26. LEKCIJA
Sose isi lošnipe hem sose o manuša patinena?
Ked ovela diso lošno, o manuša obično pućena pe: „Sose odova ulo?“ Bahtale hijam so i Biblija dela amen odgovor ko odova pućibe.
1. Sar o lošnipe počminđa?
O Beng pobuninđa pe protiv o Devel. Ov manglja te vladini umesto o Devel. Odolese, ov ćhivđa e Adame hem e Eva hem on te pobuninen pe. Odova ćerđa ađahar so hovavđa e Eva (Postanak 3:1-5). Ćhivđa la te mislini so o Jehova garavi olatar diso šukar. Avere lafencar, ov phenđa so o manuša ka oven pobahtale ako na šunena e Devle. Ked phenđa e Evaće so na ka merel, o Beng vaćerđa o prvo hovajbe. Odolese, i Biblija phenela so o Beng tano „hovavno hem o dad ando hovajbe“ (Jovan 8:44).
2. So o Adam hem i Eva odlučinđe te ćeren?
O Jehova hine ćaće phravde vasteso premalo Adam hem premali Eva. Ov phenđa so šaj te han o plod kotar svako kaš ko vrt, osim kotar jekh kaš (Postanak 2:15-17). Ama, on ipak odlučinđe te han o plod kotar odova kaš. I Eva lelja o plod hem halja le. Palo odova, hem o Adam halja odova plod (Postanak 3:6). On solduj na šunđe e Devle. Sebepi so o Adam hem i Eva hine savršena manuša, on ano peste na hine len ništa so bi ćhivela len te grešinen. Ama, on odlučinđe te na šunen e Devle. Ađahar, on grešinđe hem mothovđe so na mangena o Devel te ovel olengo vladari. Sebepi odija odluka, but patinđe (Postanak 3:16-19).
3. Sar e Adamesi hem e Evaki odluka utičini upro amende?
Ked o Adam hem i Eva grešinđe, on ulje nesavršena hem sebepi olengo hem amen hijam nesavršena. Ked vaćeri ando Adam, i Biblija phenela: „Prekalo jekh manuš ko sveto khuvđa o greh hem prekalo greh o meribe, hem ađahar o meribe alo ko sa o manuša“ (Rimljanima 5:12).
Isi nekobor razlogija sose patinaja. Podijekh puti patinaja sebepi o lošna odluke kola anđam ja sebepi so avera manuša anđe disave lošna odluke. Disavo puti patinaja sose hijam ko pogrešno than ko pogrešno vreme. (Čitinen Propovednik 9:11.)
SIKLJOV POBUTER
Dikh da li ando Devel avena o muke hem o lošnipe hem sar ov osetini pe ked amen patinaja.
4. Kastar avena o lošnipe hem o muke?
But manuša verujinena so o Devel vladini akale svetoja. Ama, da li tano odova ađahar? Dikhen o VIDEO.
Čitinen Jakovljeva 1:13 hem 1. Jovanova 5:19, hem palo odova vaćeren ando akava pućibe:
Da li ando Devel avena o lošnipe hem o muke?
5. So ovela ki phuv sar počminđa te vladini o Beng?
Čitinen Postanak 3:1-6, hem palo odova vaćeren ando akala pućiba:
Savo hovajbe o Beng vaćerđa? (Dikhen o 4. hem o 5. stih)
Sar o Beng manglja te ćhivel e Eva te mislini so o Jehova garavi olendar diso šukar?
Premalo e Bengese lafija, da li o Devel valjani te vladini upro manuša te šaj on te oven bahtale?
Čitinen Propovednik 8:9, hem palo odova vaćeren ando akava pućibe:
So ovela ki phuv sebepi so o Jehova na vladini?
1. O Adam hem i Eva hine savršena manuša hem živinđe ko raj. Ama, on šunđe e Benge hem pobuninđe pe protiv o Jehova
2. Sebepi i pobuna, o manuša ulje grešna, patinena hem merena
3. Pana hari, o Jehova ka cidel o greh, o muke hem o meribe. O manuša palem ka oven savršena hem ka živinen ko raj
6. E Jehovase tano but pharo ked patinaja
Sar osetini pe o Devel ked amen patinaja? Te dikha so o kralj David hem o apostol Petar pisinđe odolestar. Čitinen Psalam 31:7 hem 1. Petrova 5:7, hem palo odova vaćeren ando akava pućibe:
Sar osetineja tut ked đaneja so o Jehova dikhela amari dukh hem brinini pe amendar?
7. O Devel ka cidel sa amare muke
Čitinen Isaija 65:17 hem Otkrivenje 21:3, 4, hem palo odova vaćeren ando akava pućibe:
Sose tano utešno te đana so o Jehova ka cidel sa o lošna buća kola o manuša doživinđe?
Da li đanđan?
Ked o Beng vaćerđa o prvo hovajbe, ov meljaćerđa e Jehovaso anav. Ov phenđa so o Jehova nane šukar vladari hem so na mangela e manušen. Pana hari, o Jehova ka cidel sa amare problemija hem ka posvetini po anav. Avere lafencar, ov ka mothovi so oleso način sar vladini tano najšukar. Najvažno tano te posvetini pe e Jehovaso anav (Matej 6:9, 10).
AKO NEKO PHENELA: „Amen patinaja sose ađahar o Devel iskušini amen.“
So bi tu pheneja ko odova?
SO SIKLJILJAM
Amen patinaja sebepi o Beng hem sebepi o Adam hem i Eva. O Jehova brinini pe amendar hem pana hari ka cidel sa amare muke.
Te ponovina
Savo hovajbe o Beng phenđa e Evaće?
Sar odova so o Adam hem i Eva pobuninđe pe utičini upro amende?
Sar đanaja so o Jehova brinini pe amendar?
RODE POBUTER
Sikljov so i Biblija phenela soj tano greh.
Čitin aso kola buća o Beng optužinđa e Devle.
„Sose o Devel dozvolini amen te patina?“ (Stražarska kula, 1. januar 2014)
Dikh o utešna odgovorija ko pućiba kola mučinena bute manušen.
„Sose o Devel dozvolinđa milionija Jevreja te oven mudarde?“ (članko ko amaro sajt)
Dikh so pomožinđa jekhe manušese te haljol sose o manuša patinena.