Sar šaj te zorjaćera amaro mangipe?

1-2. (a) Sose o apostol Pavle phenđa soj tano o mangipe najbaro? (b) Kola pućiba ka razmotrina?

KED o apostol Pavle vaćerđa andi vera, andi nada hem ando mangipe, ov phenđa: „A najbaro maškaro olende tano o mangipe“ (1. Kor. 13:13). Sose o Pavle phenđa akava? Ki budućnost više na ka valjani amenđe vera ko Devlese obećanja niti nada so odola obećanja ka ispuninen pe, odolese so tegani već ka oven ispunime. Ama, uvek ka valjani amenđe mangipe premalo Jehova hem amare phralja hem phenja. U stvari, amen uvek ka valjani te barjaćera amaro mangipe.

² Odolese so uvek ka valjani te ovel amen mangipe ka razmotrina trin pućiba: (1) Sose valjani te manga jekh jekhe? (2) Sar šaj te mothova mangipe jekh jekhese? (3) Sar šaj te zorjaćera o mangipe maškaro amende?

SOSE VALJANI TE MANGA JEKH JEKHE?

3. Kola razlogija isi amen te manga jekh jekhe?

³ Sose tano važno te mothova mangipe jekh jekhese? Odolese so ađahar mothovaja so hijam prava hrišćanija. O Isus phenđa pe apostolenđe: „Premalo odova sare ka đanen so hijen me učenikija, ako mangena jekh jekhe“ (Jov. 13:35). Uzo odova, o Pavle phenđa so „o mangipe ćerela [amen te ova] ko jekhipe“ (Kol. 3:14). Ama, isi pana jekh važno razlog sose valjani te mothova mangipe jekh jekhese. O apostol Jovan pisinđa e hrišćanenđe: „Okova so mangela e Devle valjani te mangel hem pe phrale“ (1. Jov. 4:21). Ked mothovaja mangipe jekh jekhese ađahar mothovaja so mangaja e Devle.

4-5. Sar tano o mangipe premalo Devel povezimo e mangipaja premalo phralja hem phenja? Objasnin.

⁴ Ko savo način tano amaro mangipe premalo Devel povezimo e mangipaja premalo phralja hem phenja? Razmislin sar tano povezimo to vilo hem avera delovija kotar to telo. Ked o doktori proverini da li tano to puls jako ili slabo, ov šaj te đanel da li tano to vilo sasto. So šaj te sikljova kotar akava primer?

⁵ Sar so jekh doktori šaj te đanel savo tano amaro vilo ađahar so merini amaro puls hem amen šaj te dikha savo tano amaro mangipe premalo Jehova ađahar so ka razmislina ando amaro mangipe premalo phralja hem phenja. Ako primetinaja so nane amen mangipe premalo phralja hem phenja sar angleder, odova značini so amaro mangipe premalo Jehova nane sar angleder. Ama, ako uvek mothovaja mangipe e phralenđe hem e phenjenđe, odova značini so amaro mangipe premalo Jehova tano baro.

6. Sose tano opasno ako amaro mangipe premalo amare phralja hem phenja nane sar angleder? (1. Jovanova 4:7-9, 11)

⁶ Ako amaro mangipe premalo phralja hem phenja nane sar angleder, tegani isi amen jekh ozbiljno problemi. Sose? Odolese so odova značini so amaro amalipe e Jehovaja tano ki opasnost. O apostol Jovan istakninđa odova ked phenđa: „Ako neko na mangela pe phrale, kas dikhela, našti te mangel e Devle, kas na dikhela“ (1. Jov. 4:20). So šaj te sikljova akalestar? O Jehova tano zadovoljno amencar ako mangaja jekh jekhe. (Čitin 1. Jovanova 4:7-9, 11.)

SAR ŠAJ TE MOTHOVA MANGIPE JEKH JEKHESE?

7-8. Sar šaj te mothova mangipe premalo phralja hem phenja?

⁷ But putija, ked čitinaja i Biblija šaj te arakha i zapovest: „Mangen jekh jekhe“ (Jov. 15:12, 17; Rimlj. 13:8; 1. Sol. 4:9; 1. Petr. 1:22; 1. Jov. 4:11). Isto ađahar, o mangipe tano diso so avela ando vilo, a nijekh manuš našti te đanel soj tano ko nekaso vilo. Odolese, sar šaj amare phralja te osetinen so mangaja len? Odova šaj te mothova odoleja so vaćeraja hem so ćeraja.

