Sar o Jehova mangela te dikha upro okola so ćerđe greh?

1. So o Jehova mangela sa e manušenđe?

O JEHOVA dinđa amen slobodno volja. Amen svako dive koristinaja la te ana odluke. I najvažno odluka koja jekh osoba šaj te anel tani te predajini po životi e Jehovase hem te ovel deo andi olesi porodica. O Jehova mangela sare te ćeren odova. Sose? Odolese so mangela e manušen hem mangela lenđe najšukar ko životi. Ov mangela te uživina ko amaro amalipe oleja hem te živina zauvek (Pon. zak. 30:19, 20; Gal. 6:7, 8).

2. So o Jehova mangela te ćeren okola so pana na kajinđe pe? (1. Jovanova 2:1)

² O Jehova nikas na ćhivela silaja te služini lese. Ov mukhela svako manuš kokri te odlučini so ka ćerel. So ako jekh krstimo hrišćanin na ićeri pe ko Devleso zakon hem ćerela ozbiljno greh? Ako na kajini pe, odija osoba valjani te cidel pe andi skupština (1. Kor. 5:13). Ama, čak hem tegani, o Jehova nadini pe so oj ka irini pe olese. U stvari, odolese o Jehova dinđa i otkupnina – te oprostini okolenđe kola kajinena pe aso pe grehija. (Čitin 1. Jovanova 2:1.) O Jehova tano Devel kova mangela sarinen hem podstaknini okolen kola ćerđe ozbiljno greh te pokajinen pe (Zah. 1:3; Rimlj. 2:4; Jak. 4:8).

3. So ka dikha ko akava članko?

³ O Jehova phenela amenđe sar dikhela ko greh hem upro okola so ćerđe ozbiljna grehija. Ov mangela te ovel amen sar oleso stav. Ko akava članko ka dikha (1) so o Pavle phenđa e hrišćanenđe ko Korint te ćeren ked jekh phral ćerđa ozbiljno greh, (2) so phenđa lenđe te ćeren ked ov kajinđa pe hem (3) sar o Jehova dikhela upro okola kola ćerđe ozbiljno greh.

SO DESINĐA PE KED JEKH PHRAL ĆERĐA OZBILJNO GREH?

4. So desinđa pe ki skupština Korint? (1. Korinćanima 5:1, 2)

⁴ Čitin 1. Korinćanima 5:1, 2. Ko po trito misionarsko putovanje, o Pavle šunđa so diso strašno desini pe ki nevi skupština ko Korint. Jekh phral kotar odija skupština ćerđa nemoral pe maćehaja. Asavko diso na hine „ni maškaro nevernikija“. Na samo so o phralja hine tolerantna premalo odova phral, već hine hem ponosna upro leste. Disave šaj mislinđe so odova mothovi kobor tano o Jehova milosrdno hem razumno premalo nesavršena manuša. Ama, o Jehova na tolerišini o greh maškaro po narodo. Odova manuš sigurno lađaćerđa e skupština. Isto ađahar, šaj hine lošno te utičini upro avera hrišćanija kola družinđe pe oleja. So o Pavle phenđa e skupštinaće te ćerel?

5. So o Pavle phenđa e skupštinaće te ćerel hem so odova značinđa? (1. Korinćanima 5:13; dikh i slika.)

⁵ Čitin 1. Korinćanima 5:13. O Jehova usmerinđa e Pavle te pisini lil odola skupštinaće hem te phenel so odova manuš valjani te cidel pe andi skupština. Sar o verna hrišćanija valjanđe te ponašinen pe premalo leste? O Pavle phenđa so valjani „te ćhinaven te družinen“ pe oleja. So odova značinđa? Ov objasninđa so odija zapovest značini so na valjani ni te han oleja (1. Kor. 5:11). Ked bešaja nekasa te ha maro, amen počminaja te vaćera hem ađahar ovaja paše. Jasno tano so o Pavle mislinđa so i skupština na valjani te družini pe odole manušeja. Ađahar i skupština šaj hine te zaštitini pe ando lošno uticaj (1. Kor. 5:5-7). Isto ađahar, odova šaj hine te pomožini odole manušese te haljol kobor povredinđa e Jehova, te ovel lese žao hem te podstaknini le te kajini pe.

