Ko đala ko nebo?
So phenela i Biblija?
O Devel birini jekh ograničeno broj ando verna manuša kola palo po meribe ka uskrsninen ko životi ko nebo (1. Petrova 1:3, 4). Te šaj okola soj tane birime te dobinen pi nebesko nagrada, on valjani te aćhon verna hem olengo ponašibe valjani te ovel čisto (Efešanima 5:5; Filipljanima 3:12-14).
So ka ćeren okola so đana ko nebo?
On ka služinen e Isuseja 1 000 berš sar kraljija hem sveštenikija (Otkrivenje 5:9, 10; 20:6). On ka oven deo ando „nevo nebo“, ja andi nevi nebesko vladavina hem ka vladinen upri „nevi phuv“ ja upro pravedna manuša kola ka živinen ki phuv. On ka pomožinen e manušenđe te oven savršena sar so o Devel ko početko manglja (Isaija 65:17; 2. Petrova 3:13).
Kobor đene ka uskrsninen ko životi ko nebo?
I Biblija mothovi so o 144 000 manuša ka usksninen ko životi ko nebo (Otkrivenje 7:4). Ko Otkrivenje 14:1-3, pisini so o apostol Jovan ki vizija dikhlja „e Bakre sar terđola ki gora Sion hem oleja o 144 000“. Ki akija vizija, o „Bakro“ predstavini e Isuse kova uskrsninđa (Jovan 1:29; 1. Petrova 1:19). I „gora Sion“ predstavini o baro položaj kova isi len o Isus hem o 144 000 kola vladinena oleja ko nebo (Psalam 2:6; Jevrejima 12:22).
Okola soj tane vićime hem birime te vladinen e Hristeja ko Kraljevstvo vićinena pe „tikno stado“ (Otkrivenje 17:14; Luka 12:32). Ked uporedinaja kobor isi e Isusese sledbenikija, o „tikno stado“ tano samo jekh tikni grupa ando manuša (Jovan 10:16).
Disave hovajba ando okola so đana ko nebo
Hovajbe: Sa o šukar manuša đana ko nebo.
Ćaćipe: O Devel phenđa so but manuša kola tane šukar ka živinen večno ki phuv (Psalam 37:11, 29, 34).
O Isus phenđa: „Nijekh na ukljilo ko nebo“ (Jovan 3:13). Odoleja manglja te phenel so o šukar manuša kola mulje angleder olestar, sar soj tane o Avraham, o Mojsije, o Jov hem o David, na đelje te živinen ko nebo (Dela apostolska 2:29, 34). Umesto odova, on hine len nada so jekh dive palem ka živinen ki phuv (Jov 14:13-15).
O uskrsenje ko životi ko nebo vićini pe „prvo uskrsenje“ (Otkrivenje 20:6). Odova mothovi so ka ovel pana jekh uskrsenje. Odova uskrsenje ka ovel ki phuv.
I Biblija sikavi amen so ked ka vladini e Devleso Kraljevstvo o meribe više na ka ovel (Otkrivenje 21:3, 4). Akava obećanje odnosini pe ki phuv, sose o meribe niked na hine ko nebo.
Hovajbe: Svako manuš kokri pese odlučini da li ka živini ko nebo ja ki phuv.
Ćaćipe: O Devel odlučini ko ando olese verna sluge ka dobini o životi ko nebo (Filipljanima 3:14). Čak hem te mange te živine ko nebo, tu našti te utičine ko odova (Matej 20:20-23).
Hovajbe: O večno životi ki phuv tano okolenđe so nane dostojna te živinen ko nebo.
Ćaćipe: O Devel phenela so okola so ka živinen večno ki phuv tane „oleso narodo“, „olese izabranikija“ hem „o potomstvo kova o Jehova blagoslovinđa“ (Isaija 65:21-23). Upro olende ka ispunini pe odova so o Devel kotar početko manglja e manušenđe – te živinen večno ko raj ki phuv hem te oven savršena (Postanak 1:28; Psalam 115:16; Isaija 45:18).
Hovajbe: O broj 144 000 kova pomini pe ko Otkrivenje tano samo simbolika.
Ćaćipe: Iako disave broja ko Otkrivenje tane samo simbolika, ipak disave olendar tane doslovna. Na primer, odothe vaćeri pe „ando 12 anava ando e Bakrese 12 apostolija“ (Otkrivenje 21:14). Hajde te dikha sose ked phenela pe 144 000 odova ćaće mislini pe.
Ko Otkrivenje 7:4 pisini „o broj ando okola kola tane obeležime pečateja [ja kolenđe tano potvrdimo so ka živinen ko nebo] – 144 000.“ Hari palo odova vaćeri pe andi aver grupa, ando „baro mnoštvo ando manuša, kolen niko naštinđa te đenel“. Isto ađahar, o Devel spasini hem okolen soj tane ando „baro mnoštvo“ (Otkrivenje 7:9, 10). Ako tano o broj 144 000 samo simbolika hem ako odnosini pe ki grupa ki koja na đanđola pe o tačno broj, tegani na bi ovela nisavi razlika maškaro odola duj grupe.a
[I FUSNOTA]
a Uzo odova, aso 144 000 phenela pe soj tane „ćinde kotar manuša sar prvine“ (Otkrivenje 14:4). O lafi „prvine“ odnosini pe ki jekh tikni birimi grupa. Odova lafi šukar opisujini okolen kola ka vladinen e Hristeja ko nebo upro but manuša ki phuv (Otkrivenje 5:10).