E Devleso Lafi mothovi savo tano o Jehova

1. Sose hijan zahvalno asi Biblija?

AMEN hijam but zahvalna e Jehovase so dinđa amen i Biblija. Koro late šaj te arakha but savetija kola šaj te pomožinen amen te ikljova ko krajo amare problemencar. Isto ađahar, vaćeri andi but šuži nada asi budućnost. Soj tano najvažno, mothovi amenđe kola osobine isi le o Jehova. Ked razmislinaja ando olese osobine, odova takini amen ko vilo hem podstaknini amen te ova pana popaše oleja hem te ova olese amala (Ps. 25:14).

2. Sar o Jehova ko purano vreme mothovđa e manušenđe koj tano ov?

² O Jehova mangela o manuša te đanen koj tano ov. Odolese, ko purano vreme, disave manušenđe dinđa te dikhen sune hem vizije. A disavo puti bićhalđa pe anđelen te vaćeren e manušenđe olese poruke (Br. 12:6; Dela 10:3, 4). Ama, amen ne bi đanaja kola tane odola sune, vizije ja poruke ando anđelija ako ne bi ovena pisime. Odolese, o Jehova dinđa disave manušenđe te „pisinen ki knjiga“ odova so ov manglja amen te đana (Jer. 30:2). Sebepi so „o drumo ando pravo Devel tano savršeno“, amen šaj te ova sigurna so o način sar mangela te vaćeri amencar tano najšukar hem so ka pomožini amenđe (Ps. 18:30).

3. Sar o Jehova arakhlja i Biblija đi ko amaro vreme? (Isaija 40:8)

³ Čitin Isaija 40:8. E Devleso Lafi beršencar pomožinđa bute manušenđe. Sar? Amen đanaja so o materijalija ko kola hine pisime o sveta spisija propadinđe. Odolese, avdije nane amen nijekh originalno dokumenti ando odova vreme. Ama, o Jehova pobrininđa pe o manuša te prepisinen oleso Lafi. Iako o manuša kola ćerđe odova hine nesavršena, on ipak trudinđe pe pažljivo te prepisinen odova tekst. Na primer, jekh izučavalac aso hebrejska spisija phenđa: „Nijekh dokumenti nane odobor tačno prepisimo sar soj tano o deo ando Hebrejska spisija.“ Odolese, iako i Biblija hine pisimi angleder but berša ko materijalija kola propadinena hem o manuša kola prepisinđe la hine nesavršena, amen šaj te ova sigurna so odova so avdije čitinaja ki Biblija tane e Jehovase mislija.

4. Sostar ka vaćera ko akava članko?

⁴ Ando Jehova avela „svako šukar hem savršeno poklon“ (Jak. 1:17). I Biblija tani jekh ando najšukar poklonija kova o Jehova dinđa amen. Ked jekh osoba dela amen jekh poklon, odova poklon mothovi amenđe kobor oj penđari amen hem đanela so valjani amenđe. O Jehova dinđa amen i Biblija sar poklon. Ked razmislinaja ando odova poklon, amen šaj te dikha kobor o Jehova penđari amen hem đanela so valjani amenđe. Ko akava članko ka dikha so i Biblija vaćeri ando Jehovase trin osobine: andi olesi mudrost, pravda hem mangipe. Najangleder ka dikha so i Biblija sikavi amen andi Devlesi mudrost.

I BIBLIJA VAĆERI ANDI JEHOVASI MUDROST

5. Kova tano jekh način sar i Biblija mothovi so o Jehova tano mudro Devel?

⁵ O Jehova đanela so amenđe valjani oleso savet. Ki Biblija, ko poklon kova dinđa amen, isi but mudra savetija. Odola savetija pomožinđe bute manušenđe te meninen pe. Ked pisinđa i prvo knjiga, o Mojsije e Devlese narodose phenđa: „Odola nane ćuće lafija, nego on tumenđe značinena životi“ (Pon. zak. 32:47). Okola so ićerđe pe ko odova so hine pisimo, šaj hine te oven bahtale (Ps. 1:2, 3). Iako i Biblija hine pisimi angleder but berš, oj hem avdije pomožini bute manušenđe te ćeren promene ko po životi. Na primer, ko amaro sajt jw.org ki serija ando člankija „Biblija menja živote“ šaj te arakha prekalo 50 iskustvija kola mothovena sar i Biblija pomožinđa bute manušenđe te meninen pe (1. Sol. 2:13).

