Šel berš angleder – 1925.

KED NEKO BUT AĐIĆERI

But Istraživačija andi Biblija verujinđe so ko 1925. berš i phuv ka ovel raj. Sose? O phral Albert Šroder, kova kasnije služinđa sar član ando Vodeće telo, pisinđa: „Ko 1925. berš verujinđam so o pomazanikija ka đan ko nebo, a o verna manuša, sar na primer o Avraham hem o David, ka uskrsninen hem ka predvodinen ki phuv.“ Odolese so odova na desinđa pe, but phralja hem phenja razočarinđe pe (Posl. 13:12).

Ama, iako hine razočarime, nastavinđe te propovedinen. On haljilje so odija tani i najvažno buti koja valjani te ćeren. Hajde te dikha sar koristinđe o radio te propovedinen bute manušenđe.

GRADINENA PANA RADIO-STANICE

Ko 1924. berš, but manuša šunđe amari radio-stanica WBBR. Ama ko 1925. berš, o Istraživačija andi Biblija gradinđe pana jekh radio-stanica, paše uzo Čikago, ko Ilinois. Oj vićinđa pe WORD, so značini „lafi“. O Ralf Lefler, kova pomožinđa te gradini pe odija stanica, phenđa so raćate ked hine but šudro o manuša kola živinđe but dur šunđe akija radio-stanica. Na primer, jekh porodica koja živinđa pobuter ando 5 000 kilometrija dur ki jekh tikni diz, ki Aljaska šunđa jekh ando prvo program ki odija stanica. Palo odova, on pisinđe jekh lil okolenđe so ćerđe buti othe te zahvalinen pe olenđe so pripreminđe odobor ohrabrujućo program hem so pomožinđe lenđe te sikljon pobuter ando Devel.

Ki Stražarsko kula ando 1. decembar ko 1925. berš hine phendo sose but manuša šaj hine te šunen o program iako hine but dur. Odothe pisinđa: „Akija radio-stanica tani najzorali ki Amerika.“ O manuša šaj hine te šunen o program andi obala ko Atlantik đi i obala ko Pacifik hem andi Kuba pa čak đi o severno deo ki Aljaska. But đene kola niked angleder na šunđe o ćaćipe, manglje te sikljon pobuter sebepi akija radio-stanica.

Ko isto vreme, o Istraživačija andi Biblija manglje te koristinen o radio te šaj te propovedinen hem ki Kanada. Ko 1924. berš hine gradimi i prvo radio-stanica ko Saskatun, ki država Saskačevan. Odova hine prvo religiozno radio ki Kanada. Ko 1925. berš, on morandilje te arakhen jekh pobaro than asi odija radio-stanica. Odolese, i organizacija valjanđa te premestini o studio ko jekh purano pozorište ko Saskatun kova ćinđe hem renovirinđe.

Sebepi akija stanica, but manuša kola živinđe ko tikne dizja hem gava ki država Saskačevan, prvo puti šunđe i šukar vest. Na primer, ki jekh tikni diz i gospođa Grejam palo odova so šunđa o program ki amari radio-stanica, pisinđa e phralenđe hem rodinđa lendar te bićhalen laće literatura. O phral Džordž Nejš phenđa so ando lake lafija dićhilo so hitno valjani laće pomoć hem odolese odmah bićhalđe laće celo kompleti ando Studije Pisma. Sigate palo odova, i gospođa Grejam propovedinđa ando Devleso Kraljevstvo čak hem ko dur thana.

JEKH NEVO OBJAŠNJENJE

Ki Stražarsko kula kotar 1. mart, ko 1925. berš hine objavimo o članko kova vićinđa pe „Rođenje nacije“. Sose hine važno akava članko? O Istraživačija andi Biblija đanđe so o Satana isi le pi organizacija. Ov vladini upro demonija, upro hovavne religije hem upro trgovačka hem politička elementija ki phuv. Ama, prekalo akava članko „o verno hem razborito robo“ pomožinđa e phralenđe te haljon so hem o Jehova isi le pi organizacija koja tani averćhane kotar Satanasi (Mat. 24:45). Isto ađahar, ki kula pisinđa so e Devleso Kraljevstvo bijandilo ko 1914. berš hem so ko odova berš, odolese so hine maribe ko nebo, o Satana hem olese demonija hine fordime kotar nebo hem akana tane ki phuv (Otkr. 12:7-9).