⁸ Isi but načinija sar šaj te mothova mangipe amare phralenđe hem phenjenđe. Aće disave primerija: „Vaćeren o ćaćipe jekh jekhese“ (Zah. 8:16). „Oven ko mir jekh jekheja“ (Mar. 9:50). „Oven prva ko odova te mothoven so poštujinena jekh jekhe“ (Rimlj. 12:10). „Celone vileja prihvatinen jekh jekhe“ (Rimlj. 15:7). „Oprostinen jekh jekhese“ (Kol. 3:13). „Akharen jekh jekheso pharipe“ (Gal. 6:2). „Tešinen jekh jekhe“ (1. Sol. 4:18). „Zorjaćeren jekh jekhe“ (1. Sol. 5:11). „Molinen tumen jekh jekhese“ (Jak. 5:16).

9. Sose tani i uteha jekh važno način sar mothovaja mangipe? (Dikh i slika.)

⁹ Akana ka dikha kova tano jekh način sar šaj te mothova mangipe premalo phralja hem phenja. O apostol Pavle phenđa: „Tešinen jekh jekhe.“ Sose tani i uteha jekh važno način sar mothovaja mangipe? Premali jekh biblijaki enciklopedija, o apostol Pavle koristinđa o lafi „tešinen“ kova značini „te terđova uzi disavi osoba te utešina la ked tani ki disavi phari situacija.“ Ked utešinaja amare phrale ja phenja, amen odoleja pomožinaja len te služinen verno e Jehovase hem mothovaja lenđe mangipe (2. Kor. 7:6, 7, 13).

10. Sar tane povezime i saosećajnost hem i uteha?

¹⁰ Nane bari razlika maškaro odova te mothova saosećanje hem te utešina nekas. Sose šaj te phena odova? Ked neko tano saosećajno, avere lafencar osetini nekasi dukh, odova podstaknini le te utešini averen hem te ćerel diso te šaj te pomožini lenđe. O Pavle phenđa so e Jehovaso saosećanje premalo manuša podstaknini le te utešini len. Ov phenđa so o Jehova tano „Dad ando milosrđe hem o Devel andi svako uteha“ (2. Kor. 1:3). Ko akala stihija o Pavle koristini o lafi „milosrđe“ te šaj te opisini e Jehovasi saosećajnost premalo manuša. O Devel tano vićimo Dad ja okova kastar avela o milosrđe, odolese so isi le baro saosećanje premalo manuša. A odova saosećanje podstaknini le te utešini amen ki „svako amari nevolja“ (2. Kor. 1:4). Sar so o čisto pani kova ikljola kotar jekh izvor osvežini okolen kola tane trošale, ađahar hem o Jehova osvežini hem utešini okolen kola isi len pharipa. Sar šaj sar o Jehova te mothova saosećajnost hem te utešina averen? Jekh način sar šaj te ćera odova tano te razvijina o osobine kola ka pomožinen amen te ova saosećajna hem te utešina averen. Akana ka dikha kola tane odola osobine.

11. Premalo Kološanima 3:12 hem 1. Petrova 3:8, kola avera osobine ka pomožinen amen te manga averen hem te utešina len?

¹¹ So ka pomožini amen ando dive ko dive te zorjaćera amaro mangipe hem te „tešina jekh jekhe“? Amen valjani te razvijina samilost, phralikano mangipe hem šukaripe. (Čitin Kološanima 3:12; 1. Petrova 3:8.) Sar akala osobine ka pomožinen amen? Ako isi amen akala osobine, ka ovel amen bari želja te utešina okolen kola isi len disave pharipa. Sar so o Isus phenđa: „O muj vaćeri odova soj tano o vilo pherdo. O šukar manuš vaćeri šukar buća sose ko vilo isi le šukar buća“ (Mat. 12:34, 35). Na valjani te bistra so jekh važno način sar šaj te mothova kobor mangaja e phralen tano ađahar so ka utešina len.

SAR ŠAJ TE ZORJAĆERA AMARO MANGIPE PREMALO PHRALJA?

12. (a) Sose valjani te pazina te na šudrol amaro mangipe premalo phralja? (b) Kotar kova pućibe akana ka vaćera?

¹² Sare amen mangaja hem ponodri te „mothova mangipe jekh jekhese“ (1. Jov. 4:7). Ama, but tano važno te na bistra o upozorenje kova o Isus phenđa: „Ko but đene o mangipe ka šudrol“ (Mat. 24:12). O Isus na manglja te phenel so but ando olese učenikija ka ćhinaven te mothoven mangipe. Ama, valjani te pazina o sveto te na utičini upro amende sose but manuša nane len mangipe jekh premalo aver. Nek ovel amen akava ki godi đi ka razmotrina o odgovor ko pućibe: Sar šaj te đana da li amaro mangipe premalo phralja tano zoralo?