6. Sose šaj te phena so nijekh aver knjiga nane sar e Devleso Lafi?

⁶ Nijekh aver knjiga nane sar e Devleso Lafi. Sose šaj te phena odova? Odolese so o Autor andi odija knjiga tano o Devel, o Jehova, kova tano Svemoćno, Večno hem Najmudro. But avera knjige o manuša čitinena hem palo odova so olengo autor mulo. Ama, o manuša više na mislinena so o savetija andi odija knjiga šaj te pomožinen len. Ki aver strana, o savetija ando Devleso Lafi tane večna sose pomožinena bute manušenđe bizo obzir ko kova period živinena. Ked čitinaja odija sveto knjiga hem hor razmislinaja ando odova, olako Autor prekalo po sveti duh pomožini amen te haljova sar šaj te primenina o savetija kola tane ki odija knjiga (Ps. 119:27; Mal. 3:16; Jevr. 4:12). O Jehova jedva ađićeri te pomožini amen. Odolese valjani te čitina oleso Lafi svako dive.

7. Sar i Biblija ko purano vreme pomožinđa e Devlese narodose te aćhol ko jekhipe?

⁷ Pana jekh način kova mothovi so ki Biblija isi e Devlesi mudrost tano so oj pomožini e Devlese narodose te aćhol ko jekhipe. Ked o Izraelcija khuvđe ki Obećimi phuv, on đelje te živinen ko razna thana. Disave olendar počminđe te astaren maćhen, te arakhen stoka hem te ćeren buti phuvjaja. O Izaelcija kola živinđe ko odola thana lokho šaj hine te bistren upro Izraelcija kola živinđe ko avera thana. Ama, o Jehova phenđa lenđe so nekobor putija ko berš valjani sare te ćeden pe te šaj te šunen sar čitini pe hem objasnini pe e Devleso Lafi (Pon. zak. 31:10-13; Nem. 8:2, 8, 18). Zamislin sar osetinđa pe jekh Izraelco ked alo ko Jerusalim hem dikhlja avere Izraelcen! Ađahar o Jehova pomožinđa pe narodose te aćhol ko jekhipe. Kasnije, ked osnujinđe pe o skupštine, o phralja hem o phenja vaćerđe but ćhibja. Disave olendar hine len baro položaj hem hine barvale manuša, a disave hine skromna hem ćorore. Ama, sebepi so manglje e Devleso Lafi, on aćhilje ko jekhipe hem služinđe e pravo Devlese. Okola kola počminđe te sikljon ando Devel šaj hine te haljon e Devleso Lafi jedino ako bi o phralja pomožinena lenđe hem ako bi redovno đana ko sastankija (Dela 2:42; 8:30, 31).

8. Sar i Biblija avdije pomožini e Devlese narodose te ovel ko jekhipe?

⁸ O Jehova prekalo po Lafi sikavi amen hem pomožini amen te ova ko jekhipe. Ko oleso Lafi tano o ćaćipe kova valjani te đana. Amen redovno ćedaja amen ko amare sastankija ki dvorana, ko pokrajinska sastankija hem kongresija sose odothe šunaja sar čitini pe hem objasnini pe e Devleso Lafi. Odolese i Biblija tani jekh važno alati kova o Jehova koristini te šaj te služina lese „piko pikeja“ (Sof. 3:9).

