Ked proučineja i Biblija, odova tano sar ked hijan ko jekh drumo. Ama, sar so đaneja, ko drumo šaj te ovel tut pharipa. Podijekh puti šaj pućeja tut da li valjani hem ponodri te proučine i Biblija. Ama, sose tano važno te de sa tutar hem ponodri te proučine? So ka pomožini tut hem ponodri te proučine, iako isi tut pharipa?

1. Sose tano važno te proučine i Biblija?

„E Devleso lafi tano đivdo hem delotvorno“ (Jevrejima 4:12). Jedino i Biblija šaj te mothovi tuće sar o Devel razmislini hem so osetini premalo tute. Oj šaj te pomožini tuće na samo te sikljove but buća, već hem te ove ćaće mudro manuš hem te ovel tut nada. Soj tano najvažno, šaj te pomožini tut te ove e Jehovaso amal. Ako proučineja i Biblija, to životi šaj te ovel pana pošukar.

2. Sose tano važno te haljove so o ćaćipe andi Biblija tano vredno?

O ćaćipe andi Biblija tano sar ked o manuš isi le baro barvalipe. Odolese, i Biblija phenela: „Ćin o ćaćipe hem niked ma bikin le“ (Poslovice 23:23). Ked ićeraja ki godi kobor tano vredno o ćaćipe andi Biblija, amen ka da sa amendar hem ponodri te proučina, iako isi amen pharipa. (Čitinen Poslovice 2:4, 5.)

3. Sar šaj o Jehova te pomožini tut hem ponodri te proučine i Biblija?

O Jehova tano to Stvoritelj hem to amal. Odolese mangela te pomožini tut te sikljove olestar. Ov šaj te del tut „hem želja hem snaga te ćere odova soj tano pali olesi volja.“ (Čitinen Filipljanima 2:13.) Odolese, ako podijekh puti nane tut želja te proučine ili ako tano tuće pharo te ićere tut ko odova so sikljoveja, o Jehova šaj te pomožini tut. Isto ađahar, ov šaj te del tut snaga te istrajine ked isi tut problemija ja ked avera protivinena pe tuće. Redovno molin tut e Jehovase te pomožini tut hem ponodri te proučine i Biblija (1. Solunjanima 5:17).

SIKLJOV POBUTER

4. To kurs nek ovel tuće najvažno

Disavo puti isi amen odobor but buća te ćera so mislinaja so nane amen vreme te proučina i Biblija. So šaj te pomožini amenđe? Čitinen Filipljanima 1:10, hem palo odova vaćeren ando akala pućiba:

• So mislineja, soj tano najvažno ko životi?

• So šaj te ćere te mothove so o kurs tano tuće but važno?

1. 1. Ako ki posuda prvo ćhiveja i pošik, o bara na ka resen

2. 2. Ama, ako prvo ćhiveja o bara, tegani ka ovel than te resel hem i pošik. Isto ađahar, ako o najvažna buća ćhiveja ko prvo than ko to životi, tegani na samo so ka ćere odola važna buća već ka ovel tut vreme hem aso avera buća

Amenđe valjani o Devel. Ked proučinaja i Biblija, amen šaj te penđara e Devle hem te služina olese. Čitinen Matej 5:3, hem palo odova vaćeren ando akava pućibe:

• Sose tano šukar amaro kurs te ovel amenđe najvažno?

5. Istrajin iako avera protivinena pe tuće

VIDEO: Nagradimo sose na odustajinđa (5:22)

• Sar reagujinđa olesi porodica hem olese amala ked phenđa lenđe so proučini i Biblija?

• Kola šukar buća doživinđa sebepi so na odustajinđa?

Čitinen 2. Timoteju 2:24, 25, hem palo odova vaćeren ando akala pućiba:

• So ti porodica hem te amala mislinena ando odova so proučineja i Biblija?

• Premalo akala stihija, sar valjani te reagujine ako nekase na sviđini pe so proučineja i Biblija? Sose valjani ađahar te reagujine?

6. Mukh tut upro Jehova

VIDEO: O Jehova pomožini amen te menjina amen (3:56)

• Kola promene valjanđa te ćerel o Džim?

• So posebno sviđinđa pe tuće ando oleso primer?

