So i Biblija vaćeri ando odova te del pe?
So phenela i Biblija?
I Biblija podstaknini amen te ova spremna te da diso averenđe hem te ćera odova ando ispravna motivija. Tegani, na samo so ka ovel bahtalo okova so dobini već hem okova so dela (Poslovice 11:25; Luka 6:38). O Isus phenđa: „Pobuter isi bahtalipe ked dela pe nego ked lela pe“ (Dela apostolska 20:35).
Ked tano šukar te da?
Šukar tano te da, na sose neko ćhivela amen zorjeja odova te ćera, već sose amen odova mangaja. I Biblija phenela: „Nek ćerel svako sar so rešinđa ko po vilo, na bizi volja ja ki sila, sose o Devel mangela okole kova radosno dela“ (2. Korinćanima 9:7, fusnota).
Ako mangaja te služina e Devlese ko ispravno način, valjani te da ando vilo (Jakovljeva 1:27, fusnota). Ked pomožinaja okolenđe kase valjani pomoć, o Devel ko odova dikhela samći ked olese diso pozajminđam (Poslovice 19:17). I Biblija phenela so kokri o Devel ka irini okolenđe kola ađahar ćerena (Luka 14:12-14).
Ked nane šukar te da?
Ako na dela pe ando ispravna motivija. Aće disave primerija:
Te mothove tut anglo avera (Matej 6:2).
Te dobine diso so tuće valjani (Luka 14:12-14).
Te ćine o spasenje (Psalam 49:6, 7).
Ako odoleja ka podupirina disave buća kola o Devel osudini. Na primer, nane šukar te da nekase pare te kockini pe, te ćinel droga ja te maćol (1. Korinćanima 6:9, 10; 2. Korinćanima 7:1). Isto ađahar, nane šukar te da pare nekase koj tano sposobno te zaradini pese, ama na mangela te ćerel buti (2. Solunjanima 3:10).
Ako sebepi odova so daja amari porodica ka aćhol bizo odova so valjani olenđe. I Biblija sikavi so o poglavari valjani te brinini pe ando odova so valjani olese porodicaće (1. Timoteju 5:8). Na bi ovela šukar o poglavari te del diso averenđe, a pe porodica te aćhavi bizo odova so valjani olenđe. Isto ađahar, ko Isuseso vreme disave manuša na manglje te brininen pe ando pe roditeljija kola phurilje hem phenđe so sa odova so isi len valjani te den sar dar e Devlese. O Isus osudinđa asavke manušen (Marko 7:9-13).