„Zorjaćeren jekh jekhe“

1. Premali 1. Solunjanima 5:11, so sare amen ćeraja?

DA LI ko than kaj živineja gradinđa pe ili renovirinđa pe i dvorana? Ako ja, verovatno našti te bistre sar hine tuće ko prvo sastanko. Sigurno hijan le but zahvalno e Jehovase. Đi đilabđan i prvo đili, šaj čak khuvđa tut o rojbe. Amare dvorane dena hvala e Jehovase. Ama, amen šaj te hvalina e Jehova ked ćeraja hem jekh aver buti. A odija buti tani te izgradina ili te zorjaćera jekh jekhe. Odolestar o apostol Pavle pisinđa ki 1. Solunjanima 5:11. (Čitin.)

2. Sostar ka vaćera ko akava članko?

² O apostol Pavle tano but šukar primer, odolese so đanđa sar te zorjaćeri e phralen hem e phenjen. Ov haljilo len ked hine len problemija. Ko akava članko, ka dikha sar pomožinđa len (1) te istrajinen ko kušnje, (2) te oven ko mir jekh jekheja hem (3) te zorjaćeren pi vera ko Jehova. Isto ađahar, ka dikha sar šaj te oponašina le hem te zorjaćera jekh jekhe (1. Kor. 11:1).

O PAVLE POMOŽINĐA E PHRALENĐE TE ISTRAJINEN KO KUŠNJE

3. Sar o Pavle dikhlja ki buti hem ki služba?

³ O Pavle but manglja e phralen hem e phenjen. Ov šaj hine šukar te haljol len odolese so hem kokri hine le but bare problemija. Jekh puti, aćhilo bizo pare hem valjanđa te arakhi pese buti te šaj te izdržini pes hem pe amalen (Dela 20:34). Oleso zanati hine te ćerel šatorija. Ked reslja ko Korint, ov ćerđa buti e Akilaja hem e Priskilaja kola isto ćerđe šatorija. Ama „svako sabat“, ov propovedinđa e Judejcenđe hem e Grkonđe. Ked o Sila hem o Timotej alje koro leste, o Pavle „pana pobuter propovedinđa e Devleso lafi“ (Dela 18:2-5). Ov niked na bisterđa so i najvažno buti tani te služini e Jehovase. Sebepi so hine but bućarno, ov hine šukar primer hem šaj hine te ohrabrini e phralen hem e phenjen. Iako o hrišćanija hine len problemija hem valjanđe te brininen pe andi pi porodica, o Pavle setinćerđa len so na valjani te ćhinaven te ćeren o buća „kola tane ćaće važna“, te služinen e Jehovase (Fil. 1:10).

4. Sar o Pavle hem o Timotej pomožinđe e phralenđe ked hine len progonstvo?

⁴ Sigate palo odova so osnujinđa pe i skupština ko Solun, o phralja hem o phenja hine len baro progonstvo. Jekh grupa manuša andi odija diz manglje te astaren e Sila hem e Pavle. Ama, ked na arakhlje len, on „silaja legarđe disave phralen anglo dizjake poglavarija“ hem vićinđe: „Sare on buninena pe protiv e carese odredbe“ (Dela 17:6, 7). Šaj li te zamisline kobor darandilje o phralja hem o phenja ko Solun ked haljilje so disave manuša ki diz hine protiv olende? Sebepi odova, on šaj hine te našalen pi revnost. Ama, o Pavle na manglja te desini pe odova. Iako ov hem o Sila morandilje te ikljon andi diz, ov bićhalđa nekas ko ka brinini pe andi skupština. O Pavle e hrišćanenđe ko Solun phenđa: „Bićhalaja tumenđe amare phrale e Timoteje. . . te zorjaćeri tumen hem te utešini tumen te šaj tumari vera te ovel zorali. . . hem niko te na obeshrabrini pe sebepi odola nevolje“ (1. Sol. 3:2, 3). O Timotej verovatno doživinđa progonstvo ki pi diz, ki Listra. Ov tegani dikhlja sar o Pavle ohrabrinđa e phralen hem sar o Jehova pomožinđa e phralenđe ki Listra. Odolese šaj hine te zorjaćeri e phralen ki Solun hem te uverini len so o Jehova hem olenđe ka pomožini (Dela 14:8, 19-22; Jevr. 12:2).

