Vićin e starešinen

1. Sar o Jehova mothovđa so olese bakre tane dragocena olese?

E JEHOVASE tane olese bakre but dragocena. Ov ćinđa len e Isusese rateja hem ćhivđa e starešinen te brininen pe olendar (Dela 20:28). O Devel mangela o starešine šukar te ponašinen pe premalo lende. On sledinena e Isuseso vođstvo ađahar so ohrabrinena e phralen hem e phenjen hem pomožinena len te aćhon verna e Jehovase (Is. 32:1, 2).

2. Kastar o Jehova posebno brinini pe? (Jezekilj 34:15, 16)

² O Jehova brinini pe kotar sa pe bakre, a posebno obratini pažnja upro okola soj tane slaba hem upro okola so ćerđe disave greške. Odolese prekalo starešine mangela te pomožini lenđe. (Čitin Jezekilj 34:15, 16.) Ama, ov mangela amen kokri te roda pomoć ked valjani amenđe. Uzo odova so ki molitva ka roda lestar pomoć, amen ka roda pomoć hem ando „pastirija hem učiteljija“ ki skupština (Ef. 4:11, 12).

3. Sose tano šukar te haljova sar o Jehova pomožini amen prekalo starešine?

³ Ko akava članko ka dikha sar o Jehova prekalo starešine pomožini okolenđe kola nane više odobor paše oleja. Ka dobina odgovor ko trin pućiba: Ked valjani te roda pomoć ando starešine? Sose valjani te ćera odova? Sar šaj on te pomožinen amen? Iako akana šaj nane amen nisavo problemi, akava članko ka pomožini amen te ova zahvalna e Jehovase so isi amen starešine hem te đana so te ćera ked ka valjani amenđe olengi pomoć.

KED VALJANI TE VIĆINA E STAREŠINEN?

4. Sar đanaja so o lafija kotar Jakovljeva 5:14-16, 19, 20 odnosinena pe upro okola soj tane duhovno naborme? (Dikh o slike.)

⁴ E Isuseso učeniko o Jakov phenđa sar o Jehova pomožini amen prekalo starešine. Ov phenđa: „Da li tano neko nabormo maškaro tumende? Nek vićini e starešinen andi skupština.“ (Čitin Jakovljeva 5:14-16, 19, 20.) O kontekst ando akala stihija mothovi so o Jakov vaćerđa ando okola soj tane duhovno naborme. Odolese, ov phenđa so okova kova tano nabormo valjani te vićini e starešinen, a na e doktore. A te šaj i osoba koja tani duhovno nabormi te saćol, valjani te oven oprostime olake grehija. Aće jekh primer. Ked hijam naborme amen valjani te đa ko doktori, te vaćera lese soj tano amenđe hem palo odova te ćera odova so phenđa amenđe. Ko slično način, ked valjani amenđe pomoć te ova palem paše e Jehovaja, valjani te vaćera e starešinencar, te phena lenđe soj tano o problemi hem palo odova te ićera amen ko savet kova dinđe amen ando Devleso Lafi.

5. Sar šaj te proverina amaro duhovno sastipe?

⁵ Ko panđto poglavlje ko Jakoveso lil hijam ohrabrime te vaćera e starešinencar ked primetinaja so počminđam te našala amaro amalipe e Jehovaja. Naravno, but tano važno te roda pomoć angleder te desini pe odova. Amen valjani te ova iskrena kokri amencar. Ki Biblija pisini so šaj lokho te hovava kokri amen (Jak. 1:22). Odova desinđa pe disave hrišćanenđe ko Sard. O Isus upozorinđa len hem phenđa lenđe so on više na ćerena odova so o Devel rodinđa olendar (Otkr. 3:1, 2). Jekh način sar šaj amen te proverina amaro duhovno sastipe tano te razmislina odolestar da li hem akana amaro amalipe e Jehovaja tano isto sar ked počminđam te služina lese (Otkr. 2:4, 5). Šaj te puća amen: „Da li uživinava đi čitinava e Devleso Lafi hem hor razmislinava ando odova so čitinđum? Da li isi man plan ked spreminava man aso sastankija hem da li đava redovno? Da li hijum pana revno ki služba ili akana pobuter mangava te ćerav disave avera buća? Da li akana razmislinava ando pare pobuter nego angleder?“ Ako tano o odgovor ko akala pućiba ja, tegani amaro amalipe e Jehovaja nane odobor zoralo kobor bi valjani te ovel. Isto ađahar, verovatno ka ovel poslabo ako ništa na ćeraja. Odolese, ako našti kokri te zorjaćera amaro amalipe e Jehovaja ili ako već ćerđam diso so o Jehova na mangela, valjani te roda pomoć ando starešine.