Disave phralenđe hem phenjenđe hine pharo te prihvatinen akava nevo objašnjenje. Odolese, ko odova članko pisinđa: „Sare kase tano pharo te prihvatinen akava nevo objašnjenje, valjani te oven strpljiva hem te osloninen pe upro Jehova đi hem ponodri verno služinena lese.“

O phral Tom Er andi Britanija, kova služinđa sar kolporteri (odova tano akana pioniri), phenđa so but Istraživačija andi Biblija mislinđe ando akava članko: „O phralja hine oduševime ked šunđe o objašnjenje kotar Otkrivenje 12. poglavlje. Ked haljiljam so e Devleso Kraljevstvo počminđa te vladini ko nebo, amen jedva ađićerđam odova te vaćera averenđe. Odova podstakninđa amen pana pobuter te propovedina hem pomožinđa amen te haljova so o Jehova ka ćerel but šuže buća ki budućnost.“

SVEDOČINAJA ANDO JEHOVA

Avdije, e Jehovase svedokija but putija vaćerena ando lafija kotar Isaija 43:10: „’Tumen hijen me svedokija‘, phenela o Jehova, ’hem mo sluga kole birinđum.‘ “ Angleder o 1925. berš, akava stih na pominđa pe odobor but ko amare publikacije. Ama, odova meninđa pe. Kotar 1925. berš, o stihija ando Isaija 43:10, 12 razmotrinđe pe ko 11 izdanja andi Stražarsko kula.

Ko krajo ando avgust ko 1925. berš, o Istraživačija andi Biblija ćedinđe pe ko jekh kongres ki Indijanapolis, ki Indijana. O phral Raterford pisinđa jekh poruka aso delegatija. Odija poruka hine ko kongresno program hem uduri pisinđa: „Amen aljam ko akava kongres [. . .] te šaj te dobina snaga ando Gospod hem ked ka irina amen te ovel amen pana pobari želja te ova olese Svedokija.“ Ko odola ofto dive kobor trajinđa o kongres, hijam le ohrabrime te koristina svako prilika te svedočina ando Jehova.

Ki subota ko 29. avgust, o phral Raterford hine le govor kova vićinđa pe „Poziv asi akcija“. Ov naglasinđa kobor tano važno te propovedini pe ađahar so phenđa: „O Jehova phenela pe narodose: ’Tumen hijen me svedokija, [. . .] a me hijum o Devel.‘ “ Palo odova, ov jasno hem glasno phenđa: „’Vazden e narodonđe znak te ćeden pe.‘ Jedina manuša ki phuv kola svedočinena ando Jehova tane okola kase ov pomožini prekalo po sveti duh sose tane on oleso narodo“ (Is. 43:12; 62:10).

Palo govor, ov čitinđa jekh rezolucija koja vićinđa pe „Poruka andi nada“. I publika prihvatinđa odija poruka ki koja pisinđa so e Devleso Kraljevstvo tano jedino način sar šaj te ovel amen „mir, nada, sastipe, večno životi, sloboda hem bahtalipe“. Odija rezolucija kasnije hine prevodimi hem štampimi sar traktati te šaj te koristini pe ki služba hem dinđam oko 40 milionija kopije.

O Istraživačija andi Biblija pana nekobor berš na vićinđe pe e Jehovase svedokija. Ama, počminđe te haljon kobor tano važno te svedočinen ando Jehova.

POČMINĐAM TE ĐA KO POSETE

Odolese so ko celo sveto barilo o broj kotar Istraživačija andi Biblija, i organizacija podstakninđa len na samo te den literatura nego hem te posetinen e manušen kola hine zainteresujime asi šukar vest. Palo odova so delinđe o traktati Poruka andi nada, ko Biltena pisinđa: „Irinen tumen hem posetinen e manušen kase dinđen o traktati.“

Ko januar ko 1925. berš, ko Bilten hine objavimo so phenđa jekh phral kotar Teksas. Ov phenđa: „But hijam le iznenadime so često o manuša kolen posetinđam pošukar reagujinđe ando okola kolenđe propovedinđam ko nevo područje. Ki jekh tikni diz ko amaro područje hine propovedimo panđ putija ko zadnja deš berš [. . .] Ama akana sigende, i phen Hendriks hem mi daj palem đelje uduri te propovedinen hem dinđe pobuter knjige neko iked angleder.“

Jekh kolporteri kotar Panama pisinđa: „But manuša kola o prvo puti na manglje te šunen man, but averćhane reagujinđe ked đeljum o dujto ja o trito puti. Akava berš trudinđum man te đav ko okola kolen posetinđum angleder hem hine man but šukar iskustvo olencar.“

RAZMISLINAJA ANDI BUDUĆNOST

Ko krajo ando 1925. berš, o phral Raterford pisinđa jekh lil sa e pionirenđe kuri vaćerđa ando odova so ćerđa pe ki služba odova berš hem so valjani te ćeren aver berš. Ov phenđa: „Akava berš hine amen posebno čast te utešina bute manušen ko amaro područje. Sebepi odova hijam but bahtale [. . .] Ko 1926. berš ka ovel tumen but prilike te svedočinen ando Devel hem ando oleso Kraljevstvo hem te mothoven koj tane ćaće olese sluge. [. . .] Odolese, hajde hem ponodri te koristina amaro glaso te hvalina amare Devle hem Kralje.“

Ko krajo ando 1925. berš, o phralja počminđe te ćeren planija sar te proširinen amare objektija ko Bruklin. Ko 1926. berš, ka počmini pe jekh najbaro projekat ki amari organizacija.