ONLAJN BIBLIOTEKA Watchtower
ONLAJN BIBLIOTEKA
Watchtower
Romane (Srbija)
  • BIBLIJA
  • PUBLIKACIJE
  • SASTANKIJA
  • w25 jun str. 26-31
  • Celo životi sikljiljam ando amaro Veličanstveno Učitelj

O video-sadržaj nane dostupno.

Žao amendže, alo dži ki greška dži phravdža pe o video.

  • Celo životi sikljiljam ando amaro Veličanstveno Učitelj
  • Stražarsko kula objavini e Jehovaso Kraljevstvo (izdanje proučibase) – 2025
  • Podnaslovija
  • Slično materijali
  • ME RODITELJENGO PRIMER
  • POČMINAJA E PUNOVREMENO SLUŽBAJA
  • AMARO ŽIVOTI SAR MISIONARIJA
  • ĐAJA KI EVROPA, A PALO ODOVA KI AFRIKA
  • ĐELJAM KO BLISKO ISTOK
  • IRINAJA AMEN KI AFRIKA
  • Na očekujindžum so o Jehova odobor ka blagoslovini man
    Stražarsko kula vačeri so avela e Jehovaso Kraljevstvo (izdanje proučibase) – 2019
  • O Jehova ispravinđa sa me staze
    Stražarsko kula objavini e Jehovaso Kraljevstvo (izdanje proučibase) – 2021
  • Šuže iznenađenja hem buća kola sikljiljam ko amare zadatkija
    Stražarsko kula objavini e Jehovaso Kraljevstvo (izdanje proučibase) – 2023
  • Uživinava đi služinava e Jehovase
    Stražarsko kula objavini e Jehovaso Kraljevstvo (izdanje proučibase) – 2024
Stražarsko kula objavini e Jehovaso Kraljevstvo (izdanje proučibase) – 2025
w25 jun str. 26-31
Franko Dagostini.

ISKUSTVO

Celo životi sikljiljam ando amaro Veličanstveno Učitelj

VAĆERĐA O FRANKO DAGOSTINI

PUNKTIJA kuri hine naoružime vojnikija, barikade kola thabljona, bare oluje, građanska mariba hem evakuacije. Akala tane disave opasna situacije ko kola hijam le me hem mi romni đi služinđam sar pionirija hem misionarija. Ama, amaro životi na bi meninaja nisose. Ko celo amaro životi, o Jehova pomožinđa amen hem blagoslovinđa amen. Isto ađahar, sar amaro Veličanstveno Učitelj, ov sikavđa amen but važna buća (Jov 36:22; Is. 30:20).

ME RODITELJENGO PRIMER

Ko 1950-ta berša, me roditeljija đelje andi Italija te živinen ki Kanada, ki diz Kindersli, koja nalazini pe ki pokrajina Saskačevan. Hari palo odova, on upoznajinđe o ćaćipe hem odova ulo diso but važno ko amaro životi. Setinava man so sar tikno odobor đeljum me roditeljencar ki služba so disavo puti ki šala phenđum so me hijum „pomoćno pioniri“, iako hine man samo ofto berš.

O Franko ked hine tikno pe roditeljencar hem pe phraleja hem pe phenjencar.

Me porodicaja oko 1966. berš

Me roditeljija hine ćorore, ama hine amenđe šukar primer sose ćerđe but žrtve e Jehovase. Na primer, ko 1963. berš, bikinđe disave ando pe buća te šaj te ćeden pare te đa ko kongres ki Pasadena, ki Kalifornija. Ko 1972. berš, selinđam amen 1 000 kilometrija dur ko Trejl, ki Britansko Kolumbija, ki Kanada te pomožina ko italijansko područje. Mo dad zaradinđa ađahar so čistinđa hem održinđa jekh baro marketi. Ov na manglja te ćerel aver buti kuri šaj hine te zaradini pobuter pare, sose manglja pobuter te služini e Jehovase.

