So e Devleso Lafi vaćeri ando odova ked i romni čistini pe?
So phenela i Biblija?
Ki Biblija na koristini pe o lafi „abortus“ hem na vaćeri pe ando odova ked neko namerno čistini pe. Ama, but stihija ki Biblija mothovena sar o Devel dikhela ko životi, pa čak hem ko životi ando ćhavoro kova pana na bijandilo.
O životi tano poklon ando Devel (Postanak 9:6; Psalam 36:9). Anglo olese jaćha svakoneso životi tano dragoceno, pa čak hem ando ćhavoro kova tano pana ko vođi. Ako neko namerno ćhinavi o životi ando ćhavoro kova pana na bijandilo, odova tano mudaripe.
Ko Zakon kova o Devel dinđa e Izraelcenđe pisini: „Ako o manuša marena pe hem khuvena jekha romnja koja tani khamni hem oj bijani e ćhave angleder o vreme, ama ni oj ni o ćhavo na merena, okova soj krivo valjani te platini i šteta odobor kobor olestar rodela odole romnjako rom. Odova nek platini prekalo sudije. Ama ako jekh olendar merela, tegani ka le životi aso životi“ (Izlazak 21:22, 23).a
Ked počmini o životi?
Anglo Devlese jaćha, o životi počmini ando trenutko ked i romni aćhola khamni. Ko po Lafi, o Devel mothovđa so e ćhavore kova pana na bijandilo dikhela sar đivdo. Te dikha nekobor primerija kola mothovena so o Devel ko životi ando ćhavoro kova pana na bijandilo isto dikhela sar ko životi ando ćhavoro kova bijandilo.
Ked molinđa pe, o kralj David phenđa e Devlese: „Te jaćha dikhlje man pana đi hijum le ko me dajako vođi“ (Psalam 139:16). Čak angleder so bijandilo, o Devel upro David dikhlja sar đivdo manuš.
Čak angleder so o Jeremija bijandilo, o Devel đanđa so ov ka ovel le jekh posebno zadatko. O Devel phenđa olese: „Angleder so ćerđum tut ko te dajako vođi, me penđarđum tut. Angleder so bijandiljan, me birinđum tut te ćere jekh sveto buti. Ćhivđum tut te ove prorok e manušenđe“ (Jeremija 1:5).
E biblijako pisco o Luka, kova hine doktori, koristinđa jekh isto grčko lafi ked vaćerđa ando ćhavoro kova pana na bijandilo hem ando ćhavoro kova bijandilo (Luka 1:41; 2:12, 16).
Da li o Devel ka oprostini e romnjaće koja čistinđa pe?
O Devel šaj te oprostini e romnjenđe kola čistinđe pe. Ako počminena te dikhen ko životi sar o Devel, na valjani te mukhen te mučini len but baro osećaj andi krivica. „O Jehova tano milosrdno hem samilosno. . . Kobor o istok tano dur ando zapad, odobor ov cidela amare prestupija amendar“ (Psalam 103:8-12).b O Jehova ka oprostini sarinenđe kola celone vileja kajinena pe aso pe grehija, maškaro kola tane hem o abortus (Psalam 86:5).
Da li tano pogrešno jekh romni te čistini pe ako olako ja e bebako životi tano ki opasnost?
Premalo odova so i Biblija vaćeri ando životi kotar ćhavoro kova pana na bijandilo, čak ked isi mogućnost diso te ovel e dajaće ja e bebaće, odova nane opravdanje jekha romnjaće te čistini pe.
Ama, podijekh puti šaj te ovel so ko bijanibe valjani te birini pe kaso životi ka spasini pe – e dajako ja e bebako. Ki asavki situacija, okola soj tane uključime ko odova problemi kokri valjani te odlučinen kaso životi ka spasini pe.
a Sebepi disave prevodija, šaj te dićhol so ko Zakon hine najvažno so ulo e dajaće, a na e ćhavorese ko vođi. Ama, o hebrejsko tekst odnosini pe ki nesreća koja ulji ili e dajaće ili e ćhavese ko vođi.
b Sar so i Biblija mothovi, Jehova tano e Devleso anav (Psalam 83:18).