6. So valjani te ćeren okola kola ćerđe ozbiljno greh?

⁶ Naravno okola kola ćerđe disavo ozbiljno greh, sebepi kova šaj te oven cidime andi skupština, valjani odova te vaćeren nekase ando starešine (1. Kor. 5:11-13). E osobaće koja ćerđa ozbiljno greh valjani pomoć te šaj palem te ovel paše e Jehovaja. O Jehova šaj te oprostini amare grehija samo ako ćaće kajinaja amen (Dela 26:20). Jekh način sar šaj te ćera odova tano te vaćera e starešinenđe odova so ćerđam.

7. Ko pana valjani te rodel pomoć ando starešine?

⁷ O starešine na pomožinena samo okolenđe kola ćerđe ozbiljno greh, već hem okolenđe kola tane duhovno slaba (Dela 20:35). Na primer, šaj daraja so na ka šaj te borine tut protiv te pogrešna želje. Šaj tano tuće posebno pharo ako angleder te upoznajine o ćaćipe leljan droga, dikhljan pornografija ja ćerđan nemoral. Ama, ma bistri so tu na hijan kokri. Šaj odolestar te vaćere disave starešinaja. Ov pažljivo ka šunel tut, ka del tut savet hem ka uverini tut ko odova so o Jehova ka ovel but bahtalo ako na ka postupine premalo te pogrešna želje (Prop. 4:12). Ako obeshrabrinđan tut sose pana isi tut disave pogrešna želje, o starešine šaj te setinćeren tut ko odova so e Jehovase tano but drago so tu rodinđan pomoć. Odova mothovi so na hijan samouvereno hem so mangeja te arakhe to amalipe oleja (1. Kor. 10:12).

8. Da li valjani te roda pomoć ando starešine asi svako greška koja ćeraja? Objasnin.

⁸ Ama, na valjani te roda pomoć ando starešine asi svako greška koja ćeraja. Na primer, šaj lafencar povredinđam disave phrale ja phenja ja čak holjanđam upro lende. Umesto odmah te đa ko starešine, pošukar bi ovela te ćera odova so o Isus phenđa te šaj te ova ko mir amare phraleja ili phenjaja (Mat. 5:23, 24). Isto ađahar, šaj te proučina disavo materijali kova ka pomožini amen te ova blaga, strpljiva hem te ovel amen samokontrola. Ako ipak našti te rešina odova problemi, tegani šaj te roda pomoć ando starešine. O apostol Pavle pisinđa lil e hrišćanenđe ando Filipi hem podstakninđa jekhe phrale, kaso anav na đanaja, te pomožini e Sintihijaće hem e Evodijaće te rešinen o problemi kova hine len maškaro peste. Ko slično način, jekh starešina ki skupština šaj te pomožini hem amenđe (Fil. 4:2, 3).

SOSE VALJANI TE VIĆINA E STAREŠINEN?

9. Sose na valjani te mukha i lađ te ćhinavi amen te vićina e starešinen te pomožinen amen? (Poslovice 28:13)

⁹ Ako ćerđam disavo ozbiljno greh ja pana isi amen disave pogrešna želje, nane amenđe lokho te vaćera e starešinencar. Ka valjani amenđe hrabrost hem vera te šaj te ćera odova. Ama, na valjani te mukha i lađ te ćhinavi amen te ćera odova. Sose? Odolese so o Jehova ćhivđa e starešinen te pomožinen amen amaro amalipe oleja te ovel zoralo. Ked vaćeraja e starešinencar, amen mothovaja so verujinaja e Jehovase hem mangaja te ova lese poslušna. Svesna hijam so amenđe valjani olesi pomoć te šaj hem ponodri te ćera odova soj tano ispravno (Ps. 94:18). Šaj te ova sigurna so o Jehova ka oprostini amenđe ako vaćeraja e starešinenđe so ćerđam hem ako ćhinavaja te ćera odova soj tano lošno. (Čitin Poslovice 28:13.)