But hijum zahvalno me roditeljenđe so mothovđe šukar primer maje, me phralese hem me phenjenđe. Ando olengo primer sikljiljum but buća kola kasnije pomožinđe man ki mi služba e Jehovase. Sikavđe man diso so niked na bisterđum: Ako ćhivava o Kraljevstvo ko prvo than, o Jehova uvek ka brinini pe mandar (Mat. 6:33).

POČMINAJA E PUNOVREMENO SLUŽBAJA

Ko 1980. berš, venčinđum man jekha but šuže phenjaja koja vićini pe Debi hem koja hine la but šukar duhovna ciljija. Amen mangljam te počmina e punovremeno službaja hem odolese trin masek palo odova so leljam amen, i Debi počminđa te služini sar pioniri. Jekh berš palo amaro venčanje, selinđam amen ki jekh tikni skupština kuri hine pobari potreba. Odothe hem me uljum pioniri.

O Franko hem i Debi ked venčinđe pe.

Ko amaro venčanje ko 1980. berš

Palo disavo vreme, amen našalđam amari radost hem mangljam te selina amen. Odolese, vaćerđam e pokrajinsko nadglednikoja. Ov hine ljubazno, ama iskreno phenđa amenđe: „Tumen kokri ćerena tumari situacija te ovel pophari. Dikhena samo odova so nane šukar. Trudinen tumen te roden o šukar buća hem ka arakhen len.“ Baš odova savet valjanđa amenđe (Ps. 141:5). Odmah ćerđam odova hem sigate haljiljam so isi but buća kola tane šukar. Na primer, nekobor objaviteljija ki skupština manglje te ćeren pobuter e Jehovase, sar soj tane o terne hem disave phenja kolengo rom na hine Svedoko. Odolestar but sikljiljam. Trudinđam amen te roda odova soj tano šukar hem te ovel amen poverenje upro Jehova so ov ka pomožini amen te istrajina ko phare situacije (Mih. 7:7). Palem uljam radosna hem sar đelo o vreme o buća alje ko po than.

Nekobor instruktorija ki amari prvo pionirsko škola služinđe ko avera phuvja. On mothovđe amenđe disave slike hem vaćerđe ando pharipa hem blagoslovija kola hine len ko odola phuvja. But sviđinđa pe amenđe odova so vaćerđe. Odolese, ćhivđam amenđe cilj te ova misionarija.

Čistimo tano o parking ki dvorana palo odova so pelo baro iv.

Ki dvorana ki Britansko Kolumbija ko 1983. berš

Te šaj te ispunina odova cilj, ko 1984. berš, selinđam amen ko francusko područje ko Kvibek, kova hine prekalo 4 000 kilometrija dur andi Britansko Kolumbija. Odova značinđa so valjani te sikljova nevi ćhib hem nevi kultura. Pana jekh problemi hine so but putija na hine amen dovoljno pare. Jekh vreme jedino so hine amen te ha hine krompirija hem odova sose jekh manuš mukhlja amen te ćeda odova so aćhilo ki olesi njiva. I Debi sikljilji te ćerel razna habe ando krompirija hem sa hine but ukusno. Iako hine amen sa akala pharipa, amen dinđam sa amendar te istrajina hem te ova radosna. Hijam le sigurna so o Jehova brinini pe amendar (Ps. 64:10).

Jekh dive, o phralja vićinđe amen ko telefoni hem phenđe amenđe so hijam vićime te služina ko Betel, ki Kanada. Angleder odova, amen dinđam i molba asi škola Galad. Odolese, iako hijam le bahtale so hijam vićime te đa ko Betel, hijam le hem razočarime. Ama, ipak prihvatinđam o poziv. Ked resljam ko Betel, pućljam e phrale Kenet Litl, kova hine član ando Odbor, so ka ćera ako ka vićinen amen te đa ki škola Galad. Ov phenđa amenđe: „Ako hijen le vićime, tegani ka dikha so ka ćera.“

Jekh kurko palo odova, i Debi hem me hijam le vićime te đa ki škola Galad. Akana valjanđam te odlučina so te ćera. O phral Litl phenđa amenđe: „Bizo obzir savi odluka ka anen, disavo puti ka mislinen so bi ovela hine pošukar averćhane te odlučinen. Nijekh odluka nane pogrešno, o Jehova šaj te blagoslovini o solduj.“ Amen odlučinđam te đa ki škola hem sar đelje o berša haljiljam kobor šukar savet dinđa amen o phral Litl. But putija vaćeraja odola lafija averenđe kola valjani te odlučinen kova zadatko ka prihvatinen ki organizacija.

