So premali Biblija značini te ova tolerantna?

„Ko sveto šaj te ovel mir jedino ako tane o manuša tolerantna“ (Unesko, Deklaracija o načelima tolerancije, 1995.)

Ki aver strana, ked o manuša nane tolerantna, on mothovena so na poštujinena averen hem so mrzinena len. Sebepi asavke osećanja, but putija ikljona ružna lafija, ovena razlike maškaro manuša, pa čak avela hem đi o nasilje.

But manuša avdije isi len različito mišljenje ando odova so i tolerancija značini. Disave mislinena so ako hijan tolerantno, tu mora te podržine averenge postupkija hem ponašibe. A disave avera isi len slično stav ando kova vaćeri i Biblija. On poštujinena svakoneso pravo te anel pese odluke hem te verujini ko odova so ov mangela, čak iako on lično na slažinena pe odoleja.

Da li šaj avdije i Biblija te pomožini e manušenđe te oven ćaće tolerantna?

Da li i Biblija mothovi so valjani te ova tolerantna?

I Biblija mothovi so valjani te ova tolerantna. Koro late pisini: „Tumari razumnost nek ovel penđardi sa e manušenđe“ (Filipljanima 4:5). Oj podstaknini amen te ova razumna, ljubazna hem pravedna premalo manuša. Okola so ićerena pe ko akava savet poštujinena averenge odluke ja mišljenje, čak iako on lično na slažinena pe odoleja.

Ki aver strana, i Biblija mothovi so o Devel odredinđa soj tano šukar, a soj tano lošno. Koro late pisini: „[O Devel] phenđa tuće, manušeja, soj tano šukar“ (Mihej 6:8). O Devel dela amen savetija sose mangela te ovel amen o najšukar životi (Isaija 48:17, 18).

O Devel na dinđa amen pravo te sudina averenđe. Premali Biblija, „isi samo jekh kova dela o zakonija hem jekh Sudija. . . A ko hijan tu te osudine te pašutne?“ (Jakovljeva 4:12). O Devel svakonese amendar dinđa pravo te anel odluke aso kola kokri hijam odgovorna (Ponovljeni zakoni 30:19).

So i Biblija vaćeri ando poštovanje?

I Biblija phenela so valjani te „poštujina sa e manušen“ (1. Petrova 2:17, Daničić-Karadžić). Okola so ićerena pe ko e biblijake savetija poštujinena svakone, bizo obzir ko so on verujinena ja sar živinena (Luka 6:31). Odova na značini so on odobrinena sa so o manuša ćerena hem sa so on verujinena niti podržinena sa olenge odluke. Umesto te mothoven so na poštujinena averen, on dena sa pestar te oponašinen e Isuse ko odova sar ov ponašinđa pe averencar.

Na primer, jekhvar o Isus reslja jekha romnja koja hine ki religija koja o Devel na prihvatinđa. Uzo odova, odija romni živinđa ko način kova o Isus na podržinđa – živinđa e manušeja kova na hine olako rom (Jovan 4:9, 17-24).

Sar o Isus, hem amen hijam spremna te objasnina ko so verujinaja okolenđe kola mangena te šunen, ama đi ćeraja odova mothovaja „hor poštovanje“ (1. Petrova 3:15). Amen nikas na ćhivaja zorjeja te prihvatini amaro mišljenje. Ko Devleso Lafi pisini so e Devleso sluga „na ismini te svađini pe, nego valjani te ovel blago premalo sarinende“ so uključini hem okolen so na verujinena ko ista buća sar amen (2. Timoteju 2:24).

So i Biblija vaćeri andi mržnja?

I Biblija phenela: „Den sa tumendar te oven ko mir sarinencar“ (Jevrejima 12:14). Okova kova mangela te ovel ko mir sarinencar na mrzini averen. Ov na menini pe stavija sebepi averengo, već trudini pe te ovel ko mir averencar (Matej 5:9). U stvari, i Biblija podstaknini amen te manga amare dušmanen ađahar so ka ova šukar premalo olende iako on nane šukar premalo amende (Matej 5:44).

I Biblija phenela so o Devel mrzini o buća kolencar povredinaja averen (Poslovice 6:16-19). Akate koristini pe o lafi mrzini te bi mothovi so o Devel osetini premalo lošnipe. Ov ko po Lafi phenela soj tano spremno te oprostini hem te pomožini e manušenđe kola mangena te meninen pe hem te šunen le (Isaija 55:7).

E biblijake stihija kola tane povezime odoleja te ova tolerantna hem te mothova poštovanje

Titu 3:2: „Oven razumna hem uvek. . . oven blaga premalo sa o manuša.“

Matej 7:12: „Sa so mangena o manuša te ćeren tumenđe, ćeren hem tumen olenđe.“

Isus Navin 24:15: „Birinen avdije kase ka služinen.“

Dela apostolska 10:34: „O Devel na dikhela koj tano ko.“

Avakum 1:12, 13: „[O Devel] našti te trpini o lošnipe.“

Rimljanima 12:19: „Mukhen e Devle te mothovi pi holi. . . sose pisimo tano: ’Me ka irinav o lošnipe, me ka dav len odova so zaslužinena‘, vaćeri o Jehova.“a

O Jehova na dinđa pravo e manušenđe te irinen lošnipe lošnipaja. Ov ka anel i pravda ko vreme kova ov odredinđa. Ako mangeja te đane pobuter, čitin o članko „Hoće li ikada biti pravde za sve ljude?“