46. ČLANKO PROUČIBASE
O Jehova uverini amen so ka ispunini po obećanje ando raj
Svako ko ka rodel blagoslov, ka dobini blagoslov ando ćaćutno Devel (IS. 65:16)
ĐILI 3 O Jehova tano amari nada
SOSTAR KA VAĆERAa
1. Savi poruka o Isaija hine le e Izraelcenđe?
O PROROK ISAIJA aso Jehova phenđa soj tano „ćaćutno Devel.“ O lafi „ćaćutno“ doslovno značini „amin“ (Is. 65:16). O Lafi „amin“ značini „ađahar tano“ ja „nek ovel ađahar“. Ked ki Biblija o lafi „amin“ koristini pe aso Jehova ja aso Isus, tegani odija tani garancija so diso tano tačno. Odolese, e Isaijasi poruka e Izraelcenđe hine jasno. E Jehovase šaj te verujini pe odolese so sa odova so phenela, ov uvek ćerela.
2. Sose šaj te verujina ko Jehovase obećanja andi budućnost hem ando kola pućiba ka vaćera?
2 Da li hem amen šaj te verujina ko odova so o Jehova obećinđa asi budućnost? Skoro 800 berš palo Isaijaso vreme, o apostol Pavle phenđa sose šaj te verujina ko Jehovase obećanja. Ov phenđa: „Nane moguće o Devel te hovavi“ (Jevr. 6:18). Razmislin kotar akava primer: Ando jekh izvor našti te đal hem svežo pani hem londalo pani. Isto ađahar, o Jehova kova tano izvor ando ćaćipe, našti te hovavi. Odolese, amen šaj te verujina ko sa so o Jehova phenela hem ko odova so obećini amenđe so ka ovel ki budućnost. Ko akava članko ka razmotrina akala pućiba: So o Jehova obećinđa so ka del amen ki budućnost? Koja garancija o Jehova dinđa amen so odola obećanja ka ispuninen pe?
SO O JEHOVA OBEĆINĐA?
3. (a) Kola obećanja e Jehovase sluge but mangena? (Otkrivenje 21:3, 4) (b) Sar disave reagujinena ked šunena odola obećanja?
3 E Jehovase sluge but mangena o obećanja kolendar akana ka vaćera. (Čitin Otkrivenje 21:3, 4.) O Jehova obećini so ka avel o vreme ked više „na ka ovel meribe, ni muke, ni rojbe, ni dukha“. Đi propovedinaja e manušenđe, but putija čitinaja lenđe akala stihija. Ama, sar reagujinena ked šunena odova? But olendar phenena: „Akala buća tane but šukar. Ama, me našti te verujinav so odova ćaće ka ovel.“
4. (a) So o Jehova đanđa ked dinđa o obećanja ando raj? (b) Uzo odova so dinđa o obećanja, so o Jehova pana ćerđa?
4 Ked o Jehova dinđa e Jovanese te pisini akala obećanja, ov đanđa so amen avdije ka vaćera odolestar đi propovedinaja e manušenđe. Isto ađahar, o Jehova đanđa so butenđe ka ovel pharo te verujinen so odola obećanja ka ispuninen pe (Is. 42:9; 60:2; 2. Kor. 4:3, 4). Sar šaj te uverina amen hem averen so ka ispuninen pe o lafija ando Otkrivenje 21:3, 4? O Jehova na samo so dinđa akala šuže obećanja, već hem dinđa amen razlogija sose šaj te verujina so ka ispuninen pe. Akana ka vaćera odolestar.
O JEHOVA UVERINI AMEN SO KA ISPUNINI PE OBEĆANJA
5. Kola stihija uverinena amen so o Jehova ka ispunini pe obećanja?
5 Ki Biblija pisini sose šaj te verujina so ka ispuninen pe e Jehovase obećanja. Odothe pisini: „Okova so bešela ko presto vaćerđa: ’Dikh, sa nevo ćerava!‘ Pana vaćerđa: ’Pisin, sose ko akala lafija šaj te verujini pe hem ćaćutne tane‘. Hem phenđa maje: ’Ispuninđe pe! Me hijum Alfa hem Omega, početak hem kraj‘ “ (Otkr. 21:5, 6a).