AMARO ŽIVOTI SAR MISIONARIJA

(Levo) Julisiz Glas

(Desno) Džek Redford

Hijam le but bahtale so hijam le maškaro 24 đene kola hine vićime ko 83. razred ki škola Galad. Odija škola ićerđa pe ko Bruklin, ko april ko 1987. berš. O phral Julisiz Glas hem o phral Džek Redford hine amare glavna instruktorija. Panđ masek but sigate nakhlje hem amen diplomirinđam ko 6. septembar ko 1987. berš. Dobinđam zadatko te služina ko Haiti, zajedno e Džoneja hem e Merijaja Gud.

O Franko hem i Debi ki služba ki plaža ko Haiti.

Ko Haiti ko 1988. berš

Kotar 1962. berš nijekh misionari na hine bićhaldo te služini ko Haiti sose ko odova berš hine fordime sa o misionarija kola služinđe odothe. Ama, trin kurće palo odova so završinđam i škola, hijam le ko Haiti hem služinđam ki jekh skupština koja hine ko planine hem hine la 35 objaviteljija. Hijam le terne, na hine amen iskustvo hem hijam le kokri ko odova misionarsko ćher. O manuša odothe hine but ćorore hem but olendar na đanđe te čitinen. Đi hijam le uduri, dikhljam sar o manuša ovena nasilna sebepi o politička problemija. Isto ađahar, disave manglje te meninen i vlada, hine protestija hem oluje.

But buća sikljiljam ando amare hrabra hem radosna phralja ko Haiti. But olendar hine len but pharo životi, ama on manglje e Jehova hem i služba. Jekh phuri phen na đanđa te čitini, ama ki godi đanđa oko 150 stihija. Sebepi sa odola pharipa kola dikhljam, amen pana pobuter vaćerđam i šukar vest ando Devleso Kraljevstvo kova ka rešini sa o problemija. Hijam le but bahtale ked dikhljam so disave kolencar proučinđam ked aljam ko Haiti, akana ulje stalna hem specijalna pionirija hem starešine.

Đi hijam le ko Haiti, upoznajinđum jekhe terne ćhave kova vićinđa pe Trevor. Ov hine mormoni hem odothe služinđa sar misionari. Nekobor putija vaćerđum oleja andi Biblija. Beršencar palo odova, dobinđum jekh lil. Ov pisinđa maje: „Ko aver pokrajinsko sastanko ka krstinav man. Mangava te avav ko Haiti te služinav sar specijalno pioniri ko isto than kaj angleder služinđum sar misionari ko mormonija.“ Odova hem ćerđa. But berša, zajedno pe romnjaja, služinđa ko odova than.

ĐAJA KI EVROPA, A PALO ODOVA KI AFRIKA

O Franko ćerela buti ko po astali.

Ki Slovenija ko 1994. berš

Ko jekh deo ki Evropa hine pobari potreba aso objaviteljija hem odolese hijam le bićhalde te služina odothe. Ko 1992. berš resljam ki Ljubljana ki Slovenija, paše uzo than kaj me roditeljija živinđe angleder te đan ki Italija. Ko odova vreme pana hine maribe ki bivšo Jugoslavija. I podružnica ko Beč ki Austrija, sar hem o predstavništvo ko Zagreb ki Hrvatska hem ko Beograd ki Srbija nadgledinđa o delo ko odova područje. Akana odola solduj phuvja isi len po Betel.

