Pana hari, prekalo po Kraljevstvo, o Jehova ka cidel sa amare problemija. Odolese, sare valjani te šunen odija šukar vest. O Isus manglja olese učenikija sarinenđe te vaćeren odolestar (Matej 28:19, 20). Sar e Jehovase svedokija mothovena so ićerena pe ki akija Isusesi zapovest?

1. Sar o lafija ando Matej 24:14 ispuninena pe avdije?

O Isus phenđa: „Akija šukar vest ando Kraljevstvo ka propovedini pe ko celo sveto“ (Matej 24:14). E Jehovase svedokija tane but bahtale so šaj te propovedinen ko celo sveto ko prekalo 1 000 ćhibja. Odija tani but bari buti hem odolese valjani te ova šukar organizujime. Ama, bizi pomoć ando Jehova, amen našti te propovedina.

2. Sar propovedinaja e manušenđe?

Amen propovedinaja kuri god isi manuša. Sar o hrišćanija ko prvo veko, hem amen propovedinaja „kotar ćher ko ćher“ (Dela apostolska 5:42). Ked propovedinaja ko asavko organizujimo način, svako berš šaj te resa đi o but manuša. Ama, sebepi so o manuša nane uvek ćhere, propovedinaja hem ko javna thana. Koristinaja svako prilika te vaćera averenđe ando Jehova hem kotar odova so ov mangela te ćerel.

3. Ko valjani te propovedini i šukar vest?

Sa o prava hrišćanija valjani te propovedinen i šukar vest. Odova zadatko tano but važno amenđe. Amen daja sa amendar te propovedina kobor god šaj, sose đanaja so i šukar vest šaj te spasini e manušengo životi. (Čitinen 1. Timoteju 4:16.) Na rodaja pare odolese, sose i Biblija phenela: „Besplatno dobinđen, besplatno hem den“ (Matej 10:7, 8). But manuša na mangena te šunen i šukar vest. Ama, amen hem ponodri propovedinaja sose đanaja so ađahar šunaja e Jehova hem ćeraja le bahtalo.

SIKLJOV POBUTER

4. Amen daja sa amendar te propovedina sa e manušenđe

VIDEO: Propovedini pe ki celo phuv (7:33)

• Sar upro tute utičini ked dikheja so e Jehovase svedokija dena sa pestar te propovedinen sa e manušenđe?

Čitinen Matej 22:39 hem Rimljanima 10:13-15, hem palo odova vaćeren ando akala pućiba:

• Sar odoleja so propovedinaja mothovaja so mangaja e manušen?

• So o Jehova mislini okolendar kola propovedinena i šukar vest? (Dikhen o 15. stih)

5. Amen hijam e Devlese saradnikija

But iskustvija mothovena so o Jehova legari amen đi o iskrena manuša. Na primer, ko Novi Zeland, jekh dive po podne, o phral Pol reslja jekha romnja đi propovedinđa kotar ćher ko ćher. O Pol phenela: „Odova sabaj, i romni molinđa pe e Devlese hem koristinđa oleso anav, Jehova. Oj molinđa e Devle neko te avel koro late. Trin satija palo odova, me aljum ko olako udar.“

Čitinen 1. Korinćanima 3:9, hem palo odova vaćeren ando akava pućibe:

• Sar akava hem avera iskustvija mothovena so o Jehova legari amen đi o iskrena manuša?

Čitinen Dela apostolska 1:8, hem palo odova vaćeren ando akava pućibe:

• Sose valjani amenđe e Jehovasi pomoć đi propovedinaja?

Da li đanđan?

Svako kurko, ko amaro sastanko ko radno dive, sikljovaja sar te propovedina. Ako hijan le ko jekh asavko sastanko, so mislineja odolestar so sikljola pe uduri?

6. Ićeraja amen ki Devlesi zapovest

Ko prvo veko, o protivnikija manglje te ćhinaven e Isusese učenikonen te propovedinen. Ama, on braninđe po pravo te propovedinen i šukar vest (Filipljanima 1:7). Avdije, e Jehovase svedokija ćerena isto odova.a

VIDEO: Koristinaja o zakon te branina i šukar vest (2:28)

Čitinen Dela apostolska 5:27-42, hem palo odova vaćeren ando akava pućibe:

• Sose na ka ćhinava te propovedina? (Dikhen o 29, 38, hem 39. stih)

SO SIKLJILJAM

O Isus phenđa pe učenikonenđe te propovedinen i šukar vest sa e manušenđe. O Jehova pomožini pe narodose te ćerel odova zadatko.

Te ponovina

• Sar propovedini pe i šukar vest ki celo phuv?

• Sar odoleja so propovedinaja mothovaja so mangaja e manušen?

• Da li šaj te ova bahtale ked propovedinaja? Sose mislineja ađahar?

RODE POBUTER

Dikh sar e Jehovase svedokija propovedinena e manušenđe ko bare dizja.

Propovedini pe ko javna thana ko Pariz (5:11)

So ćerđe e Jehovase svedokija te pomožinen okolenđe kola našlje kotar pi phuv?

Sar pomožinđam okolenđe kola našlje kotar pi phuv te penđaren e Devle? (5:59)

Šaj li te ove bahtalo ako to životi koristineja te propovedine?

Drago maje so birinđum asavko životi (6:29)

Sikljov pobuter ando disave pravna pobede sebepi kola tano amenđe polokho te propovedina.