6. So ćerđa i skupština ked priminđa e Pavleso lil, a so o manuš kova grešinđa?

⁶ Palo odova so bićhalđa lenđe lil, o Pavle počminđa te pućel pe sar odija skupština ka reagujini. Ama, o Tit anđa lese šukar vestija. Ov phenđa lese so i skupština šukar reagujinđa (2. Kor. 7:6, 7). On sledinđe olese smernice. Palo nekobor masek, odova manuš kajinđa pe, ćhinavđa te grešini, meninđa po stav hem počminđa te ićeri pe ko Jehovase pravedna merilija (2. Kor. 7:8-11). So o Pavle akana ka phenel e skupštinaće te ćerel?

SAR I SKUPŠTINA VALJANĐA TE PONAŠINI PE PREMALO MANUŠ KOVA KAJINĐA PE?

7. Sose hine šukar so o manuš kova grešinđa jekh vreme hine cidimo andi skupština? (2. Korinćanima 2:5-8)

⁷ Čitin 2. Korinćanima 2:5-8. O Pavle phenđa: „Asavke manušese tano dovoljno so već but tumendar ukorinđe le.“ Avere lafencar, o ukor ispuninđa pi svrha. So hine i svrha? Te legari le đi o pokajanje (Jevr. 12:11).

8. So o Pavle pana phenđa e skupštinaće te ćerel?

⁸ Odolese, o Pavle phenđa e skupštinaće: „Spremno oprostinen lese hem utešinen le“ hem „mothoven lese so mangena le“. O Pavle na manglja i skupština samo te dozvolini lese te irini pe. Ov manglja o phralja pe lafencar hem pe delijencar te mothoven odole manušese so mangena le hem so ćaće oprostinđe lese. Odoleja bi mothovena soj tano olenđe drago so irinđa pe.

9. Sose nekase šaj hine pharo te oprostini e phralese kova kajinđa pe?

⁹ Da li nekase ki skupština hine pharo te prihvatinen odole manuše? I Biblija na vaćeri odolestar, ama moguće tano. Sose? Disave šaj hine holjame odolese so ćerđa problemija ki skupština, a averenđe šaj hine pharo sose olen lično povredinđa. O phralja hem o phenja ki skupština but trudinđe pe te aćhon moralno čista. Odolese, disave šaj mislinđe so nane pravedno neko ko ćerđa asavko ozbiljno greh te irini pe ki skupština. (Uporedin e stihonencar ando Luka 15:28-30.) Ama, sose hine važno i skupština te mothovi mangipe e phralese kova irinđa pe?

10-11. So šaj hine te desini pe ako o starešine na bi oprostinena e manušese kova kajinđa pe?

¹⁰ Zamislin so šaj hine te desini pe ako o starešine na bi mukhena e manuše kova kajinđa pe te irini pe ki skupština ili ako palo odova so irini pe i skupština na bi mothovi lese mangipe. Ole šaj hine te „peravi [. . .] odija bari dukh“. Ov šaj hine te mislini so niked palem na ka ovel deo andi skupština. Čak šaj hine te ćhinavi te trudini pe te ovel paše e Jehovaja.

¹¹ Soj tano pana pološno, ako o phralja hem o phenja na bi mangena te oprostinen lese, on bi našalena po amalipe e Jehovaja. Sose? Odolese so tegani na bi oponašinena e Jehova kova oprostini okolenđe kola kajinena pe. Umesto odova, on bi oponašinena e Satana kova tano okrutno hem na mothovi milosrđe. Ađahar šaj hine te mukhen e Benge te koristini len te obeshrabrinen le odobor so više na ka ovel le snaga te služini e Jehovase (2. Kor. 2:10, 11; Ef. 4:27).