Odolese valjanđam palem te sikljova nevi ćhib hem nevi kultura. O manuša kola živinena ki Slovenija bi phenena: „Jezik je težek.“ Hem ćaće hine phari odija ćhib. Hijam le oduševime ked dikhljam sar o phralja spremno prihvatinena o promene ki organizacija hem sar o Jehova blagoslovini len. Pana jekh puti šaj hine te dikha sar o Jehova ispravini o buća ko pravo vreme. Đi služinđam ki Slovenija sikljiljam but buća, a odova so angleder sikljiljam pomožinđa amen te istrajina othe.

Ama, ađićerđe amen pana promene. Ko 2000. berš dobinđam te đa ki Obala Slonovače ki zapadno Afrika. Palo odova, ko novembar ko 2002. berš, sebepi o građansko maribe, morandiljam te đa ko Sijera Leone. Uduri samo so završinđa pe o građansko maribe kova trajinđa 11 berš. Hine amenđe but pharo ando jekh puti te aćhava i Obala Slonovače. Ama, odova so sikljiljam pomožinđa amen te na našala amari radost.

Dinđam sa amendar te pomožina e manušenđe kola manglje te proučinen hem e phralenđe hem e phenjenđe kola beršencar istrajinđe ko maribe. On ćaće hine ćorore, ama manglje te delinen odova so hine len. Jekh puti, jekh phen manglja te del me romnjaće disave šeja. I Debi na manglja te lel. Ama, i phen phenđa laće: „Đi hine o maribe, o phralja hem o phenja ando avera phuvja pomožinđe amenđe. Akana tano amaro redo te pomožina averenđe.“ Amaro cilj hine te oponašina olengo primer.

Irinđam amen ki Obala Slonovače, ama uduri hine sa pobaro nasilje. Odolese, ko novembar ko 2004. berš morandiljam helikoptereja te cida amen odothar hem amencar leljam samo po jekh torba ando deš kile. Odija rat sućam ko pod andi francusko vojno baza. Tajsato dive đeljam ki Švajcarska. Ked resljam ki podružnica hine kasno raćate, ama o phralja ando Odbor hem o instruktorija andi Škola aso obučavanje ando naimenujime phralja zajedno pe romnjencar ađićerđe amen, zagrlinđe amen, spreminđe amenđe diso tato te ha hem dinđe amen sa odobor švajcarska čokolade. Ćaće osetinđam olengo mangipe.

O Franko ićeri govor ki dvorana ki Obala Slonovače

Vaćeri e izbeglicencar ki Obala Slonovače ko 2005. berš

Dobinđam privremeno te služina ki Gana, a palo odova ked hari smirinđe pe o građanska nemirija irinđam amen ki Obala Slonovače. O šukaripe kova mothovđe amenđe amare phralja pomožinđa amen te istrajina, iako morandiljam nekobor putija te naša hem te menina amare zadatkija. Iako i Debi hem me đanđam so asavko mangipe tano uobičajeno maškaro Jehovaso narodo, amen niked na ka bistra odova so o phralja ćerđe amenđe. U stvari, kasnije haljiljam so sa akala pharipa kola nakhljam pomožinđe amen te sikljova but važna buća.

ĐELJAM KO BLISKO ISTOK

O Franko hem i Debi posetinena o purane ruševine ko Blisko Istok.

Ko Blisko Istok ko 2007. berš

Ko 2006. berš dobinđam jekh lil ando amaro glavno sedište kuri phenđe amenđe so dobinđam nevo zadatko, te đa ko Blisko istok. Palem morandiljam te sikljova nevi ćhib, nevi kultura, ama hine amen hem disave pharipa. Sikljiljam but buća ko akala phuvja kuri hine but problemija sebepi i politika hem i religija. Sviđinđa pe amenđe odova so ki skupština hine razna ćhibja hem dikhljam so šaj te ova ko jekhipe ako ićeraja amen ko smernice kola dobinaja andi Jehovasi organizacija. But mangljam e phralen hem e phenjen odolese so hine hrabra hem istrajinđe, iako hine len protivljenje andi pi porodica, ando amala ki škola, kolege hem komšije.