„Amare phralja hem phenja ikljona anglo sud“ (Božje Kraljevstvo vlada!, 13. poglavlje)

O Isus phenđa so o hrišćanija valjani te krstinen pe. (Čitinen Matej 28:19, 20.) Ama, soj tano o krštenje? So jekh manuš valjani te ćerel te šaj te resel đi o krštenje?

1. Soj tano o krštenje?

O lafi „krštenje“ avela kotar i grčko ćhib hem značini „te khuve celo talo pani.“ Ked o Isus krstinđa pe ki reka Jordan, ov khuvđa celo ko pani hem palo odova „ikljilo ando pani“ (Marko 1:9, 10). Isto ađahar, hem o prava hrišćanija avdije krstinena pe ađahar so cela khuvena ko pani.

2. So jekh manuš mothovi ked krstini pe?

Ked jekh manuš krstini pe, ov mothovi so predajinđa po životi e Jehovase. Sar šaj neko te predajini po životi e Jehovase? Angleder te krstini pe, ov ki molitva vaćeri e Jehovase so mangela te služini lese zauvek. Ov dela po lafi so ka služini samo e Jehovase hem so ka ovel lese najvažno te ćerel odova so o Devel mangela. Ov tano spremno te odreknini pe kokri pestar, te ićeri pe ko odova so o Isus sikavđa hem te del sa pestar te ovel sar o Isus (Matej 16:24). Odolese so predajinđa po životi e Jehovase hem so krstinđa pe, ov šaj te ovel paše e Jehovaja hem okolencar kola služinena lese.

3. So valjani jekh manuš te ćerel angleder te krstini pe?

Angleder te krstine tut, važno tano te penđare e Jehova hem te ovel tut zorali vera. (Čitinen Jevrejima 11:6.) So pobuter sikljoveja ando Devel hem soj tani ti vera pobari, pana pobuter ka mange e Jehova. Tegani, ka mange te vaćere averenđe olestar hem te ićere tut ko odova so ov sikavi tut (2. Timoteju 4:2; 1. Jovanova 5:3). Ked deja sa tutar te živine premalo odova so sikljiljan, tegani ka mange te predajine to životi e Devlese hem te krstine tut (Kološanima 1:9, 10).a

SIKLJOV POBUTER

4. So šaj te sikljova ando Isuseso krštenje?

Čitinen Matej 3:13-17, hem dikhen disave detaljija ando Isuseso krštenje. Palo odova vaćeren ando akala pućiba:

• Da li o Isus krstinđa pe sar beba?

• Sar krstinđa pe? Da li samo hine lese ćhordo pani upro šero?

Palo odova so krstinđa pe, o Isus počminđa te ćerel jekh važno buti koja o Devel dinđa le. Čitinen Luka 3:21-23 hem Jovan 6:38, hem palo odova vaćeren ando akava pućibe:

• Palo odova so o Isus krstinđa pe, so hine lese najvažno ko životi?

5. Tu šaj te rese đi o krštenje

Ko početko, disave manuša mislinđe so niked na ka predajinen po životi e Devlese hem so niked na ka krstinen pe. Ama, ako hem ponodri sikljoveja ando Jehova hem trudineja tut te penđare le šukar, odova ka pomožini tut te ane odija važno odluka. Dikhen o VIDEO kova mothovi sar disave manuša reslje đi odova cilj.

VIDEO: Ov paše e Jehovaja (1:11)

Čitinen Jovan 17:3 hem Jakovljeva 1:5, hem palo odova vaćeren ando akava pućibe:

• So šaj te pomožini tuće te ave đi o krštenje?

1. 1. Amen predajinaja amen e Jehovase ađahar so ki molitva phenaja lese so mangaja zauvek te služina olese

2. 2. Ked krstinaja amen, amen mothovaja averenđe so predajinđam amen e Devlese

6. Ked krstinaja amen, tegani ovaja deo andi Jehovasi porodica

Ked krstinaja amen, tegani ovaja deo andi jekh bari porodica. Iako avaja ando različita phuvja hem kulture, sare amen verujinaja ko ista buća hem ićeraja amen ko odova so pisini ko Devleso Lafi. Čitinen Psalam 25:14 hem 1. Petrova 2:17, hem palo odova vaćeren ando akava pućibe:

• Premalo akala stihija, kola blagoslovija ka ovel amen ako krstinaja amen?

SO SIKLJILJAM

O Isus sikavđa so o prava hrišćanija valjani te krstinen pe. Ama, angleder odova, o manuš valjani te ovel le zorali vera ko Jehova, te ićeri pe ko oleso Lafi hem te predajini po životi olese.

Te ponovina

• Soj tano o krštenje hem sose tano važno?

• Savi tani razlika maškaro odova te predajina amaro životi e Jehovase hem te krstina amen?

• So valjani neko te ćerel angleder te predajini po životi e Jehovase hem te krstini pe?

RODE POBUTER

Sikljov so o krštenje značini, a so na značini.

„Soj tano o krštenje?“ (članko ko amaro sajt)

Dikh kola buća šaj te igaren tut đi o krštenje.

„O mangipe hem i zahvalnost igarena tut đi o krštenje“ (Stražarsko kula, mart 2020)

Čitin so jekhe manuše podstakninđa te anel i odluka te krstini pe.

„On manglje te uverinav man ko ćaćipe“ (Stražarska kula, 1. februar 2013)

Dikh sose tano o krštenje šukar cilj hem so valjani te ćere angleder te krstine tut.

„Da li valjani te krstinav man?“ (Mladi pitaju – praktični odgovori na njihova pitanja, 2. tom, 37. poglavlje)