Uverin tut ko odova so o Jehova oprostinđa tuće

1-2. Sar osetinaja amen ked o Jehova oprostini amenđe? (Dikh i slika.)

O KRALJ David đanđa sar tano ked osetineja krivica sebepi o grehija kola ćerđan (Ps. 40:12; 51:3; uvod). Ov ćerđa but ozbiljna grehija ko životi. Ama, iskreno kajinđa pe hem o Jehova oprostinđa lese (2. Sam. 12:13). Ked haljilo odova, ov hine but bahtalo (Ps. 32:1).

² Sar o David, hem amen hijam but bahtale ked haljovaja so o Jehova mothovi amenđe po milosrđe. Čak ked ćeraja baro greh, ov tano spremno te oprostini amenđe ako priznajinaja, kajinaja amen hem ćeraja sa so šaj te na ponovina odova greh (Posl. 28:13; Dela 26:20; 1. Jov. 1:9). Utešini amen odova so đanaja so o Jehova potpuno oprostini amenđe ka phene niked na ćerđam odova greh (Jezek. 33:16).

3-4. Sar jekh phen osetinđa pe palo odova so krstinđa pe hem sostar ka vaćera ko akava članko?

³ Podijekh puti, disavenđe tano pharo te uverinen pe ko odova so o Jehova oprostinđa lenđe. Ađahar osetinđa pe hem i Dženifer. Oj barilji ki istina, ama ked hine tinejdžer počminđa te ćerel disave lošna buća hem garavđa odova ando pe roditeljija. Kasnije, oj meninđa pe hem krstinđa pe. Oj phenela: „Angleder hine maje but važna o materijalna buća, ćerđum nemoral, piljum but hem hijum le but holjami. Ki mi godi đanđum so palo odova so ka kajinav man hem so ka rodav e Jehovastar te oprostini maje, ov odova ka ćerel sebepi e Isusesi otkupno žrtva. Ama, naštine te uverinav mo vilo soj tane me grehija oprostime.“

⁴ Da li tuće podijekh puti pharo te uverine to vilo so o Jehova oprostinđa tuće sebepi o greške kola ćerđan? O David hine uverimo so o Jehova oprostinđa lese sose tano but milosrdno. O Jehova mangela hem tu te uverine tut ko odova. Ko akava članko ka vaćera odolestar sose valjani te ova uverime so o Jehova oprostinđa amenđe hem so šaj te pomožini amen te ćera odova.

SOSE VALJANI TE UVERINA AMEN KO ODOVA SO O JEHOVA OPROSTINĐA AMENĐE?

5. Ko so bi o Satana mangela te verujina? Vaćer jekh primer.

⁵ Ako uverinaja amen ko odova so o Jehova oprostinđa amenđe, amen ka cida amen andi jekh e Satanasi zamka. Ma bistri so o Satana ka ćerel sa so šaj te ćhinavi amen te služina e Jehovase. Na primer, ov šaj te ćhivel amen te mislina so o Jehova na oprostini amenđe. Razmislin so desinđa pe e manušese ando Korint kova hine cidimo andi skupština sose ćerđa nemoral (1. Kor. 5:1, 5, 13). Kasnije ov kajinđa pe, ama o Satana manglja o phralja hem o phenja andi skupština te na oprostinen lese hem te na priminen le šukar. Ako bi odova desini pe, odova manuš bi mislini so o Jehova na oprostinđa lese hem odobor šaj hine te ovel tužno so bi ćhinavi te služini e Jehovase. O Satana na meninđa po cilj hem pe taktike. Ama, „olese namere nane amenđe bipenđarutne“ (2. Kor. 2:5-11).

6. So šaj te ćera ako isi amen osećaj andi krivica?

⁶ Ako uverinaja amen ko odova so o Jehova oprostinđa amenđe, više na ka ovel amen osećaj andi krivica. Ked grešinaja, normalno tano te ovel amen osećaj andi krivica (Ps. 51:17). Odova tano šukar sose šaj te podstaknini amen te menina amen hem te ćera odova soj tano ispravno (2. Kor. 7:10, 11). Ki aver strana, ako odova osećaj but trajini, odova šaj odobor te obeshrabrini amen so čak šaj te ćhinava te služina e Jehovase. Ama, ako uverinaja amen so o Jehova oprostinđa amenđe, više na ka ovel amen asavko osećaj. Tegani amari savest ka ovel čisto hem ka šaj palem radosno te služina lese (Kol. 1:10, 11; 2. Tim. 1:3). Sar šaj te uverina amaro vilo so o Jehova oprostinđa amenđe?

SO KA POMOŽINI AMEN TE UVERINA AMEN SO O JEHOVA OPROSTINĐA AMENĐE?

