Ternalen – napredujinen hem palo krštenje

1. Kola šukar buća ćerđe but terne angleder te krstinen pe?

SVAKO berš, krstinena pe nekobor hiljade terne. Da li hem tu akana sigende krstinđan tut? Ako ja, tegani sigurno te phralja hem te phenja but radujinđe pe, ama najviše o Jehova (Posl. 27:11). Razmislin so sa ćerđan angleder o krštenje. Šaj nekobor berš proučinđan i Biblija. Đi proučinđan, uverinđan tut soj tani oj e Devleso Lafi. Počminđan te upoznajine e Jehova hem te mange le. To mangipe premalo Jehova odobor barilo, so odlučinđan te predajine to životi olese hem te krstine tut. Ćaće, đi akana ćerđan but šukar buća.

2. Sostar ka vaćera ko akava članko?

² Angleder te krstine tut, sigurno hine tut disave kušnje sebepi kola hine tuće pharo te aćhove verno e Jehovase. Ama, sar đala o vreme, ka ovel tut avera kušnje. O Satana ka trudini pe ko sa o načinija te ćhinavi tut te mange e Jehova hem te služine olese (Ef. 4:14). Ama, tu ma mukh le te ćerel odova. So šaj te pomožini tuće te aćhove verno e Jehovase? Valjani te de sa tutar te ove zrelo hrišćanin (Jevr. 6:1). Ama, sar šaj te ćere odova?

SO ŠAJ TE ĆERE TE OVE ZRELO?

3. So valjani te ćera palo krštenje?

³ Palo krštenje, sare amen valjani te ićera amen ko savet kova o apostol Pavle dinđa e hrišćanenđe ko Efes. Ov podstakninđa len te oven zrela hrišćanija (Ef. 4:13). Odova značinđa so valjanđe te napredujinen. O Pavle uporedinđa o napredak ando jekh hrišćanin odoleja sar jekh ćhavoro barjola. Ked jekh beba bijanđola, o roditeljija tane but bahtale, but mangena la hem ponosna tane upro late. Ama, oj našti zauvek te aćhol beba. Sar đala o vreme, odova ćhavoro valjani te fordel odova „soj tano ćhavorikano“ (1. Kor. 13:11). Isto tano hem amencar. Palo odova so krstinđam amen, valjani hem ponodri te napredujina. Akana ka dikha sar šaj te ćera odova.

4. So šaj te pomožini tut duhovno te napredujine? Objasnin. (Filipljanima 1:9)

⁴ Nek to mangipe premalo Jehova ovela sa pobaro. Tu već akana but mangeja e Jehova. Ama, to mangipe šaj te ovel pana pobaro. Sar? Ko Filipljanima 1:9 o apostol Pavle pominđa jekh način sar šaj te ćere odova. (Čitin.) Ov molinđa pe odole phralengo „mangipe te ovel sa pobaro hem pobaro.“ Sar šaj amaro mangipe te ovel pana pobaro? Valjani te trudina amen „pana pošukar te penđara e Devlesi volja hem te ovel amen pana pobari razboritost.“ So pobuter penđaraja e Jehova, pana pobuter mangaja le, ceninaja olese osobine hem odova so ćerela. Tegani, amari želja te radujina e Jehovaso vilo ovela sa pobari hem niked na mangaja te razočarina le. Amen daja sa amender te haljova so o Jehova rodela amendar hem trudinaja amen te ćera odova.

5-6. Sar šaj amaro mangipe premalo Jehova te ovel pana pobaro? Objasnin.

⁵ O Isus savršeno oponašinđa pe Dade. Odolese, so pobuter upoznajinaja e Isuse pana pobuter ka manga e Jehova (Jevr. 1:3). Najšukar način te upoznajina e Isuse tano te čitina o jevanđelja. Ako nane tut navika te čitine i Biblija svako dive, sose na bi počmineja akana? Đi čitineja o izveštaja ando Isus, posebno obratin pažnja ko olese osobine. Na primer, ka dikhe so ov hine pristupačno hem so but manglja e ćhavoren, čak ićerđa len ki angalja (Mar. 10:13-16). O Isus hine šukar manuš hem šukar amal. Odolese, olese učenikija na darandilje te vaćeren lese sar osetinena pe (Mat. 16:22). Ov but šukar oponašinđa pe Dade, sebepi odova amen đanaja so o Jehova tano pristupačno. Odolese, šaj te molina amen e Jehovase hem te phrava lese amaro vilo. Amen hijam uverime, so god te phena lese ki molitva, ov na ka osudini amen. Ov mangela amen hem brinini pe amendar (1. Petr. 5:7).

