćeri diso so dukhavi tut?

14. Sose valjani hem ponodri te „podnosina jekh jekhe hem ando vilo te oprostina jekh jekhese“?

¹⁴ Ov strpljivo te phralencar hem te phenjencar. Ma ađićer so svako ka đanel sar te reagujini hem so te phenel ki odija situacija (Jak. 3:2). Sare amen hijam nesavršena. Odolese, ma iznenadin tut ako neko na đanela so te phenel ja ako neko, iako odova na manglja, phenela diso so dukhala tut. Tegani, setin tut so o Pavle phenđa: „Podnosinen jekh jekhe hem ando vilo oprostinen jekh jekhese, čak hem ked neko uvredini tumen“ (Kol. 3:13). Amari phen, kaso rođako hine isključimo, phenela: „O Jehova pomožinđa man te oprostinav e phralenđe kola manglje te ohrabrinen man, ama umesto odova, pe lafencar but dukhavđe man.“ Sar šaj o phralja hem o phenja te pomožinen e porodicaće andi isključimi osoba?

SARE KI SKUPŠTINA ŠAJ TE POMOŽINEN

15. Sar šaj te pomožina e phralenđe hem e phenjenđe ako neko andi olengi porodica akana sigende hine isključimo?

¹⁵ Ov šukar premalo okola kola hem ponodri tane verna e Jehovase. Amari phen i Mirjam phenela so palo odova so olako phral hine isključimo, hine laće but pharo te đal ko sastankija. Oj phenela: „Darandiljum so ka phenen o manuša. Ama, ked resljum ki dvorana dikhljum so hem olenđe tano pharo sebepi odova so ulo. Niko olendar na vaćerđa diso lošno ando mo phral. Odolese, na morandiljum kokri te akharav mo pharipe.“ Jekh aver phen phenela: „Palo odova so amaro ćhavo hine isključimo, amare amala alje koro amende hem utešinđe amen. Disave olendar phenđe so na đanđe so te phenen maje. Ama, on runđe mancar hem pisinđe maje lila kola but ohrabrinđe man. Odova so on ćerđe dinđa man but bari snaga.“

16. Sar šaj avera ki skupština te pomožinen hem te ohrabrinen okolen kase tano neko isključimo?

¹⁶ Ohrabrin hem pomožin okolen kase neko tano isključimo. Posebno akana valjani te ohrabrine len hem te mothove lenđe so mangeja len (Jevr. 10:24, 25). Podijekh puti, disave phralja hem phenja ki skupština na vaćerena okolencar kase tano neko isključimo hem ponašinena pe premalo lende ka phene on tane isključime. Amen na mangaja amare phralja hem phenja te osetinen pe ađahar. Posebno valjani te pohvalina hem te ohrabrina e ternen kase roditeljija tane isključime. O rom andi amari phen, i Marija, hine isključimo hem ov mukhlja ola hem e ćhaven. Oj phenela: „O phralja hem o phenja but pomožinđe man. On alje koro amende, ćerđe amenđe habe hem pomožinđe maje te proučinav me ćhavencar. Mi dukh hine hem olengi dukh hem but putija runđe mancar. Ked avera vaćerđe lošno mandar, on braninđe man. On ćaće but ohrabrinđe man“ (Rimlj. 12:13, 15).

17. Sar šaj o starešine te utešinen okolen kase tano neko isključimo?

¹⁷ Tumen phraljalen, kola služinena sar starešine, koristinen svako prilika te ohrabrinen okolen kase tano neko isključimo. Odija tani tumari odgovornost (1. Sol. 5:14). Odova šaj te ćeren ako vaćerena olencar angleder hem palo sastanko. Posetinen len hem molinen tumen olencar. Vićinen len te đan tumencar ki služba ja te aven ko tumaro porodično proučibe. O starešine valjani te mothoven so brininena pe ando okola kola tane ko pharipa, so mangena len hem so haljona len (1. Sol. 2:7, 8).

MA NAŠAL TI NADA HEM ARAKH TO POUZDANJE UPRO JEHOVA

18. Premali 2. Petrova 3:9, so o Devel mangela te ćeren okola kola grešinđe lese?

¹⁸ O Jehova „na mangela nijekh te merel, nego sare te pokajinen pe.“ (Čitin 2. Petrova 3:9.) Iako neko ćerđa greh, oleso životi tano hem ponodri vredno anglo e Jehovase jaćha. Ma bistri so o Jehova but skupo platinđa amen. Ov dinđa pe Ćhave te šaj te ova oslobodime ando greh hem ando meribe. O Jehova mangela te pomožini okolenđe kola aćhavđe le te irinen pe olese. Kotar e Isuseso poređenje ando našaldo ćhavo sikljovaja so o Jehova na našali pi nada so jekh dive on ka irinen pe olese (Luka 15:11-32). But phralja hem phenja kasnije irinđe pe e Jehovase. O phralja hem o phenja jedva ađićerđe on te irinen pe hem hine but bahtale ked odova ćerđe. Amari phen i Elizabeta, kolatar angleder vaćerđam, hine but bahtali ked olako ćhavo irinđa pe. Ked setini pe ko odova vreme, oj phenela: „But hijum zahvalno e phralenđe hem e phenjenđe kola pomožinđe maje te na našalav mi nada.“

19. Sose šaj te ova sigurna so o Jehova uvek ka pomožini amen?

¹⁹ Šaj te ova sigurna so o Jehova uvek ka pomožini amen. Olese savetija niked na ka povredinen amen. Ov tano amaro Dad kova tano phravde vasteso, kova haljola amen hem but mangela amen. Ov sigurno so o Jehova na ka aćhavi tut ked tano tuće pharo (Jevr. 13:5, 6). Amaro phral o Mark, kolestar angleder vaćerđam, phenela: „O Jehova niked na aćhavđa amen. Ked tano amenđe pharo, ov nane dur amendar. O Jehova hem ponodri ka del tut but bari snaga“ (2. Kor. 4:7). Ked neko kas mangeja aćhavi e Jehova, ov sigurno so o Jehova ka pomožini tut te aćhove verno hem te na našale ti nada.