7-8. So o Jehova phenđa e Mojsijese pestar hem ko so šaj te ova uverime? (Izlazak 34:6, 7)

⁷ Razmislin ando odova so o Jehova phenđa pestar. Na primer, setin tut so phenđa e Mojsijese ki gora Sinaj.a (Čitin Izlazak 34:6, 7.) Ando sa odobor šuže osobine kola isi le, o Jehova birinđa te phenel e Mojsijese soj tano „milosrdno hem samilosno“. Da li šaj te zamisline so asavko Devel na oprostini nekase ko ćaće kajini pe aso po greh? Našti, sose odova bi značini so nane milosrdno hem samilosno.

⁸ Šaj te ova uverime so o Jehova našti pogrešno te predstavini pe sose tano Devel ando ćaćipe (Ps. 31:5). Odolese, šaj te verujina lese ked phenela soj tano milosrdno hem samilosno. Ama, ako hem ponodri mučini tut o osećaj andi krivica, puć tut: „Da li ćaće verujinava so o Jehova tano milosrdno hem samilosno hem so šaj te oprostini svakonese kova kajini pe aso pe grehija?“ Ako verujineja ko odova, onda šaj te ove uverimo so ov ka oprostini hem tuće.

9. Premalo Psalam 32:5, sar o Jehova oprostini amare grehija?

⁹ Razmislin ando odova so o Jehova prekalo po sveti duh phenđa e manušenđe te pisinen ando oleso opraštanje. Na primer, razmislin so pisinđa o kralj David odolestar. (Čitin Psalam 32:5.) Ov phenđa: „Tu oprostinđan mi krivica, me grehija.“ O hebrejsko lafi kova tano prevodimo sar „oprostinđan“ šaj te značini vazdinđan, legarđan ili leljan. Ked o Jehova oprostinđa e Davidese, ov ka phene lelja olese grehija hem legarđa len. O David palo odova osetinđa ka phene jekh baro pharipe pelo ando olese pike hem na hine le više osećaj andi krivica (Ps. 32:2-4). Amen šaj te osetina amen ko slično način. Ked iskreno kajinaja amen aso amare grehija na valjani više te akhara odova pharipe, avere lafencar o osećaj andi krivica, sose o Jehova lelja amare grehija hem legarđa len.

10-11. So o lafija „spremno oprostini“ vaćeri amenđe ando Jehova? (Psalam 86:5)

¹⁰ Čitin Psalam 86:5. O David akate phenela soj tano o Jehova spremno te oprostini. Odova značini so ov na holjani sigate ked ćeraja disave greške hem so mangela te oprostini okolenđe kola kajinena pe. Sose tano asavko? O dujto deo ando stih phenela: „Tu hijan pherdo verno mangipaja premalo sare kola rodena tut.“ Sar so dikhljam ko prethodno članko, o Jehova obećini so ka mothovi po verno mangipe premalo sare kola mangena le hem so niked na ka aćhavi len. Sebepi po verno mangipe, ov tano spremno te oprostini okolenđe kola kajinena pe (Is. 55:7). Ako tano tuće pharo te uverine tut so o Devel oprostinđa tuće, puć tut: „Da li verujinava so o Jehova oprostini sarinenđe kola kajinena pe hem molinena le asi milost?“ Ako ja, onda šaj te ove sigurno so ov ka oprostini hem tuće ako molineja le asi milost hem oproštaj.

¹¹ Amen but utešini odova so đanaja so o Jehova potpuno haljola so hijam nesavršena (Ps. 139:1, 2). Odova jasno dićhola ko jekh aver e Davideso psalam kova šaj te pomožini amen te uverina amen so o Jehova oprostini amenđe.

SO O JEHOVA NA BISTRELA AMENDAR?

12-13. Premalo Psalam 103:14, so o Jehova na bistrela amendar hem ko so odova podstaknini le?

¹² Čitin Psalam 103:14. O David vaćeri kova tano jekh ando razlog sose o Jehova oprostini okolenđe kola kajinena pe. Ov phenđa so o Jehova „na bistrela so hijam praho“, so značini soj tano uvek svesno so hijam nesavršena. Akana ka dikha so o David manglja odoleja te phenel.

¹³ O David phenela so o Jehova „šukar đanela sostar hijam ćerde“. Ov ćerđa e Adame ando „phuvjako praho“ hem šukar đanela so valjani e savršeno manušenđe, sar na primer hem on valjani te han, te soven hem te dišinen (Post. 2:7). Ama, odolese so o Adam hem i Eva grešinđe, o manuša tane praho ko jekh aver način. Sar olenge potomkija, amen nasledinđam o greh kova ćhivela amen te ćera lošna buća. O Jehova na samo soj tano svesno so hijam nesavršena nego o David phenela so ov odova „na bistrela“ hem odolese tano samilosno premalo amende. Šaj te phena so e Davidese lafija značinena akava: O Jehova đanela so ka ćera greške, ov dikhela ked amen ćaće kajinaja amen hem mothovi amenđe milosrđe hem oprostini amenđe (Ps. 78:38, 39).