Čitinen Jevrejima 11:6, hem palo odova vaćeren ando akala pućiba:

• So ka ćerel o Jehova okolenđe kola dena sa pestar pošukar te penđaren le hem te šunen le?

• Premalo akava stiho, sar o Jehova osetini pe ked dikhela so deja sa tutar te proučine i Biblija?

SO SIKLJILJAM

Iako podijekh puti nane lokho te proučine i Biblija, odova ka pomožini tuće zauvek te ove bahtalo. Mukh tut ko e Jehovase vasta hem ov ka nagradini tut.

Te ponovina

• Sose tano tuće važno o ćaćipe andi Biblija?

• Sar šaj te đane „soj tano najvažno“ ko to životi?

• Sose valjani te molina amen e Jehovase te pomožini amen hem ponodri te proučina i Biblija?

RODE POBUTER

Dikh kola štar buća pomožinđe bute manušenđe šukar te koristinen po vreme.

„Sar šaj mudro te koristina amaro vreme?“ (Probudite se!, februar 2014)

Dikh sar o Jehova pomožinđa jekha romnjaće kaso rom na haljilo sose oj mangela te služini e Devlese.

O Jehova dela amen snaga te akhara amaro pharipe (5:05)

Dikh sar jekhe romese pomožinđa odova so olesi romni na odustajinđa ando odova te proučini i Biblija.

Mangljum te đanav da li tano odova ćaćipe (6:30)

Disavo puti o manuša phenena so e Jehovase svedokija rasturinena o porodice. Ama, da li tano odova ađahar?

„Da li e Jehovase svedokija rasturinena o porodice ja pomožinena len te oven ko jekhipe?“ (članko ko amaro sajt)

Sare amen valjani te ana odluke. But ando odola odluke ka utičinen ko amaro životi hem ko amaro amalipe e Jehovaja. Na primer, valjani te odlučina kaj ka živina, savi buti ka ćera ja da li ka khuva ko brako. Ked anaja šukar odluke, šaj te ova bahtale hem amen hem o Jehova.

1. Sar e Devleso Lafi šaj te pomožini tuće te ane šukar odluke?

Angleder so ka ane disavi odluka, šukar tano te moline tut e Jehovase hem ko oleso Lafi te dikhe so ov mislini. (Čitinen Poslovice 2:3-6.) Aso disave buća, ov ko po Lafi jasno phenela so valjani te ćere. Najšukar odluka koja tegani šaj te ane tani te ćere odova so o Devel phenela.

Ama, so ako ko oleso Lafi na pisini so valjani te ćere? O Jehova hem ponodri ka pomožini tut ađahar so ka „legari tut drumoja koleja valjani te đa“ (Isaija 48:17). Sar? Prekalo biblijake načelija. E biblijake načelija tane o osnovna ćaćipa kola pomožinena amen te haljova sar o Devel dikhela ko disave buća hem sar osetini pe. But putija, odova šaj te đana ked čitinaja disavo izveštaj andi Biblija. Ked đanaja sar o Jehova dikhela ko disave buća, tegani šaj te ana odluke kola ka ćeren le bahtalo.

2. Sostar valjani te razmisline angleder te ane disavi odluka?

Ki Biblija pisini: „O gođalo manuš šukar razmislini ando sa so ćerela“ (Poslovice 14:15). Odova značini so angleder te ana disavi odluka valjani te beša hem te razmislina soj tano najšukar te ćera. Đi razmislinaja odolestar, šukar bi ovela te puća amen: „Kola biblijake načelija šaj te koristinav ki akija situacija? Ako anava akija odluka, da li ka ovel man mir ko vilo? Sar odija odluka ka utičini upro avera? Soj tano najvažno, da li o Jehova ka ovel bahtalo sebepi odija odluka?“ (Ponovljeni zakoni 32:29).

O Jehova isi le pravo te phenel amenđe soj tano šukar, a soj tano lošno. Ked šukar penđaraja olese zakonija hem načelija hem ked ićeraja amen ko odova so sikljiljam, tegani amen oblikujinaja amari savest. Amari savest tani odija koja phenela amenđe da li ćerđam diso šukar ja lošno (Rimljanima 2:14, 15). Ked amari savest tani šukar oblikujimi, tegani šaj te ana šukar odluke.