5. Sar jekh starešina pomožinđa e phralese kova vićini pe Brajant?

⁵ Sar o Pavle pana pomožinđa e phralenđe? Ked palem đelje ki Listra, ki Ikonija hem ki Antiohija, o Pavle hem o Varnava ki „svako skupština ćhivđe lenđe starešinen“ (Dela 14:21-23). Odola starešine sigurno but ohrabrinđe e phralen. Isto odova ćerena hem o starešine avdije. Te dikha o iskustvo ando phral kova vićini pe Brajant. Ov phenela: „Ked hine man 15 berš, mo dad aćhavđa amen, a mi daj hine isključimi. Tegani, osetinđum man so hijum kokri hem hijum le but obeshrabrimo.“ So pomožinđa lese te istrajini? Ov phenela: „Jekh starešina kova vićini pe Toni izdvojinđa vreme te vaćeri mancar ko sastankija hem ko avera prilike. Ov vaćerđa maje ando phralja hem phenja, kola iako hine len problemija, ipak hine bahtale. Čitinđa maje o Psalam 27:10 hem često vaćerđam ando Jezekija, kova verno služinđa e Jehovase, iako oleso dad na hine lese šukar primer. Sar akava utičinđa upro Brajant? Ov phenela: „Odolese so o Toni ohrabrinđa man, me počminđum te služinav punovremeno.“ Phraljalen kola služinena sar starešine, oven spremna te pomožinen okolenđe kase valjani dijekh „šužo lafi“ hem ohrabrenje (Posl. 12:25).

6. Sar o Pavle ohrabrinđa e phralen hem e phenjen?

⁶ O Pavle setinćerđa e phralen so e Jehovase sluge ko purano vreme istrajinđe ko pharipa odolese so o Jehova dinđa len snaga (Jevr. 12:1). Ov haljilo so o primerija ando Devlese sluge kola angleder istrajinđe ko pharipa, šaj te ohrabrini e phralen hem e phenjen hem te pomožini lenđe te razmislinen kotar „diz ando đivdo Devel“ (Jevr. 12:22). Isto tano ađahar hem avdije. Sare amen hijam but ohrabrime ked čitinaja ando odova sar o Jehova pomožinđa e Gedeonese, e Varakese, e Davidese, e Samuelese hem avere pekle slugenđe (Jevr. 11:32-35). Isto ađahar, amen but ohrabrini hem o primerija ando phralja ko amaro vreme. But putija, ko amaro glavno sedište resena lila ko kola o phralja hem o phenja pisinena so but ohrabrini len ked čitinena averenge iskustvija.

O PAVLE POMOŽINĐA E PHRALENĐE TE OVEN KO MIR JEKH JEKHEJA

7. So sikljoveja ando Pavleso savet kova pisini ko Rimljanima 14:19-21?

⁷ Amen zorjaćeraja amare phralen hem phenjen, ked vaćeraja hem ćeraja odova so ka anel mir ki skupština. Svako amendar isi le različito mišljenje andi disavi buti. Ama, amen na mukhaja sebepi odova te ovel podele ki skupština. Na insistirinaja te ćeren pe o buća ko amaro način, ako odova mišljenje nane protiv disavo biblijako načelo. Razmislin ando jekh primer. Ki skupština ko Rim hine hrišćanija kola hine len jevrejsko poreklo, ama hine hem okola kola na hine len. Tegani, e Mojsijeso zakon više na važinđa. E Jehovase sluge više na valjanđe te pazinen savi hrana ka han (Mar. 7:19). Odolese disave hrišćanija kola hine len jevrejsko poreklo mislinđe so šaj te han svako vrsta andi hrana. Ama, avera hrišćanija na mislinđe ađahar. Sebepi odova, ki skupština hine podele. O Pavle istakninđa kobor tano važno te ovel len mir maškaro peste hem phenđa soj tano najšukar „te na hal pe mas hem te na pijel pe vino hem te na ćerel pe diso so šaj te spotaknini te phrale“ (Čitin Rimljanima 14:19-21.) O Pavle pomožinđa e phralenđe hem e phenjenđe te dikhen kobor bari šteta odova šaj te anel olenđe, ama hem celona skupštinaće. Isto ađahar, ov čak hine spremno te ćerel disave promene koro peste te na bi spotaknini averen (1. Kor. 9:19-22). Ako mangaja te ovel amen mir maškaro amende, na valjani te raspravina amen ando lična stavija.

8. So ćerđa o Pavle te šaj te arakhi o mir ki skupština?

⁸ Podijekh puti, ki skupština neko šaj te ovel le različito mišljenje andi disavi važno buti. O Pavle aćhavđa but šukar primer kobor tano važno te arakhi pe o mir ko asavke situacije. Na primer, ki skupština ko prvo veko, disave phenđe so o hrišćanija kola na hine len jevrejsko poreklo, valjani te obrezinen pe. On šaj odova phenđe te ne bi o Jevreja kritikujinena len (Gal. 6:12). O Pavle na složinđa pe odoleja. Ama, umesto te iznesini samo po mišljenje, ov hine ponizno hem rodinđa savet ando apostolija hem starešine ando Jerusalim (Dela 15:1, 2). Odolese so ađahar rešinđa akava problemi, ov pomožinđa e hrišćanenđe te ovel len mir hem radost ki skupština (Dela 15:30, 31).