Ko 2012. berš đeljam ko posebno kongres ko Tel Aviv, ko Izrael. Ko odova kongres alje but phralja hem phenja. Odova hine prvo puti pali Pedesetnica ko 33. berš, e Jehovaso narodo ko odova područje te ćedel pe ko odova baro broj. Amenđe hine bari čast te ova ko odova kongres.

Ko odola berša, hijam le bićhalde te posetina jekh phuv kuri amaro delo hine ograničimo. Amen legarđam amencar hari literatura, đeljam ki služba hem ko tikne pokrajinska sastankija. Ki svako strana hine kontrolna punktija hem naoružime vojnikija, ama osetinđam amen bezbedno sose trudinđam amen te ova oprezna hem kuri god đeljam amencar hine o phralja.

IRINAJA AMEN KI AFRIKA

O Franko kucini ko po laptop.

Pripremini po govor ko Kongo ko 2014. berš

Ko 2013. berš dobinđam jekh but averćhane zadatko. Akana valjanđam te služina ki podružnica ki Kinšasa, ko Kongo. Odija phuv hine but bari hem šuži. Ama, nažalost odothe hine baro ćororipe hem maribe. Kokri amenđe phenđam: „Amen đanaja savo tano o životi ki Afrika, spremna hijam.“ Ama, ipak morandiljam te sikljova but buća, posebno đi putujinđam ko thana kuri na hine drumija hem mostija. Hine but šukar buća kolendar šaj hine te razmislina. Na primer, iako amare phralja hine len bare pharipa, on hine istrajna hem bahtale. Trudinđe pe te đan ko svako sastanko hem kongres. Hine amen prilika te dikha sar o delo odothe napredujini sose o Jehova pomožini len hem blagoslovini len. Đi služinđam ko Kongo sikljiljam but buća hem arakhljam amalen kola ulje deo andi amari porodica.

O Franko tano ki služba, đala phirindoj ko jekh gav zajedno avere phralencar hem phenjencar.

Ki služba ki Južnoafričko Republika ko 2023. berš

Ko krajo ando 2017. berš dobinđam jekh nevo zadatko, te služina ki Južnoafričko Republika. Odija podružnica hine najbari ki koja služinđam hem čak amare zadatkija ko odova Betel hine neve. Palem hine but buća kola morandiljam te sikljova, ama but pomožinđa amen odova so sikljiljam angleder. Amen but zamangljam e phralen hem e phenjen kola beršencar istrajno služinđe e Jehovase. Isto ađahar, hine but šukar te dikha sar amari betelsko porodica tani ko jekhipe, iako o phralja hem o phenja avena ando različita rase hem kulture. Šaj hine te dikha sar e Jehovaso narodo ićeri pe ko biblijake načelija, razvijini o hrišćanska osobine hem sar o Jehova blagoslovini len ađahar so dela len mir.

Ko sa akala berša, i Debi hem me hine amen razna zadatkija, prilagodinđam amen ko neve kulture hem sikljiljam neve ćhibja. Iako na hine amenđe uvek lokho, osetinđam so o Jehova prekali pi organizacija hem o phralja mothovi amenđe po mangipe (Ps. 144:2). Sigurna hijam so i punovremeno služba pomožinđa amen te ova pošukar e Jehovase sluge.

But hijum zahvalno so me roditeljija mothovđe maje šukar primer. Isto ađahar, but ceninava i podrška andi mi romni i Debi hem o šukar primer ando phralja hem phenja kotar celo sveto. Ked mi romni hem me razmislinaja andi budućnost, odlučna hijam hem ponodri te prihvatina odova so mangela te sikavi amen amaro Veličanstveno Učitelj.

    Publikacije ki romani čhib (2016-2025)
    Odjava
    Prijava
    • Romane (Srbija)
    • Bićhal
    • Podešavanja
    • Copyright © 2025 Watch Tower Bible and Tract Society of Pennsylvania
    • Pravilija ando korišćenje
    • Pravilija ando lična podatkija
    • Pravilija andi privatnost
    • JW.ORG
    • Prijava
    Bićhal