Pućiba ando čitaocija

Da li o lafija ando Propovednik 5:8 odnosinena pe samo upro manušikane vladarija ja hem upro Jehova?

Ko akava zanimljivo stiho pisini: „Ako dikheja so neko ko isi le vlast ki ti phuv lošno ponašini pe premalo ćore, so ko sudo uskratini lenđe i pravda hem nepravedno postupini premalo lende, ma čudin tut odolese. Sose okole so ađahar postupini dikhela neko ko isi le pobari vlast olestar, a isi hem okola so isi len pana pobari vlast olendar“ (Prop. 5:8).

Ked razmislinaja ando akala lafija, šaj te mislina so akava stiho šukar opisujini e manušen kola isi len vlast. Ama, ako hari pošukar razmislinaja ando akava stiho, odothe isi jekh ćaćipe ando Jehova kova valjani te utešini amen hem te zorjaćeri amen.

O lafija ando Propovednik 5:8 odnosinena pe upro vladari kova lošno ponašini pe premalo ćorore manuša hem kova uskratini lenđe i pravda. O vladari na valjani te bistrel so ole dikhela neko ko isi le pobaro položaj ja pobaro autoritet olestar. Hem na samo odova, isi hem okola kola isi len pana pobaro položaj. Žalosno tano, so disave vladarija avdije šaj lena mito hem so o obična manuša ko razna načinija doživinena i nepravda.

Ama, kobor god te izgledini so na ka ovel pošukar, utešno tano te đana so o Jehova dikhela čak hem okolen kola isi len baro položaj. Amen šaj te molina e Devle te pomožini amen hem te forda amaro pharipe upro leste (Ps. 55:22; Fil. 4:6, 7). Amen đanaja so „o Jehova pe jaćhencar pažljivo dikhela i celo phuv te bi mothovi pi snaga hem te bi zaštitini okolen soj tane celone vileja verna olese“ (2. Let. 16:9).

Odolese, o lafija ando Propovednik 5:8, realno opisujinena i avdisutni situacija koja postojini maškaro manuša ki vlast. Uvek isi neko ko isi le pobari vlast. Ama, soj tano pana považno, akava stih podsetini amen so o Jehova tano najbaro, odnosno so isi le Najbaro autoritet. Ov akana vladini prekalo po Ćhavo, o Isus Hrist, kova tano kralj ando e Devleso Kraljevstvo. O Svemoćno Devel, kova sa dikhela, hem oleso Ćhavo tane potpuno pravedna ko sa.