6. Sose o lafija ando Otkrivenje 21:5, 6 zorjaćerena amaro poverenje ko Devlese obećanja?
6 Sose akala stihija zorjaćerena amaro poverenje ko Devlese obećanja? Ki knjiga Otkrivenje – blizu je veličanstveni vrhunac! pisini: „Odova tano isto sar ka phene o Jehova e manušenđe potpisinđa garancija, avere lafencar potvrda so akala blagoslovija ka ispuninen pe ki budućnost.“b E Devlese obećanja tane pisime ko Otkrivenje 21:3, 4. Ama, palo odova ko panđto hem šovto stiho, arakhaja garancija so akala obećanja ka ispuninen pe. Akana ka dikha sar o lafija kola o Jehova koristinđa ko akala stihija mothovena so šaj te verujina lese.
7. Ko počmini te vaćeri ko panđto stiho hem sose tano odova odobor posebno?
7 O panđto stiho počmini e lafencar: „Okova so bešela ko presto vaćerđa“ (Otkr. 21:5a). Akala lafija tane posebna odolese so ki knjiga Otkrivenje, akava tano o prvo ando trin thana kuri o Jehova lično vaćerđa. Akija garancija na dinđa ni prekalo anđelija ni prekalo Isus, već ov lično vaćerđa. Akava uverini amen so šaj potpuno te verujina ko lafija kola pana phenđa. Sose? Odolese so o Jehova tano „Devel kova našti te hovavi“ (Titu 1:2). Odova so o Jehova našti te hovavi, uverini amen so ćaće ka ispuninen pe o lafija ando Otkrivenje 21:5, 6.
„DIKH! SA NEVO ĆERAVA“
8. Sar o Jehova naglasinđa so ka ispunini pe obećanja? (Isaija 46:10)
8 Palo odova, o Jehova phenđa: „Dikh!“ (Otkr. 21:5). O grčko lafi kova tano prevodimo sar „dikh“ često koristini pe ki knjiga Otkrivenje. Ki jekh knjiga pisini so odova izraz koristinđa pe te mothovi okolese kova čitini te obratini pažnja ko odova so ka ovel phendo palo odova lafi. So o Jehova vaćerđa palo odova? Ov phenđa: „Sa nevo ćerava.“ O Jehova akala promene ka ćerel ki budućnost. Ama, odolese soj tano uverimo so ka ispunini sa pe obećanja, ov phenđa so već ćerđa akala promene. (Čitin Isaija 46:10.)
9. (a) Ko so odnosini pe o izraz „sa nevo ćerava“? b) So ka ovel e „neboja“ hem e „phuvjaja“ kola akana postojinena?
9 Akana ka razmotrina o izraz „sa nevo ćerava“ kotar Otkrivenje 21:5. Ko akava poglavlje odova izraz odnosini pe ko duj buća kola o Jehova ka ćerel. Ov ka menini hem ka obnovini. Sar prvo, ka vaćera ando odova so o Jehova ka menini. Ko Otkrivenje 21:1 pisini: „Okova nebo hem okija phuv kola hine našaldilje.“ O lafija „okova nebo“ odnosini pe ko politička vladavine upro kola vladini o Satana hem olese demonija (Mat. 4:8, 9; 1. Jov. 5:19). Ki Biblija, o lafi „phuv“ šaj te odnosini pe upro manuša (Post. 11:1; Ps. 96:1). O lafija „okija phuv“ odnosinena pe ko lošna manuša. O Jehova na ka preuredini „o nebo“ hem „i phuv“, već potpuno ka menini len. Ov ka menini o nebo hem i phuv ađahar so ka ćerel „nevo nebo hem nevi phuv“, avere lafencar nevi vladavina hem ki phuv ka živinen pravedna manuša.
10. So o Jehova ka ćerel te ovel nevo?
10 Ko kova pana način o Jehova ka ćerel sa o buća neve? (Otkr. 21:5). Sar dujto, o Jehova ka obnovini i phuv ađahar so ka ćerel te ovel raj hem ka saćari e manušen. Sar so o Isaija prorekninđa, i phuv ka ovel but šukar than, sar so hine o edensko vrt. Isto ađahar, o manuša ka oven neve, avere lafencar ka oven potpuno saste. O sakatija, o kašuke, o korore ka oven saste hem čak o mule ka ušten (Is. 25:8; 35:1-7).