10. So šaj te ovel ako mangaja te garava amare grehija?

¹⁰ Ako vaćeraja e starešinenđe ando greh kova ćerđam, o Jehova ka oprostini amenđe hem amen palem šaj te ova amala oleja. Ama ako na vaćeraja lenđe, tegani i situacija šaj te ovel pana pološno. Jekh vreme o kralj David nikase na vaćerđa kola grehija ćerđa. Sebepi odova hine uznemirimo hem hine lese but pharo sose đanđa so ruminđa po amalipe e Jehovaja (Ps. 32:3-5). Ked hijam naborme ja isi amen disavi povreda, so pobuter ađićeraja te đa ko doktori pana pobari dukh šaj te osetina. Ko slično način, ako ćerđam disavo ozbiljno greh so pobuter ađićeraja hem na vaćeraja e starešinenđe odova so ćerđam, amenđe ka ovel pana pološno. O Jehova haljola amen hem vićini amen te „vaćera“ oleja, avere lafencar te vaćera e starešinencar prekalo kola mangela te pomožini amen palem te ova paše oleja (Is. 1:5, 6, 18).

11. Sar šaj upro avera te utičini ako garavaja disavo ozbiljno greh?

¹¹ Ako garavaja o greh kova ćerđam, odova šaj te utičini hem upro avera. Sebepi odova, o Jehova šaj te ćhinavi te del po sveti duh e phralenđe hem e phenjenđe ki skupština hem te na ovel mir maškaro lende (Ef. 4:30). Isto ađahar, ako đanaja so neko ki skupština ćerđa ozbiljno greh, valjani te podstaknina le te vaćeri odolestar e starešinencar.a Ako ov na ćerela odova, tegani amen valjani te ćera odova. A ako ni amen na ćeraja odova, tegani anglo Jehovase jaćha učestvujinaja ko oleso greh (Lev. 5:1). Odolese so mangaja e Jehova, amen valjani te vaćera e starešinenđe ako neko ćerđa disavo ozbiljno greh. Ađahar šaj te zaštitina amare phralen hem phenjen hem te pomožina okolese kova ćerđa ozbiljno greh te ovel palem paše e Jehovaja.

SAR POMOŽINENA AMEN O STAREŠINE?

12. Sar o starešine pomožinena okolenđe soj tane duhovno slaba?

¹² Ki Biblija pisini so o starešine valjani te pomožinen okolenđe kola tane duhovno slaba (1. Sol. 5:14). Ako ćerđan disavo greh, o starešine šaj ka pućen tut disave pućiba te šaj te haljon sostar razmislineja hem sar osetineja tut (Posl. 20:5). Tuće šaj na ka ovel lokho te vaćere odolestar sose šaj lađaja te phene so desinđa pe. Ama, tu šaj te pomožine len ako pheneja lenđe sovaja borineja tut. Ma brinin tut so ka phene diso pogrešno (Jov 6:3). O starešine na ka anen zaključak sigate, već pažljivo ka šunen tut hem ka trudinen pe te ovel len celo slika angleder te den tut disavo savet (Posl. 18:13). O starešine đanena so valjani vreme te šaj nekase te pomožini pe, odolese haljona so disavo puti ka valjani pobuter ando jekh razgovor te šaj te pomožinen tut.

13. Sar o starešine pana pomožinena amen? (Dikh o slike.)

¹³ O starešine na mangena te ćhiven tut te osetine tut pana pološno sebepi odova so ćerđan. Umesto odova, on ka molinen pe tuće. Šaj ka iznenadine tut kobor „bari snaga“ isi la olengi molitva. Ked i osoba vićini e starešinen, on ka pomožinen laće ađahar so ka makhen lako šero „uljeja ko Jehovaso anav“ (Jak. 5:14-16). Odova „ulje“ odnosini pe ko ćaćipe ando Devleso Lafi. Odolese, o starešine ka vaćeren tuvaja ando disave biblijake stihija kola ka utešinen tut hem ka pomožinen tut palem te ovel tut šukar amalipe e Jehovaja (Is. 57:18). Olengo savet kova avela ando Devleso Lafi, šaj te del tut snaga hem ponodri te ćere okova soj tano ispravno. Prekalo lende, tu šaj te šune e Jehovaso glaso sar phenela tuće: „Odova tano o drumo, [đa] odole drumoja“ (Is. 30:21).

