Subota, 4. oktobar
A sa ćerava sebepi i šukar vest, te bi propovedinava la averenđe (1. Kor. 9:23)
Ked amare okolnostija meninena pe, na valjani te bistra kobor tano važno hem ponodri te pomožina averenđe, pogotovo ađahar so ka đa ki služba. Amen valjani te ova prilagodljiva ki služba. Đi propovedinaja, resaja e manušen kola avena andi različito kultura hem na verujinena ko ista buća. O apostol Pavle hine prilagodljivo hem oleso primer šaj but te pomožini amen. O Isus ćhivđa e Pavle te ovel „apostol kova tano bićhaldo avere narodonđe“ (Rimlj. 11:13). Sebepi odova zadatko, ov šaj hine te propovedini e Jevrejenđe, e Grkonđe, e manušenđe kola završinđe bare škole, e manušenđe kola živinđe ko gav, kola hine ki vlast hem e kraljenđe. Te šaj te resel o ćaćipe ko olengo vilo, o Pavle hine „sarinenđe [. . .] sa“ (1. Kor. 9:19-22). Ov razmislinđa andi olengi kultura, kotar avena hem ko so verujinena. Odova pomožinđa lese te ovel prilagodljivo. Hem amen šaj te ova pošukar ki služba ako hijam prilagodljiva hem ako razmislinaja sar šaj ko najšukar način te pomožina e manušenđe (w23.07 23 ¶11-12).
Nedelja, 5. oktobar
E Gospodeso robo na ismini te svađini pe, nego valjani te ovel blago premalo sarinende (2. Tim. 2:24)
O manuša kola tane blaga nane slaba, već zorale. Valjani amenđe bari snaga te šaj te aćhova smirime ked isi amen disavi phari situacija. I blagost tani plod ando Devleso duho (Gal. 5:22, 23). O grčko lafi asi „blagost“ disavo puti hine koristimo te opisini e divljo graste kova tano pripitomimo. Zamislin jekhe divljo graste kova neko pripitominđa. Iako tano akana pitomo, ov tano pana zoralo. Sar amen sar manuša šaj te ova blaga, ama ko isto vreme zorale? Odova našti te ćera kokri. Valjani te molina amen e Jehovase aso oleso sveti duh te pomožini amen te razvijina akija osobina. But iskustvija mothovena so odova šaj te ćerel pe. Na primer, but phralja hem phenja hine blaga ked avera protivinđe pe olenđe. Odova pomožinđa averenđe te ovel len pana pošukar mišljenje ando Jehovase svedokija (w23.09 15 ¶3).
Ponedeljak, 6. oktobar
Molinđum man hem o Jehova odgovorinđa ki mi molitva (1. Sam. 1:27)
Ki jekh vizija, o apostol Jovan dikhlja sar 24 starešine služinena e Jehovase ko nebo. On hvalinena e Devle hem phenena soj tano dostojno te primini „i slava, i čast hem i moć“ (Otkr. 4:10, 11). Isto ađahar, hem o verna anđelija isi len but razlogija te hvalinen e Jehova. On tane oleja ko nebo hem but šukar đanena savo tano. Dikhena sar mothovi pe osobine ko odova so ćerela. Ked dikhena sar postupini averencar, odova podstaknini len te hvalinen le (Jov 38:4-7). Isto ađahar, hem amen valjani te hvalina e Jehova ko amare molitve ađahar so ka phena lese so posebno sviđini pe amenđe koro leste hem sose poštujinaja le. Ked čitineja hem proučineja e Devleso Lafi, trudin tut te dikhe kola e Jehovase osobine posebno sviđinena pe tuće (Jov 37:23; Rimlj. 11:33). Palo odova, vaćer lese odova ki molitva. Amen šaj te hvalina e Jehova hem odolese so pomožini amenđe hem sa amare phralenđe (1. Sam. 2:1, 2; w23.05 3-4 ¶6-7).