Da li o Devel postojini?
So phenela i Biblija?
Ja, ki Biblija šaj te arakha but dokazija so postojini o Devel. Oj podstaknini amen te ovel amen vera ko Devel, na samo te verujina ko odova so razna religije vaćerena, nego te koristina amari godi (Rimljanima 12:1; 1. Jovanova 5:20). Akana ka dikha disave dokazija andi Biblija kola mothovena so postojini o Devel.
Odova so postojini o svemir ko kova isi redo hem ko kova isi životi mothovi so postojini o Stvoritelj. I Biblija phenela: „Sose svako ćher neko ćerđa, a o Devel tano okova kova sa ćerđa“ (Jevrejima 3:4). Šaj akava so i Biblija vaćeri tano jednostavno, ama but školujime manuša phenena so odova tano jekh baro dokaz so postojini o Devel.a
Sar manuša, osim so isi amen potreba te zadovoljina amare fizičke potrebe, isi amen hem potreba te haljova sose hijam stvorime. I Biblija phenela soj tane odola duhovna potrebe. On uključinena e želja te penđara e Devle hem te služina olese (Matej 5:3; Otkrivenje 4:11). Amare duhovne potrebe tane dokaz so o Devel postojini. Isto ađahar, on mothovena amenđe soj tano ov Stvoritelj kova but mangela amen hem so mangela amen te zadovoljina len (Matej 4:4).
O detaljna proročanstvija ki Biblija hine pisime beršencar angleder hem ispuninđe pe đi ko najtikno detalji. Odova mothovi so o proročanstvija na alje ando manuša (2. Petrova 1:21).
O manuša kola pisinđe i Biblija đanđe o naučna buća kola o manuša ko olengo vreme na đanđe. Na primer, ko purano vreme but manuša verujinđe so e phuvja ićerena o životinje sar soj tane o slon ja i kornjača. Ki aver strana, i Biblija phenela so o Devel „ićeri i phuv upro nisoste“ (Jov 26:7). Isto ađahar, i Biblija phenela soj tani i phuv okruglob (Isaija 40:22). But manuša haljona so o manuša kola pisinđe i Biblija šajinđe te đanen asavke buća odolese so o Devel mothovđa lenđe odova.
Ki Biblija šaj te arakha o odgovorija ko but važna pućiba. Ked ne bi o manuša arakhena o odgovorija ko pe pućiba, on bi šaj te mislinen so o Devel na postojini. Na primer, ako o Devel odobor mangela amen hem ako tano Svemoćno, tegani sose o manuša patinena hem sose ovena o lošna buća? Sose i religija but putija podstaknini e manušen te ćeren lošnipe, a na šukaripe? (Titu 1:16).
a Na primer, o astronom Alan Sandejdž jekhvar ando svemir phenđa: „Mislinava so jekh asavko redo našti te ovel ando haos. Neko morandilo te ćerel sa odova. Me našti te haljovav odova sar postojini o Devel, ama ov tano jedino objašnjenje aso sa so ulo.“
b O izvorno lafi kova ko Isaija 40:22 prevedini pe sar ’krug‘ šaj te odnosini pe hem ki ’kugla‘. Ko disave biblijake prevodija pisini „e phuvjaki kugla“ (Douay Version).