SIKLJOV POBUTER

3. Mukh i Biblija te pomožini tut

VIDEO: Mukh e biblijake načelija te pomožinen tut (5:54)

• Soj tani i slobodno volja?

• Sose o Jehova dinđa amen slobodno volja?

• So o Jehova dinđa amen te šaj te ana šukar odluke?

Te dikha jekh načelo andi Biblija. Čitinen Efešanima 5:15, 16, hem palo odova vaćeren sar šaj „mudro te koristina amaro vreme“ te šaj. . .

• redovno te čitina i Biblija?

• te ova pošukar rom ja romni, dad ja daj, ćhavo ja ćhaj?

• redovno te đa ko sastankija?

4. Valjani te oblikujine ti savest te šaj te ane šukar odluke

VIDEO: „Nek ovel tut čisto savest“ (5:13)

• So ćerđa akija phen te šaj te oblikujini pi savest hem te anel odluka koja ka sviđini pe e Jehovase?

Sose na valjani te puća averen te anen odluka amenđe? Čitinen Jevrejima 5:14, hem palo odova vaćeren ando akala pućiba:

• Podijekh puti tano polokho te puća averen so te ćera. Ama, so valjani amen te sikljova?

• So šaj te pomožini amen te oblikujina amari savest hem te ana šukar odluke?

5. Poštujin averengi savest

Sare amen hijam različita hem odolese na anaja ista odluke. Sar šaj te mothova so poštujinaja averengi savest? Te dikha duj situacije:

1. situacija: Jekh amari phen koja but mangela te šminkini pe nakhela ki aver skupština kuri bute phenjenđe odova smetini.

Čitinen Rimljanima 15:1 hem 1. Korinćanima 10:23, 24, hem palo odova vaćeren ando akala pućiba:

• Palo odova so ka razmislini ando akala stihija, savi odluka šaj te anel odija phen? So ka ćere ako tuće ti savest mukhela diso te ćere, ama hijan nekasa kasi savest na mukhela le odova te ćerel?

2. situacija: Jekh amaro phral đanela so ki Biblija pisini so nane pogrešno te pijel pe alkohol, ama ov kokri odlučini hić te na pijel. Vićimo tano ko jekh druženje kuri dikhela so avera phralja pijena alkohol.

Čitinen Propovednik 7:16 hem Rimljanima 14:1, 10, hem palo odova vaćeren ando akala pućiba:

• Palo odova so ka razmislini ando akala stihija, savi odluka šaj te anel odova phral? So ka ćere ako dikheja so neko ćerela diso so tuće ti savest na mukhela?

So valjani te ćere te šaj te ane šukar odluke?

1. Molin e Jehova te pomožini tuće te đane so te ćere (Jakovljeva 1:5).

2. Rode ki Biblija hem ko amare publikacije o načelija kola šaj te pomožinen tut ki odija situacija. Isto ađahar, šaj te rode savet ando iskusna phralja ja phenja.

3. Razmislin sar odija odluka ka utičini ki tikli hem ki averengi savest.

SO SIKLJILJAM?

Te šaj te ana šukar odluke, amen valjani te razmislina so o Devel mislini odolestar hem sar odija odluka ka utičini upro avera.

Te ponovina

• Sar šaj te ane odluke kola ka radujinen e Jehova?

• Sar šaj te oblikujine ti savest?

• Sar šaj te mothove so poštujineja averengi savest?

RODE POBUTER

Sar šaj te ane odluke kola ka pomožinen tut te ove popaše e Devleja?

„Te odluke nek mothoven so poštujineja e Devle“ (Stražarska kula, 15. april 2011)

Sikljov pobuter ando odova sar o Jehova dela amen savetija.

O Jehova sikavi pe narodo (9:50)

Dikh so pomožinđa jekhe manušese te anel jekh but phari odluka.

O Jehova dela po lafi so ka del amen sa soj tano šukar (5:46)

Sar šaj te šuna e Jehova ked ko oleso Lafi na pisini so valjani te ćere?

„Da li uvek valjani tuće zapovest andi Biblija?“ (Stražarska kula, 1. decembar 2003)