„KO AKALA LAFIJA ŠAJ TE VERUJINI PE HEM ĆAĆUTNE TANE [. . .] ISPUNINĐE PE!“
11. So o Jehova phenđa e Jovanese te ćerel hem sose?
11 So pana uverini amen so o Jehova ka ispunini odova so vaćerđa? Ov phenđa e Jovanese: „Pisin, sose ko akala lafija šaj te verujini pe hem ćaćutne tane“ (Otkr. 21:5). O Jehova akate na samo so zapovedini e Jovanese te pisini, već hem dela le razlog sose te pisini. Ov phenđa: „Ko akala lafija šaj te verujini pe hem ćaćutne tane.“ Odova značini so e Devlese lafija tane pouzdana hem tačna. Amen hijam zahvalna so o Jovan hine poslušno hem šunđa odija zapovest. Odolese, amen šaj te čitina ando Devlese obećanja kotar raj hem hor te razmislina ando blagoslovija kola ađićerena amen.
12. Sose o Jehova phenđa so olese obećanja „ispuninđe pe“?
12 Palo odova, o Devel phenđa: „Ispuninđe pe!“ (Otkr. 21:6). Sose phenđa so akala obećanja već ispuninđe pe? Odolese so ništa našti te ćhinavi e Devle te ispunini pi namera. Palo odova, o Jehova phenđa pana diso so uverini amen so olese obećanja ćaće ka ispuninen pe. Soj tano odova?
„ME HIJUM ALFA HEM OMEGA“
13. Sose o Jehova phenela: „Me hijum Alfa hem Omega“?
13 Sar so angleder phenđam, o Jehova trin putija lično vaćeri ki Jovanesi vizija (Otkr. 1:8; 21:5, 6; 22:13). Svako puti, ov phenela: „Me hijum Alfa hem Omega.“ E slovoja „alfa“ počmini o grčko alfabet, a e slovoja „omega“ završini pe. Odolese, ked phenela „me hijum Alfa hem Omega“, o Jehova pomožini amen te haljova so ked diso počmini, ov odova hem ka završini.
Ked o Jehova diso počmini, ov hem završini odova (Dikh o 14. hem o 17. odlomko)
14. (a) Vaćer jekh primer ked o Jehova ka phene vaćerđa „me hijum Alfa“ hem ked ka phene ka vaćeri „me hijum Omega“? (b) Ko so uverinena amen o lafija ando Postanak 2:1-3?
14 Palo odova so stvorinđa e Adame hem e Eva, o Jehova phenđa koja tani olesi namera e manušencar hem e phuvjaja. Ki Biblija pisini: „O Devel blagoslovinđa len hem phenđa lenđe: ’Nek ovel tumen but ćhave hem tumendar nek oven but manuša, pheren i phuv hem vladinen upro late‘ “ (Post. 1:28). Ko odova trenutko, o Jehova ka phene vaćerđa „Alfa“. Olesi namera ka ispunini pe ked o savršena hem o poslušna e Adamese hem e Evake potomkija ka pheren i phuv hem ka ćeren la te ovel raj. Ked e Jehovasi namera ka ispunini pe, ov ka phene ka vaćeri „Omega“. Palo odova so ćerđa o nebo, i phuv hem sa so isi koro lende, o Jehova vaćerđa diso so mothovi amenđe so olesi namera sigurno ka ispunini pe. Olese lafija pisinena ko Postanak 2:1-3. (Čitin.) O Jehova phenđa so o eftato dive posvetinđa. Odova mothovi so e Jehovasi namera e manušencar hem e phuvjaja sigurno ka ispunini pe ko krajo ando eftato dive.
15. Sose šaj hine te izgledini so o Satana ćhinavđa e Devle te ispunini pi namera?
15 Palo odova so o Adam hem i Eva pobuninđe pe, on ulje grešna. A olenge potomkija nasledinđe o greh hem o meribe (Rimlj. 5:12). Sebepi odova šaj hine te izgledini so o Satana ćhinavđa e Devle te pherel i phuv savršeno hem poslušno manušencar. Da li o Satana šaj hine te ćhinavi e Jehova te ispunini pi namera, avere lafencar te ćhinavi le te phenel „Omega“? Ov šaj mislinđa so o Devel našti te ićeri pe ko po lafi. Šaj mislinđa so o Devel isi le samo nekobor opcije. A jekh olendar tani te mudari e Adame hem e Eva hem te ćerel jekh aver savršeno par te šaj te ispunini pi namera e manušencar. Ama, ako bi o Devel odova ćerela, tegani o Beng bi optužini le so hovavi. Sose? Odolese so premalo Postanak 1:28, o Jehova phenđa e Adamese hem e Evaće so olenge potomkija ka pheren i phuv.