⁶ O Isus mothovđa saosećanje premalo manuša. O apostol Matej pisinđa: „Ked dikhlja bute manušen, sažalinđa pe upro lende, sose hine mučime hem našalde sar o bakre bizo pastiri“ (Mat. 9:36). A sar o Jehova osetinđa pe? O Isus phenđa: „Ni mo Dad kova tano ko nebo na mangela nijekh kotar akala tikne te našalđol“ (Mat. 18:14). Akala lafija tane but utešna, odolese so mothovena amenđe kobor o Jehova mangela amen. Ćaće, so pošukar upoznajinaja e Isuse, amaro mangipe premalo Jehova ovela pana pobaro.

7. Sar šaj te pomožini tuće odova so ka družine tut e zrelo phralencar hem phenjencar?

⁷ Ked družineja tut e zrelo phralencar hem e phenjencar, šaj te sikljove sar pana pobuter te mothove mangipe hem te ove zrelo. Tu ka dikhe kobor tane bahtale hem so on na kajinena pe so odlučinđe te služinen e Jehovase. Puć len savo iskustvo isi len e Jehovaja. Ked valjani te ane disavi važno odluka, rode olendar savet. Ma bistri so „ked isi but savetnikija sa ka ovel šukar“ (Posl. 11:14).

8. So šaj te ćere ako sumnjineja ko diso so pisini ki Biblija?

⁸ Cide tutar o sumnje. Sar so hine phendo ko dujto odlomko, o Satana ka trudini pe ko sa o načinija te ćhinavi tut te mange e Jehova hem te služine olese. Jekh način sar ćerela odova tano ađahar so ćhivela amen te sumnjina ko odova so pisini ki Biblija. Na primer, disave manuša šaj ka pokušinen te ubedinen tut so o Devel na postojini hem so amen uljam prekali evolucija. Đi hijan le tikno, šaj na razmislinđan odolestar. Ama, sar barjoveja, šaj ka počmine te sikljove andi evolucija ki škola hem odova so vaćerena te nastavnikija šaj ka izgledini tuće logično. Ama, on šaj niked na rodinđe dokazija da li postojini o Stvoritelj. Ma bistri o načelo ando Poslovice 18:17: „Ko prvo vaćeri ki parnica, dićhola pravedno, sa đi na avela aver te rodel lestar te dokažini odova so phenđa.“ Odolese, umesto te verujine ko sa so sikljoveja ki škola, trudin tut pažljivo te istražine so i Biblija phenela odolestar. Istražin andi evolucija ko amare publikacije. Vaćer e phralencar hem e phenjencar kola angleder verujinđe ki evolucija hem puć len so uverinđa len so postojini o Stvoritelj. Odova ka pomožini tuće te arakhe dokazija so ćaće isi Devel.

9. So sikljoveja andi Melisa?

⁹ Amare phenjaće e Melisaće,b but pomožinđa odova so istražinđa ando stvaranje. Oj phenela: „Ki škola, o nastavnikija hine but uverljiva đi vaćerđe andi evolucija. Ki početka, na mangljum te istražinav ništa andi evolucija, sose darandiljum so ka uverinav man soj tani tačno. Ama, haljiljum so o Jehova mangela te ovel amen dokazija aso odova ko so verujinaja. Odolese, počminđum te istražinav. Čitinđum i knjiga Postoji li Stvoritelj kome je stalo do tebe? hem o brošure Da li je život nastao stvaranjem? hem Poreklo života – pet pitanja koja zaslužuju odgovor. Baš odova valjanđa maje, ama but maje žao so na počminđum angleder te istražinav odolestar.“

10-11. So šaj te pomožini tuće te aćhove čisto anglo Jehovase jaćha? (1. Solunjanima 4:3, 4)

