Pomožin e osobaće kolaja proučineja te odlučini te služini e Jehovase

1-2. (a) Sose tano disavenđe pharo te odlučinen te oven e Jehovase svedokija? (b) Sostar ka vaćera ko akava članko?

DA LI hine disave buća sebepi kola hine tuće pharo te ove e Jehovaso svedoko? Šaj darandiljan so te kolege, te amala ja ti familija ka protivinen pe tuće. Šaj mislinđan so niked na ka šaj te ićere tut ko Jehovase moralna merilija. Ako ađahar osetinđan tut, onda šaj te haljove sar tano nekase kova proučini hem kobor tano lese pharo te anel odluka te ovel e Jehovaso svedoko.

² O Isus haljilo so asavki dar šaj te sprečini nekas te služini e Jehovase (Mat. 13:20-22). Ama, ov na ćhinavđa te pomožini okolenđe kola isi len asavki dar te sledinen le. Umesto odova, ov mothovđa pe učenikonenđe sar šaj te pomožinen asavke manušenđe (1) te haljon so ćhinavi len te napredujinen, (2) te zorjaćeren po mangipe premalo Jehova, (3) te ćhiven e Jehova ko prvo than hem (4) te đanen so te ćeren ked isi len protivljenje. Đi koristinaja i knjiga Ov bahtalo zauvek!, sar šaj te primenina odova so o Isus phenđa pe učenikonenđe te šaj te pomožina e manušenđe kolencar proučinaja te odlučinen te služinen e Jehovase?

POMOŽIN E OSOBAĆE TE HALJOL SO ĆHINAVI LA TE SLUŽINI E JEHOVASE

3. So ćhinavđa e Nikodime te ovel e Isuseso učeniko?

³ O Nikodim hine jekh ando judejska poglavarija, ama diso ćhinavđa le te ovel e Isuseso učeniko. Samo šov masek palo odova so o Isus počminđa te propovedini, o Nikodim haljilo so bićhalđa le o Devel (Jov. 3:1, 2). Ama, ov manglja te vaćeri e Isuseja samo raćate. Sose? Odolese so darandilo so o Jevreja ka mislinen olestar (Jov. 7:13; 12:42). Isto ađahar, šaj darandilo so ka našali po položaj hem po barvalipe ako ka ovel e Isuseso učeniko.a

4. Sar o Isus pomožinđa e Nikodimese te haljol so o Devel rodela olestar?

⁴ O Nikodim šukar đanđa o Zakon, ama olese valjanđa pomoć te haljol so o Devel rodela olestar. Sar o Isus pomožinđa le? Ov odvojinđa lese vreme hem vaćerđa oleja čak raćate. Jasno phenđa lese so valjani te ćerel te šaj te ovel oleso učeniko. Ov valjanđa te kajini pe aso pe grehija, te krstini pe ko pani hem te mothovi vera ko Devleso Ćhavo (Jov. 3:5, 14-21).

5. Sar šaj te pomožina e osobaće te haljol so ćhinavi la te služini e Jehovase?

⁵ Čak ako i osoba šukar haljola odova so proučini, šaj ka valjani te pomožine laće te dikhel so ćhinavi la te ovel e Jehovaso svedoko. Na primer, šaj i buti lela latar but vreme ili šaj laki porodica protivini pe laće. Sar o Isus, odvojin vreme te pomožine laće. Šaj te vićine la ki kafa ili te ikljon negde te phiren. Tegani, šaj ka ovel laće polokho te vaćeri tuće diso pobuter ando po životi hem šaj ka haljove so ćhinavi la te napredujini. Podstaknin e osoba te ćerel o promene kola valjani, na te šaj te ugodini tuće nego te šaj te mothovi po mangipe e Jehovase.

6. Sar šaj te pomožine e osobaće kolaja proučineja te ovel la snaga te primenini odova so sikljola? (1. Korinćanima 16:13)

⁶ Ked i osoba kolaja proučineja tani uverimi so o Jehova ka pomožini la te primenini e biblijake načelija, oj ka ovel la snaga te primenini odova so sikljola. (Čitin 1. Korinćanima 16:13.) Ti uloga koja isi tut sar učitelj, šaj te uporedina jekhe nastavnikoja ki škola. Đi đeljan ki škola, kova nastavniko najviše sviđinđa pe tuće? Verovatno okova so pomožinđa tut te haljove so tu šaj te ćere odova so rodela pe tutar. Ko slično način, o šukar učitelj na sikavi e osoba samo so o Devel mangela te ćera, nego hem uverini la so uzi Jehovasi pomoć oj šaj te menini pe. Sar šaj te ove asavko učitelj?