16. Sose o Satana mislinđa so o Jehova našti te ispunini pi namera?
16 So o Satana mislinđa, koja tani e Devlesi dujto opcija? Ov šaj mislinđa so o Jehova ka dozvolini e Adamese hem e Evaće te ovel len ćhave, ama so on niked na ka oven savršena (Prop. 7:20; Rimlj. 3:23). Tegani o Beng bi phenela e Jehovase so na uspinđa te ispunini pi namera, i phuv te ovel pherdi savršeno manušencar.
17. Savo rešenje o Jehova hine le ked o Satana hem o prvo bračno par pobuninđe pe hem so ka ovel ko krajo? (Dikh i slika.)
17 E Satanase niked ne bi perela ki godi so o Jehova ka ćerel (Ps. 92:5). O Jehova hine le najšukar opcija sar te ispunini pi namera, iako o Satana, o Adam hem i Eva pobuninđe pe. O Jehova dozvolinđa e Adamese hem e Evaće te ovel len ćhave hem ađahar dokažinđa soj tano pouzdano hem so na hovavi. Isto ađahar, mothovđa so ako phenđa so diso ka ćerel, tegani ništa na ka ćhinavi le ando odova. O Jehova ićerđa pe ko po lafi so ka ispunini pi namera ađahar so ćerđa diso so ka spasini e Adamese hem e Evake potomkonen. O Jehova obezbedinđa i otkupnina (Post. 3:15; 22:18). O Satana sigurno iznenadinđa pe so o Jehova ćerđa. Sose? Odolese so i otkupnina temeljinđa pe ko nesebično mangipe (Mat. 20:28; Jov. 3:16). O Satana nane le odija osobina, sose tano sebično. So ka ovel ki budućnost sebepi i otkupnina? Ked ka završini pe i Hiljadaberšengi vladavina, o savršena hem o poslušna e Adamese hem e Evake potomkija ka nasledinen i phuv, baš sar so o Jehova phenđa ki početka. Tegani, o Jehova ka phene ka vaćeri „Omega“.
SAR TE ZORJAĆERA AMARO POVERENJE KO JEHOVASO OBEĆANJE ANDO RAJ?
18. Kola trin razlogija isi amen te verujina ko Jehovase obećanja? (Dikh o okvir „Trin razlogija sose šaj te verujina ko Jehovase obećanja“.)
18 Sar so razmotrinđam ko akava članko, sose šaj te ova sigurna so o Jehova ka ispunini po obećanje ando raj? Sar prvo, o Jehova dela odova obećanje. Ko Otkrivenje pisini: „Okova so bešela ko presto vaćerđa: ’Dikh, sa nevo ćerava.‘ “ Ov isi le mudrost, isi le moć hem isi le želja te ispunini po obećanje. Sar dujto, o Jehova đanela so oleso obećanje sigurno ka ispunini pe. Odolese, ov vaćeri: „Ko akala lafija šaj te verujini pe hem ćaćutne tane [. . .] Ispuninđe pe!“ Sar trito, e Jehova ništa našti te ćhinavi te završini diso so počminđa. Odolese, ov vaćeri: „Me hijum Alfa hem Omega.“ O Jehova ka mothovi so o Satana tano hovavno hem so našti te ćhinavi le te ispunini po obećanje.
19. So šaj te ćere ked e manušenđe tano pharo te verujinen ko Jehovaso obećanje ando raj?
19 Ma bistri so svako puti ked vaćereja e manušenđe sar o Devel uverini amen so ka ispunini pe obećanja, tu zorjaćereja to poverenje upro Jehova. Odolese, so ka ćere ako aver puti ki služba ked ka čitine o stiho ando Otkrivenje 21:4 neko phenela tuće: „Akala buća tane but šukar. Ama, me našti te verujinav so odova ćaće ka ovel“? Sose ne bi čitineja hem objasnineja lese o panđto hem o šovto stiho? Mothov sar o Jehova dinđa amen dokazija so ka ispunini pe obećanja (Is. 65:16).
ĐILI 145 O Devel obećini so ka živina ko raj
a Ko akava članko ka razmotrina sar o Jehova uverini amen so ka ispunini po obećanje ando raj. Svako puti ked averenđe vaćereja akalestar, tu zorjaćereja to poverenje ko Jehovase obećanja.