¹⁰ Cide tut ando pogrešna želje. Ked hijan tinejdžer, te seksualna želje tane but bare hem šaj avera te pheren ti godi te ćere nemoral. O Beng mangela te ćhivel tut te ćere odova. Ama, so šaj te pomožini tut te aćhove čisto anglo Jehovase jaćha? (Čitin 1. Solunjanima 4:3, 4.) Molin tut e Jehovase, vaćer lese sar ćaće osetineja tut hem rode olestar te pomožini tut te aćhove zoralo (Mat. 6:13). Ma bistri so o Jehova mangela te pomožini tuće, a na te osudini tut (Ps. 103:13, 14). Isto ađahar, e Devleso Lafi šaj but te pomožini tuće. I Melisa, kolatar angleder vaćerđam, borinđa pe odoleja so hine la nemoralna mislija. Oj phenela: „Odova so svako dive čitinđum e Devleso Lafi pomožinđa man te borinav man protiv me pogrešna želje. Odova setinćerđa man so pripadinava e Jehovase hem so mangava te služinav lese“ (Ps. 119:9).

¹¹ Ma mislin so šaj kokri te rešine te problemija. Vaćer te dadese hem te dajaće sova borineja tut. Iako na ka ovel tuće lokho te phrave tut, but tano važno te ćere odova. I Melisa phenela: „Molinđum man e Jehovase te del man hrabrost hem đeljum te vaćerav me dadeja ando mo problemi. Palo odova, osetinđum man but šukar. Đanđum so o Jehova tano ponosno upro mande.“

12. Sar šaj te ane šukar odluke?

¹² Sikljov te ićere tut ko načelija andi Biblija. Sar barjoveja, to dad hem ti daj šaj ka den tut sloboda te ane disave odluke. Ama, ma bistri so tu na đaneja sa. So šaj te pomožini tuće te na ane disavi odluka koja ka rumini to amalipe e Jehovaja? (Posl. 22:3). Amari phen i Kari phenela so olaće pomožinđa te anel šukar odluke. Oj haljilji so ako hijan zrelo, tegani na valjani tuće pravilo asi svako situacija. Oj phenela: „Valjanđum te haljovav o načelija andi Biblija, a na o pravilija.“ Odolese, ked čitineja i Biblija, puć kokri tut: „Sar šaj, akava so čitinđum, te pomožini man te haljovav sar o Jehova razmislini? Da li ko akala stihija isi disavo načelo kova ka pomožini man te ćerav odova soj tano šukar? Ako ja, tegani sar šaj odova te pomožini maje?“ (Ps. 19:7; Is. 48:17, 18). Ked čitineja i Biblija hem hor razmislineja odolestar so čitinđan, odova šaj te pomožini tuće te ane odluke kola ka radujinen e Jehova. Sar napredujineja, ka dikhe so na valjani tuće pravilo asi svako situacija, sose ka haljove sar o Jehova dikhela ki disavi buti.

13. Sar šaj te pomožinen amen o šukar amala? (Poslovice 13:20)

¹³ Birin amalen kola mangena e Jehova. Sar so vaćerđam angleder, o šukar amala šaj te pomožinen tut te ove zrelo. (Čitin Poslovice 13:20.) Amari phen i Sara jekh vreme našalđa pi radost. Ama, olake amala andi skupština pomožinđe laće palem te ovel radosno. I Sara phenela: „Ko pravo vreme arakhljum maje šukar amalen. Jekha phenjaja zajedno spreminđam i Stražarsko kula, a jekh aver phen pomožinđa man te počminav te komentarišinav. Sebepi odova, haljiljum kobor tano važno te ovel man mo lično proučibe hem te molinav man. Odova pomožinđa man te ovav pana popaše e Jehovaja hem palem te ovav radosno.“

14. Sar o Džulijen arakhlja pese šukar amalen?

¹⁴ Sar šaj te ovel tut amala kola šukar ka utičinen upro tute? O Džulijen, kova akana služini sar starešina, phenela: „Ked hijum le terno, o phralja kasa đeljum ki služba ulje maje šukar amala. On hine but revna hem pomožinđe man te haljovav so hem me šaj te uživinav ki služba. Odolese, ćhivđum maje cilj te služinav sar stalno pioniri. Angleder, rodinđum amalen maškaro okola kola hine me berša hem odolese na hine man but amala. Kasnije, arakhljum šukar amalen hem ko Betel. On pomožinđe man mudro te birinav mi zabava hem te ovav pana popaše e Jehovaja.“