9. Koja osobina valjani amenđe te šaj te haljova odova so pisini ki Biblija? (Luka 10:21).

⁹ Akana ka dikha pana jekh dokaz andi Jehovasi mudrost. Ki Biblija isi but stihija kola tane pisime ko asavko način so šaj te haljon len samo o ponizna manuša. (Čitin Luka 10:21.) O manuša ko celo sveto čitinena i Biblija. Jekh izučavalac phenđa so „but manuša čitinena i Biblija pobuter nego bilo koja aver knjiga hem odova ćerena but pažljivo.“ Ama, samo o ponizna manuša šaj te haljon odova so čitinena ki Biblija hem te primeninen olake savetija (2. Kor. 3:15, 16).

10. Sar pana dikhela pe e Jehovasi mudrost ko oleso Lafi?

¹⁰ Amen dikhaja e Jehovasi mudrost prekali Biblija ko pana jekh način. O Jehova prekali Biblija sikavi amen na samo sar grupa nego hem sar pojedincija. Ked čitinaja i Biblija, amen dikhaja so o Jehova brinini pe svakonese amendar (Is. 30:21). Ked isi tut problemija, kobor putija desinđa pe tuće đi čitineja i Biblija te arakhe disavo stih kova tano ka phene pisimo baš tuće? Odova soj tano pisimo ki Biblija šaj te resel đi ko svakoneso vilo. Ama, oj tani but purani knjiga, sar šaj koro late te pisini baš odova so valjani tuće avdije? Odolese so olako Autor tano i najmudro osoba ko celo svemir (2. Tim. 3:16, 17).

I BIBLIJA VAĆERI ANDI DEVLESI PRAVDA

11. Sar o Jehova mothovđa so na ćerela razlika maškaro manuša?

¹¹ Pana jekh e Jehovasi osobina tani i pravda (Pon. zak. 32:4). Ked jekh manuš tano pravedno but putija tano hem nepristrasno, avere lafencar, na ćerela razlika maškaro manuša (Dela 10:34, 35; Rimlj. 2:11). Ked razmislinaja ko kola ćhibja hine prvo puti pisimo e Devleso Lafi, šaj te dikha so o Jehova tano baš asavko. Na primer, o prva 39 knjige andi Biblija hine uglavnom pisime ki hebrejsko ćhib, odolese so e Devleso narodo ko purano vreme vaćerđa odija ćhib. A avera 27 knjige hine pisime ki grčko ćhib, odolese so o hrišćanija ko prvo veko uglavnom vaćerđe odija ćhib. O Jehova na manglja oleso Lafi te ovel pisimo samo ki jekh ćhib. Avdije, ki phuv isi oko ofto milijarde manuša hem on vaćerena razna ćhibja. Sar šaj odola manuša te sikljon ando Jehova?

12. Kova tano jekh način sar ispunini pe odova so pisini ko Danilo 12:4?

¹² Prekalo prorok Danilo, o Jehova obećinđa so ko vreme ando krajo „o pravo đandipe ka ovel pana pobaro“ hem but manuša ka haljon o ćaćipe. (Čitin Danilo 12:4.) Jekh način sar o pravo đandipe ovela sa pobaro tano ađahar so prevedini pe hem štampini pe i Biblija hem amare publikacije. Nijekh aver knjiga nane odobor prevedimi hem štampimi sar i Biblija. Ko sveto, o manuša kola prevedinena i Biblija, biknena la but skupo. Ama, e Jehovase sluge đi akana prevedinđe celo Biblija ili disave delovija ko prekalo 240 ćhibja hem sare šaj te dobinen la bizo pare. Sebepi odova, o manuša ko celo sveto šaj te šunen i „šukar vest ando Kraljevstvo“ angleder te avel o kraj (Mat. 24:14). O Jehova, amaro Devel andi pravda, but mangela e manušen hem odolese mangela so pobuter manuša te penđaren le ađahar so ka čitinen oleso Lafi.

