Pučiba ando čitaocija

Ko hine i judejsko hramsko straža? Kola hine olenge dužnostija?

Disave Levitija kola na hine sveštenikija hine len avera odgovornostija. Odova so on čerdže podsetini amen ki buti koja avdije čerela i policija. O hrameso zapovedniko phendža lendže so te čeren. O jevrejsko pisco, o Filon, pisindža odolestar kola hine olenge dužnostija: „Disave kotar odola [Levitija] arakhlje o udara kuri o narodo khuvela hine ko hram. A avera terdilje anglo svetilište. On pazindže te na khuvel andre niko ko nane le pravo te khuvel, bilo namerno ja slučajno. Disave stražarindže okolo hram adžahar so menindže pe ko smene.“

O Sinedrion šaj hine te rodel olendar pomoć. Samo olendže i rimsko vlast dozvolindža te ovel len oružje.

O teolog, Joahim Jeremijas, vačeri so ked o stražarija astardže e Isuse, ov pučlja len sose na astardže le ked sikavdža ko hram. O Isus na bi pučela len odova ako akala stražarija na bi ovena pripadnikija kotar i hramsko straža (Mat. 26:55). Isto odova teolog mislini, so okola so angleder hine bičhalde te astaren e Isuse, hine o hramska stražarija (Jov. 7:32, 45, 46). Kasnije, o Sinedrion bičhaldža e hramsko zapovedniko hem disaven andi hramsko straža te anen e apostolen koro lende. Akija hramsko straža verovatno hine isto odija straža koja fordindža e Pavle ando hram (Dela 4:1-3; 5:17-27; 21:27-30).