9. Sar šaj te oponašina e Pavle?

⁹ Podijekh puti, ki skupština šaj te ovel disavo ozbiljno problemi. Tegani amen šaj te ćera mir ađahar so ka roda savet okolendar kas o Jehova ćhivđa te brininen pe andi skupština. But putija, ko amare publikacije ja ko smernice kola dela amari organizacija šaj te arakha načelija sar te rešina disave problemija. Ako ićeraja amen ko odola načelija, a na insistirinaja ko amaro mišljenje, amen ka ćera te ovel mir ki skupština.

10. So o Pavle pana ćerđa te šaj te ovel mir ki skupština?

¹⁰ Pana jekh način sar o Pavle ćerđa te ovel mir ki skupština tano ađahar so vaćerđa ando šukar, a na ando lošna osobine kotar phralja hem phenja. Na primer, ked pisinđa o lil e hrišćanenđe ko Rim, ov pominđa bute phralen hem phenjen ko anav hem pisinđa disave šukar buća olendar. Amen šaj te oponašina e Pavle ađahar so ka vaćera ando šukar osobine kotar amare phralja hem phenja. Ked ćeraja odova, amen zorjaćeraja amaro amalipe olencar hem barjaćeraja o mangipe maškaro amende.

11. Ked ikljola dijekh svađa, so šaj te ćera te šaj palem te ovel mir?

¹¹ Podijekh puti, o zrela hrišćanija šaj te na složinen pe jekh jekheja hem čak te avel đi i svađa. Odova desinđa pe e Pavlese hem e Varnavase. O Varnava manglja te len e Marko ko aver misionarsko putovanje, ama o Pavle na složinđa pe odoleja. Sebepi odova, but svađinđe pe hem razdvojinđe pe (Dela 15:37-39). Ama, o Pavle, o Varnava hem o Marko, kasnije pomirinđe pe hem ađahar mothovđe kobor tano lenđe važno o mir hem o jekhipe ki skupština. O Pavle kasnije vaćerđa šukar buća ando Varnava hem ando Marko (1. Kor. 9:6; Kol. 4:10). Isto ađahar, hem amen valjani te da sa amendar te rešina bilo savo problemi kova isi amen nekasa ki skupština hem te razmislina ando šukar osobine kola isi le. Ked ađahar ćeraja, amen mothovaja so mangaja te ovel mir hem jekhipe ki skupština (Ef. 4:3).

O PAVLE POMOŽINĐA E PHRALENĐE TE OVEL LEN PANA POZORALI VERA

12. Kola problemija isi len disave amare phralja hem phenja?

¹² Amen valjani te pomožina amare phralenđe hem phenjenđe te zorjaćeren pi vera ko Jehova. Disavenđe šaj marena muj olengi porodica, o kolege ki buti ja olenge amala ki škola. Avera šaj isi len disavo pharo nabormipe ja neko but povredinđa len. A disave tane već beršencar krstime hem samći dićhola lenđe so o kraj tano but dur. Sebepi akala buća, disavenđe šaj te ovel but pharo te aćhon verna e Jehovase. O hrišćanija ko prvo veko hine len slična problemija. Ama, sar o Pavle zorjaćerđa len?

13. Sar o Pavle pomožinđa okolenđe kase avera marđe muj?

¹³ O Pavle koristinđa e Devleso Lafi te šaj te zorjaćeri e phralengi hem e phenjengi vera. Na primer, šaj disave hrišćanija kola hine len jevrejsko poreklo na đanđe so te vaćeren nekase andi pi porodica kova phenđa so o judaizam tano pošukar ando hrišćanstvo. O lil kova o Pavle pisinđa e Jevrejenđe sigurno but zorjaćerđa len (Jevr. 1:5, 6; 2:2, 3; 9:24, 25). On šaj hine te koristinen odova so pisini ko odova lil te šaj te đanen so te odgovorinen lenđe. Avdije, hem amare phralenđe hem phenjenđe neko šaj te marel muj sebepi odova ko so verujinena. Amen šaj te pomožina len te koristinen amare publikacije te šaj te odgovorinen ko olenge pućiba. Ako odova desini pe amare ternenđe, amen šaj te pomožina lenđe te koristinen o brošure Da li je život nastao stvaranjem? hem Poreklo života – pet pitanja koja zaslužuju odgovor te šaj te odgovorinen lenđe sose verujinena soj tano sa stvorimo.