I BIBLIJA VAĆERI ANDO DEVLESO MANGIPE

13. Sose šaj te phena so i Biblija mothovi amenđe e Devleso mangipe? (Jovan 21:25)

¹³ Ked čitinaja i Biblija, amen haljovaja so e Jehovasi najbari osobina tani o mangipe (1. Jov. 4:8). Razmislin ando odova so o Jehova dinđa te pisini pe ko oleso Lafi, a so na. Na primer, ki Biblija pisini so valjani te ćera te šaj te ova paše oleja, te ovel amen bahtalo životi akana hem te dobina o večno životi. Ama, odolese so mangela amen, ov ko po Lafi na vaćerđa amenđe o informacije kola nane amenđe potrebna te šaj te služina lese. (Čitin Jovan 21:25.)

14. Ko kova aver način dikhaja e Jehovaso mangipe prekali Biblija?

¹⁴ E Jehovaso mangipe dikhaja hem ko odova so ov mothovi amenđe poštovanje đi vaćeri amencar. Ki Biblija, o Jehova na dinđa jekh spisko kaj pisini so šaj, a so našti te ćera ki svako situacija. Umesto odova, prekalo biblijake primerija, proročanstvija hem savetija, ov pomožini amen te ana šukar odluke. Odolese, amen but mangaja le hem šunaja le.

15. (a) Sar i Biblija mothovi amenđe so o Jehova brinini pe amendar? (b) Kastar razmislini i tikni ćhaj, o terno phral hem i phuri phen ki slika? (Post. 39:1, 10-12; 2. Kralj. 5:1-3; Luka 2:25-38)

¹⁵ I Biblija mothovi so o Jehova but brinini pe amendar. Sar odova? Ko Devleso Lafi isi but izveštaija kola mothovena sar disave manuša osetinđe pe ki disavi situacija. Amen šaj te haljova len odolese so on hine obična manuša sar amen (Jak. 5:17). Soj tano najvažno, ked dikhaja sar o Jehova pomožinđa lenđe, amen haljovaja kobor tano ov samilosno hem milosrdno (Jak. 5:11).

16. So sikljovaja ando Jehova ked ki Biblija čitinaja ando manuša kola grešinđe? (Isaija 55:7)

¹⁶ I Biblija ko pana jekh način mothovi amenđe kobor tano baro e Jehovaso mangipe. Andi Biblija haljovaja so o Jehova niked na ka aćhavi amen ako ćerđam disavo greh. O Izraelcija but putija grešinđe e Jehovase, ama ked kajinđe pe ov uvek oprostinđa lenđe. (Čitin Isaija 55:7.) Isto ađahar, hem o hrišćanija ko prvo veko đanđe so o Jehova but mangela len. O apostol Pavle phenđa lenđe te oprostinen jekhe phralese jekh but ozbiljno greh kova ćerđa hem te utešinen le, sose ov ando vilo kajinđa pe (2. Kor. 2:6, 7; 1. Kor. 5:1-5). Ćaće tano but utešno so đanaja so o Jehova na aćhavđa pe slugen samo sebepi so grešinđe. Umesto odova, pomožinđa len, ukorinđa len hem palem lelja len ki pi angalja. Ov dela po lafi so hem avdije ka ćerel odova sarinenđe kola ando vilo kajinena pe (Jak. 4:8-10).

MOTHOV SO CENINEJA E DEVLESO LAFI

17. Sose tani i Biblija but šužo poklon?

¹⁷ I Biblija tani jekh but šužo poklon. Sose? Sar so dikhljam ko akava članko, i Biblija vaćeri andi Devlesi mudrost, pravda hem ando oleso mangipe. Isto ađahar, koro late pisini so o Jehova mangela te penđara le hem te ova olese amala.

18. Sar šaj te mothova so hijam zahvalna so isi amen i Biblija?

¹⁸ Amen na valjani te bistra so i Biblija tani jekh but šukar poklon ando Devel (Jak. 1:17). Odolese valjani hem ponodri te mothova so hijam zahvalna aso odova poklon. Odova šaj te ćera ađahar so svako dive ka čitina e Devleso Lafi hem ka razmislina ando odova so čitinđam. Ako ka ćera odova, o Jehova ka blagoslovini amen hem pana pošukar ka penđara le (Posl. 2:5).