POMOŽIN E OSOBAĆE TE OVEL LA PANA POBARO MANGIPE PREMALO JEHOVA

7. Sar o Isus pomožinđa e manušenđe te ovel len pana pobaro mangipe premalo Jehova?

⁷ O Isus đanđa so ked neko mangela e Devle, ov ka mangel te primenini odova so sikljola. But putija, phenđa pe učenikonenđe disave buća kola pomožinđe len te ovel len pana pobaro mangipe premalo po nebesko Dad. Na primer, ov uporedinđa e Jehova jekhe manušeja kova dela šukar buća pe ćhavenđe (Mat. 7:9-11). Disavenđe kola šunđe e Isuse, olengo dad šaj niked na mothovđa mangipe. Odolese, šaj samo te zamislina sar osetinđe pe ked o Isus vaćerđa lenđe i priča ando milosrdno dad kova but radujinđa pe ked oleso ćhavo kova grešinđa irinđa pe ćhere. O Isus pomožinđa len te haljon kobor o Jehova mangela len hem so mangela te pomožini lenđe (Luka 15:20-24).

8. Sar šaj te pomožine e osobaće kolaja proučineja te mangel pobuter e Jehova?

⁸ Isto ađahar, tu šaj te pomožine e osobaće kolaja proučineja te mangel pobuter e Jehova ađahar so često ka vaćere ando olese osobine. Ko svako kurs, pomožin e osobaće te povezini odova so sikljola e Jehovase mangipaja. Ked ka vaćeren andi otkupnina, istaknin sar odova odnosini pe upro late (Rimlj. 5:8; 1. Jov. 4:10). I osoba verovatno ka ovel podstaknimi te mangel e Jehova ked ka razmislini ando odova kobor o Jehova ola lično mangela (Gal. 2:20).

9. So pomožinđa jekhe manušese te ćerel promene ko po životi?

⁹ Te dikha o primer kotar Majkl andi Indonezija. Kotar tiknipe ov đanđa o ćaćipe, ama na krstinđa pe. Ked hine le 18 berš, đelo ki aver phuv hem odothe arakhlja pese buti te vozini kamioni. Kasnije, irinđa pe ki Indonezija hem ženinđa pe, ama palem đelo te ćerel buti ki aver phuv bizi pi porodica. Sar đelo o vreme, olesi romni hem olesi ćhaj počminđe te proučinen i Biblija e Jehovase svedokonencar. Palo odova so olesi daj mulji, o Majkl irinđa pe ćhere te brinini pe ando po dad hem počminđa te proučini. But pogodinđa le odova so čitinđa ki knjiga Ov bahtalo zauvek! ki 27. lekcija ko deo „Rode pobuter“. Ked razmislinđa odolestar kobor o Jehova hine tužno ked dikhlja sar o Isus patini, ov počminđa te rovel. Ked haljilo so o Jehova hem o Isus but mangena le, ov hine spremno te ćerel promene ko po životi. Ko krajo, o Majkl krstinđa pe.

POMOŽIN E OSOBAĆE KOLAJA PROUČINEJA TE ĆHIVEL E JEHOVA KO PRVO THAN

10. Sar o Isus pomožinđa pe učenikonenđe te ćeren promene te šaj pobuter te služinen e Jehovase? (Luka 5:5-11; dikh i slika.)

¹⁰ O učenikija ko prvo veko sigate haljilje so o Isus tano o Mesija, ama valjanđa lenđe pomoć te haljon so valjani e Jehova te ćhiven ko prvo than ko po životi. O Petar hem o Andrej već disavo vreme hine e Isusese učenikija ked ov vićinđa len te sledinen le (Mat. 4:18, 19). On zajedno e Jakoveja hem e Jovaneja hine ribarija hem i buti but šukar đelji lenđe (Mar. 1:16-20). Ked o Petar hem o Andrej „aćhavđe o mreže“, on verovatno već hine len disavo plan sar ka brininen pe andi pi porodica đi sledinđe e Isuse. Sose hine spremna te aćhaven pi buti? Ko izveštaj ando Luka dikhaja so o Isus ćerđa jekh čudo kova mothovđa so o Jehova šaj te brinini pe olenđe. (Čitin Luka 5:5-11.)