13. Sar šaj te đana da li amaro mangipe premalo phralja tano zoralo?

¹³ Jekh način sar šaj te dikha kobor tano zoralo amaro mangipe premalo phralja hem phenja tano ađahar so ka razmislina sar reagujinaja ko disave situacije (2. Kor. 8:8). Jekh situacija pominđa o apostol Petar: „A najangleder, but mangen jekh jekhe, sose o mangipe ućhari but grehija“ (1. Petr. 4:8). Odova sar ka reagujina ked amare phralja grešinena ili povredinena amen, ka mothovi amenđe kobor tano baro amaro mangipe premalo lende.

14. Premali 1. Petrova 4:8, kobor valjani te manga amare phralen hem phenjen? Vaćer jekh primer.

¹⁴ Hajde te razmotrina e Petarese lafija. Ko prvo deo ando oftoto stiho o Petar phenela kobor valjani te manga e phralen. Ov phenela: „But mangen.“ O lafi „but“ kova o Petar koristinđa doslovno značini „te raširina“. O dujto deo ando akava stiho phenela amenđe so šaj te ćera ako isi amen baro mangipe. Asavko mangipe šaj te ućhari but grehija kotar amare phralja hem phenja. Na primer, ako jekh astali tano but grebimo, amen šaj te la jekh stolnjako, te raširina le hem te ućhara odova so nane šukar. Isto ađahar, amen amare mangipaja šaj te „ućhara“ ili te oprostina na jekh, na duj, već but grehija kotar amare phralja.

15. So šaj te ćera ako but mangaja amare phralen hem phenjen? (Kološanima 3:13)

¹⁵ Amaro mangipe premalo phralja valjani te ovel but baro te šaj te oprostina lenđe – čak ked odova tano but pharo. (Čitin Kološanima 3:13.) Ked oprostinaja averenđe, amen mothovaja so amaro mangipe tano zoralo hem so mangaja te ugodina e Jehovase. So šaj pana te pomožini amenđe te na holjana sigate hem te oprostina amare phralenđe ked grešinena?

16-17. So pana ka pomožini amen te na usredsredina amen ko tikne greške kola ćerena amare phralja hem phenja? Vaćer jekh primer. (Dikh i slika.)

¹⁶ Dikh o pozitivna buća ko te phralja hem phenja, a na o negativna. Razmislin ando akava primer. Zamislin so hijan ko druženje e phralencar hem e phenjencar. Uživinena zajedno hem ko krajo ćerena jekh slika. U stvari, tu ćereja pana duj slike, te ovel tut rezerva ako i prvo na ikljilji šukar. Akana isi tut trin slike. Ama, primetineja so jekh phral ki jekh slika na ikljilo šukar. So ka ćere odola slikaja? Ka brišine la, sose isi tut pana duj slike kuri sare ikliljen šukar, pa hem odova phral.

¹⁷ Šaj te phena so akala slike tane sar o uspomene kola isi amen amare phralencar hem phenjencar. Obično isi amen šukar uspomene olencar. Ama, šaj dijekhvar jekh phral ja phen phenđa ja ćerđa diso so na hine baš šukar. So valjani te ćera? Sose na pokušinaja te brišina odova andi amari godi sar so bi brišinaja jekh ando odola trin slike (Posl. 19:11; Ef. 4:32). Amen šaj te bistra o tikne greške kola ćerđe amare phralja hem phenja sose pamtinaja o šukar uspomene kola isi amen olencar. Odola uspomene tane but skupocena.

SOSE TANO O MANGIPE AVDIJE BUT VAŽNO?

18. Kola važna pouke ando mangipe sikljiljam ko akava članko?

¹⁸ Sose tano važno te zorjaćera amaro mangipe premalo amare phralja hem phenja? Sar so dikhljam, ked mothovaja mangipe amare phralenđe hem phenjenđe, amen mothovaja mangipe e Jehovase. Sar mothovaja so mangaja e phralen hem e phenjen? Jekh način tano ađahar so tešinaja len. I saosećajnost ka podstaknini amen te utešina amare phralen hem phenjen. Ked oprostinaja lenđe, čak ked odova nane lokho, amaro mangipe ka ovel sa pozoralo.

19. Sose tano avdije posebno važno te mothova mangipe jekh jekhese?

¹⁹ Sose tano avdije posebno važno te manga jekh jekhe? Zapazin so o Petar phenđa: „O krajo ando sa o buća tano paše. Odolese [. . .] but mangen jekh jekhe“ (1. Petr. 4:7, 8). Sar tano o krajo ando akava lošno sveto sa popaše, so šaj te očekujina? O Isus phenđa pe učenikonenđe: „Sa o narodija ka mrzinen tumen sebepi mo anav“ (Mat. 24:9). Te šaj te aćhova verna e Jehovase ko akava vreme, valjani te ova ko jekhipe. Ako mangaja amare phralen hem phenjen, o Satana niked na ka šaj te odvojini amen odolese so o mangipe povezini amen (Kol. 3:14; Fil. 2:1, 2).