12. Sar šaj hine i skupština te oponašini e Jehova?

¹² Sar šaj hine i skupština ko Korint te oponašini e Jehova, a na e Satana? Ađahar so bi sar o Jehova oprostini okolenđe kola kajinena pe. Dikh so disave biblijake piscija vaćerđe ando Jehova. O David phenđa: „Tu, Jehova, hijan šukar hem spremno hijan te oprostine“ (Ps. 86:5). O Mihej pisinđa: „Koj tano Devel sar tute, kova oprostini i krivica hem nakhela prekalo grehija“ (Mih. 7:18). A o Isaija phenđa: „Nek o lošno manuš aćhavi po drumo hem pe mislija. Nek irini pe e Jehovase, amare Devlese, kova ka smilujini pe olese, sose ov spremno ka oprostini lese“ (Is. 55:7).

13. Sose o manuš kova grešinđa šaj hine te irini pe ki skupština? (Dikh o okvir „Ked o manuš ando Korint irinđa pe ki skupština?“)

¹³ Te šaj te oponašinen e Jehova, o phralja hem o phenja ko Korint valjanđe te oprostinen odole manušese hem te uverinen le so mangena le. O Pavle phenđa lenđe so ako oprostinena lese, on ka mothoven soj tane „poslušna ko sa“ (2. Kor. 2:9). Iako odova manuš samo nekobor masek hine cidimo andi skupština, odova podstakninđa le te kajini pe. Odolese, o starešine na hine len razlog te ađićeren te priminen le ki skupština.

OV PRAVEDNO HEM MILOSRDNO SAR O JEHOVA

14-15. So sikljovaja ando odova sar rešinđa pe o problemi ko Korint? (2. Petrova 3:9; dikh i slika.)

¹⁴ O izveštaj ando odova sar rešinđa pe o problemi ko Korint tano pisimo te šaj amen te sikljova diso (Rimlj. 15:4). Ando odova izveštaj sikljovaja so o Jehova na ka dozvolini okola kola ćerđe disavo ozbiljno greh hem na kajinena pe te aćhon ki skupština. Disave šaj mislinena so o Jehova, odolese soj tano milosrdno, ka dozvolini nekase ko na kajini te aćhol ki skupština. Ama, o Jehova na mothovi milosrđe ko asavko način. Ov tano milosrdno, ama nane popustljivo niti olese merilija aso odova soj tano šukar hem lošno meninena pe (Jud. 4). Ako bi mukhela asavke manuša te aćhon ki skupština, tegani na bi mothovi milosrđe premalo avera sose i skupština bi ovela ki opasnost (Posl. 13:20; 1. Kor. 15:33).

¹⁵ O Jehova na mangela nijekh te ovel uništimo. Ov mangela ked god odova šaj o manuša te spasinen pe. Ov mothovi milosrđe okolenđe kola kajinena pe hem kola mangena palem te oven olese amala. (Jezek. 33:11; čitin 2. Petrova 3:9.) Odolese, ked o manuš ando Korint kajinđa pe hem ćhinavđa te ćerel greh, o Jehova prekalo Pavle objasninđa e phralenđe so odole manušese valjani te oprostinen hem te priminen le ki skupština.

16. So tu mislineja ando odova sar hine rešimo o problemi ko Korint?

¹⁶ O primer andi skupština Korint mothovi so o Jehova but mangela amen hem soj tano pravedno (Ps. 33:5). Akava ćaće podstaknini amen te hvalina le. Amen hijam zahvalna soj tano milosrdno sose sare grešinaja hem valjani amenđe oleso oproštaj. Isto ađahar, zahvalna hijam hem sebepi i otkupnina sose ađahar amare grehija šaj te oven oprostime. But tano utešno so đanaja so o Jehova mangela amen hem so mangela amenđe sa najšukar.

17. Sostar ka vaćera ko aver članko?

¹⁷ Ako neko avdije ćerela ozbiljno greh, sar šaj o starešine te oponašinen e Jehovaso mangipe hem te pomožinen odola osobaće te kajini pe? Sar o phralja valjani te reagujinen ked o starešine odlučinena nekas te ciden andi skupština ili te priminen le? Ando akala pućiba ka vaćera ko aver članko.