15. Ko so o Pavle upozorinđa e Timoteje? (2. Timoteju 2:20-22)

¹⁵ Ama, so ako dikheja so neko ki skupština nane tuće šukar društvo? O Pavle đanđa so disave hrišćanija ko prvo veko na živinđe ađahar sar so o Jehova mangela. Odolese phenđa e Timotejese te cidel pe olendar. (Čitin 2. Timoteju 2:20-22.) Amaro amalipe e Jehovaja tano amenđe but dragoceno. Amen but trudinđam amen o Jehova te ovel amaro amal. Odolese, na valjani nikase hem nisose te mukha te rumini odova amalipe (Ps. 26:4).

SAR ŠAJ O CILJIJA TE POMOŽINEN TUT TE NAPREDUJINE?

16. Save ciljija šaj te ćhive tuće?

¹⁶ Ćhiv tuće korisna ciljija. Ćhiv tuće ciljija kola ka zorjaćeren ti vera hem ka pomožinen tut te ove pana pozrelo (Ef. 3:16). Jekh ando ciljija šaj te ovel redovno te čitine hem te proučine i Biblija (Ps. 1:2, 3). Isto ađahar, šaj redovno te moline tut hem te phrave e Jehovase to vilo. Ja šaj valjani pana pobuter te pazine savi zabava ka birine hem kuri ka đal to vreme (Ef. 5:15, 16). Ked deja sa tutar te napredujine, o Jehova tano but bahtalo.

17. Sar odova so pomožineja averenđe šaj te pomožini tuće?

¹⁷ Ked pomožineja averenđe, tu oveja pana pozrelo. O Isus phenđa: „Pobuter isi bahtalipe ked dela pe nego ked lela pe“ (Dela 20:35). Ako koristineja ti snaga hem to vreme te pomožine averenđe, odova ka ćerel tut te ove but bahtalo. Na primer, šaj te ćhive tuće cilj te pomožine e phurenđe hem okolenđe kola tane naborme ki ti skupština. Šaj te pazarine lenđe ja te sikave len sar te koristinen o elektronska uređaja. Ako hijan phral, šaj te ćhive tuće cilj te služine sar sluga pomoćnik, sose ađahar šaj pana pobuter te pomožine e phralenđe hem e phenjenđe (Fil. 2:4). Isto ađahar, ked propovedineja i šukar vest, ađahar mothoveja so mangeja e manušen (Mat. 9:36, 37). Odolese, ako šaj, sose na bi ćhiveja tuće cilj te ove ki punovremeno služba?

18. Sar šaj i punovremeno služba te pomožini tuće te napredujine?

¹⁸ I punovremeno služba šaj te pomožini tuće pana pobuter te napredujine. Ako služineja sar pioniri, šaj te phravđon tuće but udara. Na primer, šaj te đa ki Škola aso objaviteljija ando Kraljevstvo, šaj te služine ko Betel ja te učestvujine ko disave projektija ki gradnja. Amari phen i Kejtlin isi la 21 berš hem služini sar pioniri. Oj phenela: „Odova so đeljum ki služba e iskusno phralencar hem phenjencar but pomožinđa man te napredujinav palo mo krštenje. On pomožinđe man pana pohor te proučinav e Devleso Lafi hem pana pošukar te ćerav mi služba.“

19. Kola blagoslovija ka ovel tut ako hem ponodri deja sa tutar te napredujine?

¹⁹ Ako hem ponodri deja sa tutar te napredujine, o Jehova ka del tut bare blagoslovija. Ka dikhe so to ternipe na ka đal ko buća kola na vredinena (1. Jov. 2:17). Na ka osetine i dukh koja avela andi pogrešno odluka. Umesto odova, ka ove bahtalo hem ka uživine ko sa odova so ćereja (Posl. 16:3). To šukar primer ka ohrabrini sa e phralen hem e phenjen (1. Tim. 4:12). A odova soj tano najvažno, ka ovel tut mir hem ka ove zadovoljno sose đaneja so hijan paše e Jehovaja hem so ćereja le te ovel bahtalo (Posl. 23:15, 16).