14. Premalo Galatima 6:1, sar o starešine pomožinena okolenđe so pođinđe „ko pogrešno drumo“? (Dikh o slike.)

¹⁴ Čitin Galatima 6:1. Ked jekh hrišćanin pođini „ko pogrešno drumo“, ov u stvari ćerela odova so nane premalo Jehovase merilija. Odova šaj te značini so odija osoba anđa disavi pogrešno odluka ili ćerđa disavo ozbiljno greh. O starešine mangena e phralen hem e phenjen hem odolese tane „blaga“ đi pomožinena e osobaće „te irini pe ko pravo drumo“. O grčko izraz kova tano akate prevodimo e lafencar „te irini pe ko pravo drumo“ šaj te odnosini pe hem ko odova ked o doktori namestini o phago kokalo te šaj šukar te saćol. O šukar doktori ka ovel pažljivo đi trudini pe te irini o kokalo ko than te na bi i osoba ovela la pana pobari dukh. Ked o starešine trudinena pe te pomožinen nekase ko pođinđa ko lošno drumo, on dena sa pestar te oven blaga sose na mangena olengo phral te osetini pana pobari dukh. Isto ađahar, ki Biblija pisini so o starešine valjani te „pazinen upro [peste]“. Đi pomožinena nekase te primenini disavo savet andi Biblija, on na ka bistren so hem on tane nesavršena hem so ćerena greške. Odolese, on ka oven oprezna hem niked na ka mislinen soj tane pošukar andi osoba kolaće trudinena pe te pomožinen. Umesto odova, ka trudinen pe te mothoven saosećanje hem te oven ponizna (1. Petr. 3:8).

15. So šaj te ćera ako isi amen disavo problemi?

¹⁵ Amen šaj te ovel amen poverenje upro amare starešine. O Jehova sikavi len so na valjani te vaćeren averenđe ando amare privatna buća. Isto ađahar, sikavi len te den amen savetija andi Biblija, a na te phenen amenđe odova so on mislinena soj tano ispravno. Uzo odova, on haljona so valjani hem ponodri te pomožinen amen te ikljova ko krajo amare problemencar (Posl. 11:13; Gal. 6:2). Svako olendar tano averćhane hem nane len sare isto iskustvo. Ama, amen šaj te obratina amen bilo kase olendar. Naravno amen na ka đa kotar jekh đi aver sa đi neko olendar na phenela amenđe odova so mangaja te šuna. Ako bi odova ćeraja, tegani bi ovaja sar o manuša kola samo mangena te phenel pe lenđe „okova so mangena te šunen“, a na odova so o Jehova mangela te sikavi len ando po Lafi (2. Tim. 4:3). Ked rodaja pomoć ando disavo starešina, ov šaj ka pućel amen da li već vaćerđam avere starešinencar hem kova savet dinđe amen. Odolese soj tano skromno, ov šaj ka pućel avere starešina aso savet (Posl. 13:10).

AMARI ODOGOVORNOST

16. Savi odgovornost isi le svako amendar?

¹⁶ Iako o starešine brininena pe ando Devleso stado, on na ka phenen amenđe so valjani te ćera. Svako amendar isi le odgovornost te mothovi e Jehovase pe lafencar hem pe deloncar so mangela le hem so mangela te ugodini lese. Uzi Jehovasi pomoć, amen šaj te ana mudra odluke hem te aćhova verna (Rimlj. 14:12). Odolese, o starešine na ka phenen amenđe so valjani te ćera nego ka den amen savet andi Biblija kova ka pomožini amen te haljova sar o Jehova razmislini hem te ana kokri odluke. Ako razmislinaja ando odova hem primeninaja olengo savet andi Biblija, ka sikljova te razmislina sar o Jehova hem ka ana mudra odluke (Jevr. 5:14).

17. So o Jehova mangela sare te ćera?

¹⁷ Amen hijam but zahvalna e Jehovase so odobor šukar birini pe amendar. Ov bićhalđa e Isuse, kova tano „šukar pastiri“, te platini i otkupnina te šaj te ovel amen prilika večno te živina (Jov. 10:11). A ked dinđa e starešinen te brininen pe andi skupština, o Jehova ispuninđa po obećanje kova phenela: „Ka dav tumen pastirija kola tane pali mi volja hem on ka parvaren tumen ađahar so ka koristinen po đandipe hem pi razboritost“ (Jer. 3:15). Odolese, ked hijam ko duhovno pogled slaba ja naborme, amen valjani te roda pomoć ando starešine. Hajde sare te ova odlučna te koristina i pomoć koja o Jehova dela amen prekalo amare starešine.