So i Biblija vaćeri ando odova sar valjani te brinina amen ando amare roditeljija?

So phenela i Biblija?

Ked ka barjon, o ćhave isi len odgovornost te brininen pe aso potrebe ando pe phure roditeljija. I Biblija phenela so o ćhave pe delijencar valjani „te mothoven soj tane verna e Devlese ki porodica hem te irinen pe roditeljenđe. . . aso odova so dinđe len, sose odova tano šukar anglo Devlese jaćha“ (1. Timoteju 5:4). Ked o odrasla ćhave trudinena pe olenge roditeljija te ovel len sa so valjani olenđe, on mothovena so poštujinena i zapovest andi Biblija koja phenela te poštujinen pekle roditeljen (Efešanima 6:2, 3).

I Biblija na vaćeri konkretno sar valjani te brinina amen ando amare phure roditeljija. Ama, oj vaćeri ando Devlese sluge kola brininđe pe ando phure. Ki Biblija šaj te arakha disave savetija kola ka pomožinen okolenđe kola brininena pe ando pe phure roditeljija.

• Sar ko purano vreme disave brininđe pe ando pe phure roditeljija?

• Kola savetija andi Biblija šaj te pomožinen okolenđe so brininena pe ando pe phure roditeljija?

• Da li i Biblija vaćeri so mora te živina amare roditeljencar te šaj te brinina amen olendar?

Sar ko purano vreme disave brininđe pe ando pe phure roditeljija?

On odova ćerđe ko razna načinija premalo olenge okolnostija.

• O Josif živinđa but dur ando po dad, o Jakov. Ama ked hine le prilika, ov organizujinđa oleso dad te avel te živini paše uzo leste hem obezbedinđa lese kaj ka živini hem so ka hal (Postanak 45:9-11; 47:11, 12).

• I Ruta pe sasaja đelji te živini ki aver phuv hem but ćerđa buti te šaj te brinini pe olatar (Ruta 1:16; 2:2, 17, 18, 23).

• O Isus, hari angleder te merel, zamolinđa jekhe ando pe učenikija te brinini pe andi olesi daj koja tegani verovatno hine udovica (Jovan 19:26, 27).a

Kola savetija andi Biblija šaj te pomožinen okolenđe so brininena pe ando pe phure roditeljija?

Ki Biblija isi načelija kola šaj te pomožinen okolenđe so brininena pe ando pe phure roditeljija. Podijekh puti šaj te ovel but pharo te brinina amen olendar.

• Poštujin te roditeljen.

  So phenela i Biblija: „Poštujin te dade hem te daja“ (Izlazak 20:12).

  Sar šaj te primenine odova načelo? Mothov so poštujineja te roditeljen ađahar so ka mukhe len te oven samostalna kobor god šaj. Isto ađahar, kobor god šaj mukhen len on te odlučinen savi pomoć valjani olenđe hem pomožinen lenđe odobor kobor šaj.

• Den sa tumendar te haljoven len hem te oprostinen.

  So phenela i Biblija: „Ko haljola, na holjani sigate hem čast tano lese te nakhel prekali uvreda“ (Poslovice 19:11).

  Sar šaj te primenine odova načelo? Ako to dad ja ti daj phenela tuće diso ki holi ja na mothovena soj tane zahvalna asi ti pomoć, puć tut: „Sar bi ovela maje ked bi ovava ko oleso ja olako than? Ako deja sa tutar te haljove len hem te oprostine lenđe, tegani na ka ćeren o problemi te ovel pana pobaro.

• Roden savet averendar.

  So phenela i Biblija: „O planija propadinena ked nane dogovor, a uspinena ked isi but savetnikija“ (Poslovice 15:22).

  Sar šaj te primenine odova načelo? Ako te roditeljija isi len problemija sastipaja, istražin hari ando odola problemija. Istažin kola sa opcije isi tut odothe kaj živineja. Vaćer okolencar kola brininđe pe ando pe phure roditeljija. Ako isi tut phralja hem phenja, beš olencar, vaćeren ando odova so valjani tumare roditeljenđe hem sar šaj te podelinen odova pharipe.

  

• Ov skromno.

  So phenela i Biblija: „I mudrost tani ko skromna manuša“ (Poslovice 11:2).

  Sar šaj te primenine odova načelo? Ov svesno ando te granice. Svako amendar isi le ograničeno vreme hem snaga. Odolese, razmislin kobor tu realno šaj te brinine tut ando te roditeljija. Ako mislineja so but baro pharipe tano ko te pike, vaćer averencar andi porodica ja disave stručno manušencar.

• Vodin računi tutar.

  So i Biblija phenela: „Niko na mrzini poklo telo, nego parvari le hem brinini pe olestar“ (Efešanima 5:29).

  Sar šaj te primenine odova načelo? Iako isi tut odgovornost te brinine tut ando te roditeljenge potrebe, tu isi tut odgovornost te brinine tut hem ando tekle ja ando te porodicake potrebe ako hijan ko brako. Valjani redovno te ha maro, te odmorine tut hem dovoljno te sove (Propovednik 4:6). Ako tano moguće, šukar tano hem te đa ko odmor hari. Ako ađahar ćereja ka ovel tut pobuter snaga te brinine tut ando te roditeljija.

Da li i Biblija vaćeri so mora te živina amare roditeljencar te šaj te brinina amen olendar?

I Biblija na vaćeri diso konkretno ando odova. Ko disave porodice, o ćhave mangena olenge roditeljija so pobuter te živinen olencar. Ko disave porodice, o ćhave mislinena so o staračko dom tano pošukar rešenje. I porodica valjani zajedno te bešel, te vaćeren hem te odlučinen koja odluka bi ovela najšukar te anen (Galatima 6:4, 5).