11. So ando amaro iskustvo šaj te vaćera e osobaće kolaja proučinaja?

¹¹ Amen našti te ćera čudija sar o Isus, ama šaj te vaćera odolestar sar o Jehova pomožinđa amenđe te ćhiva le ko prvo than ko životi. Na primer, da li setineja tut sar o Jehova pomožinđa tuće ked počminđan te đa ko sastankija. Šaj valjanđan te vaćere te šefeja hem te phene lese so našti te ćere buti prekovremeno ked isi tut sastankija. Đi vaćereja e osobaće to iskustvo, objasnin laće sar ti vera uli sa pozorali đi dikhljan sar o Jehova pomožinđa tuće te ćhive le ko prvo than ko to životi.

12. (a) Sose valjani te vićine različito objaviteljen ko kurs? (b) So pana šaj te koristine te šaj te pomožine e osobaće te ćhivel e Jehova ko prvo than ko po životi? Vaćer jekh primer.

¹² Isto ađahar, e osobaće kolaja proučineja but ka pomožini ako šunela so avera ćerđe te šaj te ćhiven e Jehova ko prvo than ko po životi. Odolese, vićin različito objaviteljen ko kurs. Puć len te vaćeren sar upoznajinđe i istina hem so ćerđe te šaj i služba e Jehovase te ovel lenđe ko prvo than ko životi. Isto ađahar, odvojin vreme zajedno te dikhen o videa ando deo „Sikljov pobuter“ hem „Rode pobuter“, ki knjiga Ov bahtalo zauvek! Na primer, ked ka resen ki 37. lekcija, šaj te istaknine o načelija ando video O Jehova ka del amen odova so valjani.

SIKAV E OSOBA SO TE ĆEREL KED ISI LA PROTIVLJENJE

13. Sar o Isus pripreminđa pe učenikonen aso protivljenje?

¹³ O Isus nekobor putija phenđa pe učenikonenđe so avera ka protivinen pe lenđe, pa čak hem olenge ćherutne (Mat. 5:11; 10:22, 36). Hari angleder te merel, o Isus phenđa so čak šaj ka oven mudarde odolese so služinena e Jehovase (Mat. 24:9; Jov. 15:20; 16:2). Ov upozorinđa len te oven oprezna ki služba. Savetujinđa len te na raspravinen pe okolencar kola protivinena pe lenđe hem te pazinen so vaćerena hem sar vaćerena diso te šaj hem ponodri te nastavinen pi služba.

14. Sar šaj te pomožina e osobaće te pripremini pe aso protivljenje? (2. Timoteju 3:12)

¹⁴ Amen šaj te pomožina e osobaće te pripremini pe aso protivljenje ađahar so ka phena laće so šaj te očekujini ando pe kolege, amala ili rođakija. (Čitin 2. Timoteju 3:12.) Disave kolege šaj ka maren laće muj sose trudini pe te primenini e biblijake načelija. Avera, čak olake paše rođakija, šaj ka kritikujinen la sebepi olake verovanja. Šukar tano so posig te vaćera ando protivljenje. Ađahar na ka ovel iznenadimi ked odova ka desini pe hem šaj pošukar ka đanel so te ćerel hem so te phenel.

15. So šaj te pomožini e osobaće kolaja proučinaja ked isi la protivljenje?

¹⁵ Ako e osobaće kolaja proučineja protivini pe olaki porodica, pomožin laće te haljol sose tane holjame upro late. On šaj isi len predrasude premalo Svedokija ili šaj mislinena so neko lelja laki godi. Čak hem e Isusese protivinđa pe neko andi olesi porodica (Mar. 3:21; Jov. 7:5). Odolese, sikav e osoba te ovel strpljivo hem taktično premalo avera hem premali pi porodica.

16. Sar šaj te pomožina e osobaće kolaja proučinaja te vaćeri averencar andi Biblija ko jekh ljubazno način?

¹⁶ Čak hem ako e osobake rođakija mangena te đanen pobuter andi Biblija, oj na valjani te vaćeri lenđe sa ando jekh puti. Ako odova ćerela, on šaj više na ka mangen te vaćeren olaja odolestar. Odolese, podstaknin la te vaćeri lenđe hari pohari, ađahar ka mukhel phravde udara aso aver puti (Kol. 4:6). Šaj te mothovi lenđe amaro sajt. Uduri, on šaj te čitinen pobuter ando Jehovase svedokija ked god ka mangen hem kobor god ka mangen.