14. So o Pavle pana ćerđa uzo odova so propovedinđa?

¹⁴ O Pavle podstakninđa e phralen hem e phenjen te mothoven mangipe ađahar so ka ćeren „šukar delija“ (Jevr. 10:24). Ov pomožinđa lenđe na samo odoleja so vaćerđa, već hem odoleja so ćerđa. Na primer, ked ki Judeja hine baro bokhalipe, ov anđa e phralenđe disave buća kola valjanđe lenđe (Dela 11:27-30). Uzo odova so dinđa sa pestar te propovedini, o Pavle uvek razmislinđa hem sar šaj te pomožini okolenđe kase valjani materijalno pomoć (Gal. 2:10). Ađahar, ov zorjaćerđa e phralengi vera ko odova so o Jehova ka brinini pe olendar. Avdije, amen šaj te zorjaćera amare phralen ked koristinaja amaro vreme, snaga hem sposobnostija te pomožina len ked isi disave prirodna katastrofe. Isto ađahar, šaj te ćera odova ked daja amare dobrovoljna prilogija. Ađahar pomožinaja amare phralenđe hem phenjenđe te ovel len pana pobaro poverenje upro Jehova so niked na ka aćhavi len.

15-16. Sar šaj te pomožina okolenđe kasi vera tani slabo?

¹⁵ O Pavle na vazdinđa pe vasta okolendar kasi vera hine slabo. Ov hine saosećajno premalo lende hem vaćerđa olencar ko šukar način (Jevr. 6:9; 10:39). Na primer, ko lil kova pisinđa e Jevrejenđe, ov but putija koristinđa o lafi „amen“. Ađahar mothovđa so hem ov valjani te ićeri pe ko odova so pisinđa (Jevr. 2:1, 3). Sar o Pavle, hem amen na valjani te vazda amare vasta okolendar kasi vera tani slabo. Odolese, valjani te zorjaćera len hem te mothova lenđe so brininaja amen olendar. Ađahar ka mothova lenđe amaro mangipe. Đi vaćeraja olencar, valjani te pazina ko ton ando amaro glaso, sose mangaja amare lafencar te ohrabrina len.

¹⁶ O Pavle uverinđa e phralen hem e phenjen so o Jehova na bisterđa odova so on angleder ćerđe (Jevr. 10:32-34). Amen šaj te ćera diso slično ked pomožinaja nekase kasi vera tani slabo. Na primer, šaj te puća le sar upoznajinđa o ćaćipe ja te ohrabrina le te razmislini andi disavi situacija kuri osetinđa e Jehovaso vas. Tegani, šaj te phena lese so o Jehova na bisterđa odova so angleder ćerđa hem so niked na ka aćhavi le (Jevr. 6:10; 13:5, 6). Ked ando akava vaćeraja okolencar kasi vera tani slabo, odova šaj te ohrabrini len hem ponodri te služinen e Jehovase.

„HEM PONODRI ZORJAĆEREN JEKH JEKHE“

17. Ko so šaj te ova pana pošukar?

¹⁷ Sar đala o vreme, jekh manuš kova ćerela buti ki gradnja ovela sa pošukar hem pošukar ki pi buti. Isto ađahar, hem amen šaj te ova pana pošukar ko odova te ohrabrina jekh jekhe. Šaj te pomožina e phralenđe te istrajinen, ađahar so ka vaćera olencar sar disave e Devlese sluge istrajinđe ko pharipa. Isto ađahar, šaj te ćera te ovel mir ađahar so ka dikha o šukar osobine ko avera, ka da sa amendar te aćhol o mir ki skupština hem ako nane amen isto mišljenje andi disavi buti ka trudina amen te arakha o jekhipe. Uzo odova, šaj te ohrabrina amare phralen hem phenjen ađahar so ka vaćera olencar ando ćaćipe, ka pomožina lenđe ko odova so valjani lenđe hem ka ohrabrina okolen kasi vera tani slabo.

18. So hijan odlučno te ćere?

¹⁸ Okola kola gradinena amare objektija tane bahtale hem zadovoljna. Amen šaj te ova bahtale hem zadovoljna ked izgradinaja ili zorjaćeraja amare phralen hem phenjen. Jekh zgrada palo nekobor berš šaj te propadini, ama odova so amen ćeraja ka trajini večno. Odolese, hajde sare te da sa amendar hem ponodri te „zorjaćera jekh jekhe“ (1. Sol. 5:11).