• Da li ka mukhe diso te ćhinavi tut te đa palo Isus?
    Stražarsko kula (izdanje proučibase) – 2021 | maj

    • (3) O ISUS NA IĆERĐA PE KO BUT JEVREJSKA OBIČAJA

      But manuša na prihvatinđe e Isuse sebepi odova so o Isus na ićerđa pe ko disave olenge običaja. Sar šaj avdije odola ista buća te sprečinen amen te ova e Isusese učenikija? (Dikh o 13. odlomko)d

      13. Sose but manuša odbacinđe e Isuse?

      13 Ked o Isus hine ki phuv, e Jovanese učenikija hine zbunime odolese so e Isusese učenikija na postinđe. O Isus phenđa lenđe so nane len razlog te postinen đi tano ov pana đivdo (Mat. 9:14-17). O fariseja hem avera protivnikija osudinđe e Isuse odolese so ov na ićerđa pe ko olenge običaja hem tradicije. On holjanđe ked ov saćarđa e nabormen ko Sabat (Mar. 3:1-6; Jov. 9:16). Ki jekh strana, on hine ponosna ko odova te phenen so ićerena o Sabat, a ki aver strana na hine lenđe problemi te dozvolinen e manušenđe te biknen ko hram. On hine but holjame ked o Isus osudinđa len sebepi odova (Mat. 21:12, 13, 15). Isto ađahar, ked o Isus propovedinđa disavenđe ki sinagoga, ko Nazaret, on hine but holjame odolese so o Isus koristinđa disave primerija andi e Izraelcengi istorija kola mothovđe soj tane sebična hem so nane len vera (Luka 4:16, 25-30). But manuša odbacinđe e Isuse odolese so ov na ćerđa o buća kola on manglje (Mat. 11:16-19).

      14. Sose o Isus osudinđa e manušenge običaja?

      14 So i Biblija phenela? O Jehova prekalo poklo proroko o Isaija phenđa: „Akava narodo mothovi maje čast pe lafencar hem slavini man pe mujeja, ama olengo vilo tano dur mandar. Darana mandar samo sebepi o manušikane zapovestija ando kola tane sikavde“ (Is. 29:13). O Isus hine u pravu ked osudinđa o običaja aso kola i Biblija phenela soj tane pogrešna. Okola kola sikavđe so o pravilija hem o tradicije tane považna nego i Biblija, odbacinđe e Jehova hem okole kas ov bićhalđa, e Mesija.

  • Da li ka mukhe diso te ćhinavi tut te đa palo Isus?
    Stražarsko kula (izdanje proučibase) – 2021 | maj

    • (4) O ISUS NA MANGLJA TE MENJINI I VLAST

      But manuša na prihvatinđe e Isuse sebepi odova so o Isus na mešinđa pe ki politika. Sar šaj avdije odola ista buća te sprečinen amen te ova e Isusese učenikija? (Dikh o 17. odlomko)e

      17. So but manuša ko e Isuseso vreme očekujinđe te ćerel o Mesija?

      17 Disave manuša ko e Isuseso vreme manglje ov odmah te menjini i vlast. On očekujinđe o Mesija te oslobodini len andi rimsko vlast. Ama, ked manglje te ćhiven e Isuse te ovel kralj, ov odbinđa (Jov. 6:14, 15). O sveštenikija hem avera darandilje so o Isus ka menjini i vlast. Odolese so o Rimljanja bi tegani holjanena hem bi lena i vlast ando sveštenikija koja dinđe len. Bute manušen zaniminđa i politika hem odolese odbacinđe e Isuse.

      18. Upro kola proročanstvija ando Mesija but manuša na obratinđe pažnja?

      18 So i Biblija phenela? Iako but proročanstvija phenena so o Mesija ko krajo ka ovel ratniko kova pobedini, avera proročanstvija mothovđe so ov najangleder valjani te merel aso amare grehija (Is. 53:9, 12). Tegani, sose o Jevreja hine len asavke pogrešna očekivanja? Odolese so na obratinđe pažnja ko proročanstvija kola na obećinđe lenđe so olenge problemija ka oven rešime odmah (Jov. 6:26, 27).