Da li o Beng ćaće postojini?

So phenela i Biblija?

Ja, o Beng ćaće postojini. Ov tano jekh anđeo kova ulo lošno hem pobuninđa pe protiv o Devel. Premali Biblija ov tano „akale svetoso vladari“ (Jovan 14:30; Efešanima 6:11, 12). Ko Devleso Lafi o Beng dobinđa različita anava kola mothovena savo tano:

• Satana, so značini “protivnik” (Jov 1:6).

• Beng, so značini “klevetnik” (Otkrivenje 12:9).

• Sap, kova ki Biblija predstavini nekas ko prevarini averen (2. Korinćanima 11:3).

• Kušači (Matej 4:3).

• Hovavno (Jovan 8:44).

Nane samo o lošnipe ano amende

Disave manuša mislinena so o Beng tano samo o lošnipe ano amende. Ki Biblija šaj te čitina so o Devel vaćerđa e Bengeja. Ako o Beng tano samo lošnipe ano amende, tegani kasa o Devel vaćerđa? Ki aver strana, amen đanaja so o Devel tano savršeno hem so ano leste nane lošnipe (Ponovljeni zakoni 32:4; Jov 2:1-6). Isto ađahar o Satana iskušinđa e Isuse kova na hine le greh (Matej 4:8-10; 1. Jovanova 3:5). I Biblija mothovi so o Beng ćaće postojini hem so ov nane samo disavo lošnipe ano amende.

Tegani, da li valjani te ova iznenadime so but manuša na verujinena so o Beng ćaće postojini? Na valjani, sose i Biblija phenela so o Beng prevarini e manušen te bi ispunini pe ciljija (2. Solunjanima 2:9, 10). Olesi najbari prevara hine odova so uspinđa te ćhivel bute manušen te verujinen so ov na postojini (2. Korinćanima 4:4).

Pana disave hovajba ando Beng

Ćaćipe: O hebrejsko lafi kova ko disave prevodija andi Biblija tano prevodimo sar „Lucifer“ značini „okova so svetlini“ (Isaija 14:12). O kontekst mothovi so odova lafi odnosinđa pe ki vavilonsko kraljevsko loza kas o Devel ponizinđa sebepi o ponos (Isaija 14:4, 13-20). E lafencar „okova so svetlini“ marđa pe muj e kraljenđe andi vavilonsko kraljevsko loza palo odova so našalđe i vlast.

Ćaćipe: O Beng tano e Devleso dušmani, a na oleso sluga. O Beng protivini pe e manušenđe kola služinena e Devlese hem optužini len (1. Petrova 5:8; Otkrivenje 12:10).