17. Sar šaj te pomožine e osobaće te đanel sar te branini pe verovanja? (Dikh i slika.)

¹⁷ Ko amaro sajt, šaj te koristine o deo „Najčešća pućiba“ te šaj te pomožine e osobaće te đanel so te phenel pe familijaće ja pe kolegenđe ked diso pućena la (2. Tim. 2:24, 25). Ko krajo andi svako lekcija, vaćeren ando deo „Ako neko phenela“ ja „Ako neko pućela“ ki knjiga Ov bahtalo zauvek! Podstaknin e osoba te vežbini te odgovorini pe lafencar. Pomožin la te sikljol sar šaj pana pošukar te objasnini averenđe ko so verujini. Odova so zajedno ka vežbinen šaj te pomožini e osobaće te đanel sar te branini pe verovanja.

18. Sar šaj te pomožine e osobaće kolaja proučineja te ovel nekršteno objavitelj? (Matej 10:27)

¹⁸ O Isus podstakninđa pe učenikonen te vaćeren averenđe i šukar vest. (Čitin Matej 10:27.) So posigate i osoba počmini te vaćeri averenđe ando odova ko so verujini, posigate ka sikljol te oslonini pe upro Jehova. Sar šaj te pomožine la te ispunini odova cilj? Ked ko sastanak ka ovel obaveštenje so ka ovel propovedničko akcija, podstaknin la te razmislini so šaj te ćerel te ovel nekršteno objavitelj. Objasnin laće sose butenđe hine polokho so pođinđe ki služba ked hine akcija. Isto ađahar, šaj but te pomožini laće ako počmini te ovel la prikazija ko sastanko ko radno dive. Tegani ka sikljol sar šaj pošukar te objasnini averenđe ko so verujini.

MOTHOV SO ISI TUT POVERENJE UPRI OSOBA KOLAJA PROUČINEJA

19. Sar o Isus mothovđa so isi le poverenje upro pe učenikija hem sar šaj te oponašina le?

¹⁹ Angleder te đal ko nebo, o Isus phenđa pe učenikonenđe so jekh dive on palem ka oven zajedno. On na haljilje so o Isus vaćerđa ando odova so on ka đan ko nebo. Ama ipak, o Isus hine sigurno so on mangena e Jehova hem so mangena te ugodinen lese (Jov. 14:1-5, 8). Ov đanđa so olenđe ka valjani vreme te haljon disave buća, sar na primer odova so valjani te đan ko nebo (Jov. 16:12). Sar o Isus, hem amen mangaja te mothova okolenđe kasa proučinaja so verujinaja so isi len želja te ugodinen e Jehovase.

20. Sar jekh phen ando Malavi mothovđa so isi la poverenje upri osoba kolaja proučinđa?

²⁰ Ov uverimo ko odova so i osoba kolaja proučineja mangela te ćerel odova soj tano ispravno. Aće te dikha o primer andi amari phen Čifundo kotar Malavi. Oj počminđa te proučini jekha ternja romnjaja koja vićini pe Alinafe. Oj hine ki katoličko religija. Ked završinđe i 14. lekcija, i Čifundo pućlja la so mislini ando odova da li valjani te koristinen pe o religiozna predmetija. I Alinafe uznemirinđa pe hem phenđa: „Odija tani mi odluka.“ I Čifundo mislinđa so palo odova oj ka ćhinavi o kurs. Ama, strpljivo nastavinđa te proučini olaja hem nadinđa pe so palo disavo vreme ka haljol so odova nane šukar. Palo nekobor masek, i Čifundo pućlja la o pućibe andi 34. lekcija. O pućibe hine: „Sar odova so đi akana sikljiljan andi Biblija pomožinđa tuće?“ I Čifundo phenđa sar i Alinafe odgovorinđa: „Oj pominđa but šukar buća. Jekh andi buti hine so o Svedokija na ćerena o buća aso kola i Biblija phenela soj tane pogrešna.“ Sigate palo odova, i Alinafe ćhinavđa te koristini o religiozna predmetija hem krstinđa pe.

21. Sar šaj te pomožina e manušenđe kolencar proučinaja te anen odluka te služinen e Jehovase?

²¹ Iako tano o Jehova okova „kova dela te barjol“, amen pomožinaja e manušenđe kolencar proučinaja te napredujinen (1. Kor. 3:7). Amen na sikavaja len samo ando odova so o Jehova rodela olendar, nego pomožinaja lenđe te ovel len pana pobaro mangipe premalo leste. Isto ađahar, ohrabrinaja len te mothoven lese po mangipe ađahar so ka ćhiven le ko prvo than ko po životi. Sikavaja len sar te osloninen pe upro Jehova ked avera protivinena pe lenđe. Ked mothovaja lenđe so isi amen poverenje ko odova so mangena te ugodinen e Jehovase, amen pomožinaja len te oven hrabra hem te odlučinen te služinen e Jehovase.