14. (a) So pana phenđa o David ando odova sar o Jehova oprostini? (Psalam 103:12) (b) So šaj te sikljova ando odova sar o Jehova oprostinđa e Davidese? (Dikh o okvir „Sar o Jehova oprostini hem bistrela?“)

¹⁴ So pana šaj te pomožini amen te uverina amen so o Jehova oprostinđa amenđe? (Čitin Psalam 103:12.) O David phenđa so ked o Jehova oprostini amenđe, ov cidela amare grehija „kobor o istok tano dur ando zapad“. O istok tano but dur ando zapad hem on niked našti te resen pe. So odova vaćeri amenđe ando grehija kola o Jehova oprostini? Jekh biblijako rečniko odova ađahar objasnini: „Ako disavo greh cidela pe odobor dur, onda šaj te ova sigurna so na ka ovel nisavo trag, avere lafencar nisavo miris hem nisavo sećanje ko odova greh.“ Razmislin akalestar. Disavo miris šaj te podsetini amen ko diso, ama ked o Jehova oprostini amenđe na aćhola ništa so ole ka podsetini ko amaro greh, niti bi ov mangela te kaznini amen aso odova (Jezek. 18:21, 22; Dela 3:19).

15. So šaj te ćera ako isi amen osećaj andi krivica?

¹⁵ Sar šaj e Davidese lafija ando 103. psalam te pomožinen amen te uverina amen ko odova so o Jehova oprostinđa amenđe? Ako isi tut osećaj andi krivica sebepi odova so ćerđan, puć tut: „Da li bistrava odova so o Jehova pamtini, a odova tano so ov tano svesno so hijam nesavršena hem so oprostini okolenđe kola kajinena pe? Isto ađahar, da li pamtinava odova so o Jehova birinđa te bistrel, a odova tano so ov bisterđa o greške kola ćerđam hem niked na ka kaznini amen sebepi odova?“ O Jehova na razmislini ando greške kola ćerđam, a odova na valjani ni amen te ćera (Ps. 130:3). Ako ka uverina amen so o Jehova oprostinđa amenđe, amen ka uspina te oprostina kokri amenđe hem te nastavina te služina radosno e Jehovase.

16. Vaćer jekh primer kova mothovi kobor tano opasno non-stop te razmislina ando greške kola o Jehova oprostinđa amenđe. (Dikh i slika.)

¹⁶ Razmislin ando jekh primer. Ako isi tut osećaj andi krivica, odova tano sar ka phene vozineja vorda, a non-stop dikheja ko retrovizor. Šukar tano podijekh puti te dikhe ko retrovizor te šaj te reagujine ako palal isi disavi opasnost. Ama, ako mangeja te vozine bezbedno, tu mora te dikhe anglal. Ko slično način, šukar tano podijekh puti te razmislina ando greške kola ćerđam sose šaj te sikljova olendar hem te ova pana poodlučna te na ponovina len. Ama, ako non-stop razmislinaja olendar, o osećaj andi krivica šaj te lel amari radost hem te sprečini amen te da amaro najšukar e Jehovase akana. Odolese, amen mangaja te usredsredina amen ko drumo kova tano anglo amende. Amen đaja ko drumo kova legari ko Jehovaso nevo sveto kuri sa amare lošna sećanja ni „ki godi“ na ka aven amenđe (Is. 65:17; Posl. 4:25).

HEM PONODRI UVERIN TO VILO SO O JEHOVA OPROSTINĐA TUĆE

17. Sose hem ponodri valjani te uverina amaro vilo ko Jehovaso mangipe hem ko odova so ov oprostini amenđe?

¹⁷ Amen valjani hem ponodri te uverina amaro vilo so o Jehova oprostinđa amenđe (1. Jov. 3:19; fusn.). Sose? Odolese so o Satana mangela te verujina so o Jehova na mangela amen hem so našti te oprostini amenđe. Oleso cilj tano isto, ov mangela te ćhinavi amen te služina e Jehovase. Odolese so aćhilo le hari vreme, ov pana pobuter ka napadini amen (Otkr. 12:12). Ama, na valjani te dozvolina lese te pobedini amen!

18. So šaj te ćere te šaj te uverine to vilo so o Jehova mangela tut hem so oprostini tuće?

¹⁸ Te šaj te uverine tut so o Jehova mangela tut, primenin o predlogija ando prethodno članko. Te šaj te uverine to vilo so o Jehova oprostinđa tuće, razmislin ando odova so o Jehova phenđa pestar. Razmislin hem ando odova so i Biblija phenela ando Jehovaso opraštanje. Ma bistri so o Jehova tano svesno so hijan nesavršeno hem so ka mothovi tuće milosrđe. Isto ađahar, nek ovel tut ki godi so ked o Jehova oprostini, ov odova ćerela potpuno. Tegani, hem tu sar o kralj David ka phene: „Hvala Jehova so ’oprostinđan mi krivica, me grehija‘ “ (Ps. 32:5).