O cene ko sveto barjona – So i Biblija phenela odolestar?

„I svetsko ekonomija palem tani ki opasnost“, vaćerđa o predsednik kotar Grupa andi Svetsko banka ko izveštaj ando jun 2022. berš. „O cene sigate barjona, a ko isto vreme, o manuša isi len sa pohari pare.“

Premalo Međunarodno monetarno fond „o cene ando gorivo hem andi hrana but sigate barjona, hem najpharo tano e manušenđe so živinena ko ćorore phuvja.“

I Biblija pomožini amen te haljova sose isi amen ekonomska problemija, sar šaj te ikljova olencar ko krajo, hem da li ka avel o dive ked o ekonomska problemija zauvek ka oven rešime.

Ko „poslednja dive“ o cene ka oven sa pobare

• Aso vreme ko kova živinaja, i Biblija phenela soj tane „poslednja dive“ (2. Timoteju 3:1).

• O Isus phenđa so ko akava period ka desinen pe o buća kola ka daraven e manušen (Luka 21:11). O manuša darana ked o cene barjona. On brininena pe so ka ovel ki budućnost hem da li ka ovel len sova te parvaren pe porodica.

• O proročanstvo andi knjiga Otkrivenje mothovi so ko akava period o cene ka barjon. Othe pisini: „Hem šunđum diso sar glaso. . . sar vaćeri: ‘I mera ando điv aso denar hem trin mere ando ječam aso denar!’ “ (Otkrivenje 6:6).

Ako mangeja te đane pobuter ando „poslednja dive“ hem ando proročanstvo kotar Otkrivenje, dikh o video O sveto but menjinđa pe kotar 1914. berš hem čitin o članko „Šta predstavljaju četiri jahača Apokalipse?“

O rešenje aso sa o ekonomska problemija

• „On ka ćeren ćhera hem ka bešen ano lende, on ka sadinen o drakha hem ka han olengo plod. On na ka gradinen ćhera, a neko aver odothe te bešel, na ka sadinen, a neko aver te hal o rod“ (Isaija 65:21, 22).

• „Ki phuv ka ovel pherdo điv hem o najuće bregija ka oven pherde điveja“ (Psalam 72:16).a

• „O lošna maltretirinena okolen so patinena. Sebepi so rovena o ćorore manuša, me ka uštav te spasinav len. . . phenela o Jehova“ (Psalam 12:5).

Pana hari o Devel ka rešini o ekonomska problemija, ama na samo ki jekh phuv nego ko celo sveto. Ako mangeja te đane sar, čitin o članko „Da li je moguće ostvariti pravedan ekonomski sistem?“

Ama, čak avdije i Biblija šaj te pomožini tut te ikljove ko krajo odoleja so o cene but uštena. Sar? Ki Biblija isi praktična savetija ando odova sar mudro te koristina o pare (Poslovice 23:4, 5; Propovednik 7:12). Ako mangeja te đane sar, čitin o člankija „Pazite kako raspolažete novcem“ hem „Kako živeti s manje novca“.