So značini te ove neutralno?

O Isus phenđa so olese učenikija na valjani te oven „deo ando akava sveto“ (Jovan 15:19). Odova značini so on na mešinena pe ki politika hem na đana ko mariba. Ama, odova nane uvek lokho. O manuša šaj te maren amenđe muj sose hijam averćhane olendar. Tegani, sar šaj te aćhova neutralna hem verna amare Devlese, e Jehovase?

1. Sar o prava hrišćanija dikhena ko manušenge vlastija?

O prava hrišćanija poštujinena i vlast. Amen ćeraja odova so o Isus phenđa hem „daja e carese e careso.“ Odova značini so amen šunaja o zakonija andi phuv ki koja živinaja, sar soj tano te platini pe o porez (Marko 12:17). I Biblija sikavi amen so e manušenge vlastija postojinena samo sebepi so o Jehova mukhela len te vladinen (Rimljanima 13:1). Kotar odova haljovaja so e manušenge vlastija nane len pobari vlast ando Devel. Amen đanaja so jedino o Jehova prekalo poklo Kraljevstvo ka cidel sa amare problemija.

2. Sar šaj te mothova so hijam neutralna?

Sar o Isus, ni amen na mešinaja amen ki politika. Ked o manuša dikhlje o čudo kova o Isus ćerđa, on manglje te ćhiven le te ovel olengo kralj. Ama, o Isus odova na manglja (Jovan 6:15). Sose? Ov phenđa lenđe: „Mo Kraljevstvo nane kotar akava sveto“ (Jovan 18:36). Sar e Isusese učenikija, amen ko but načinija mothovaja so hijam neutralna. Na primer, na đaja ko mariba. (Čitinen Mihej 4:3.) Iako poštujinaja o državna simbolija, sar soj tani i zastava, amen na pozdravinaja la (1. Jovanova 5:21). Isto ađahar, amen na khuvaja ki nijekh političko stranka niti glasinaja aso bilo kova političko kandidati. Ko akala hem ko avera načinija, amen mothovaja so hijam verna e Devlese hem so podržinaja oleso Kraljevstvo.

SIKLJOV POBUTER

3. O prava hrišćanija tane neutralna

O Isus hem olese učenikija aćhavđe amenđe but šukar primer. Čitinen Rimljanima 13:1, 5-7 hem 1. Petrova 2:13, 14. Palo odova, dikhen o VIDEO hem vaćeren ando akala pućiba:

VIDEO: O prava hrišćanija tane neutralna – 1. deo (4:28)

• Sose valjani te poštujina o vlastija?

• Sar šaj te mothova so hijam podložna olenđe?

Ked tano maribe, disave phuvja phenena soj tane neutralna. Ama, on šaj bićhalena pare ja oružje ko phuvja kola tane ko maribe. Tegani, so ćaće značini te ove neutralno? Čitinen Jovan 17:16. Palo odova, dikhen o VIDEO hem vaćeren ando akava pućibe:

VIDEO: O prava hrišćanija tane neutralna – 2. deo (3:11)

• So značini te ove neutralno?

Ama, so ako o vlastija rodena tutar te ćere diso soj tano protiv e Devleso zakon? Čitinen Dela apostolska 5:28, 29. Palo odova, dikhen o VIDEO hem vaćeren ando akala pućiba:

VIDEO: O prava hrišćanija tane neutralna – 3. deo (1:18)

• Ked o vlastija rodena amendar te ćera diso soj tano protiv e Devleso zakon, kas valjani te šuna?

• So mislineja, ked na valjani te šuna o vlastija?

4. Ov neutralno ko odova sostar razmislineja hem so ćereja

Čitinen 1. Jovanova 5:21. Palo odova, dikhen o VIDEO hem vaćeren ando akala pućiba:

VIDEO: Sose e pravo hrišćanenđe valjani hrabrost – Te oven neutralna (2:49)

• Sose o Ajenge na manglja te khuvel ki disavi političko stranka hem te pozdravini i zastava?

• So mislineja, da li šukar ćerđa?

Ked pana šaj te dićhol da li hijam neutralna? Dikhen o VIDEO, hem palo odova vaćeren ando akala pućiba:

VIDEO: So sikljiljam andi Stražarsko kula – Aćhov neutralno ko akava sveto (5:16)

• Sar šaj te aćhova neutralna ked dikhaja disave sportska takmičenja?

• Sar šaj te aćhova neutralna ked o odluke kola o političarija anena utičinena upro amende?

• Sar o vestija hem amare amala šaj te utičinen ki amari neutralnost?

SO SIKLJILJAM

Valjani te da sa amendar te aćhova neutralna ko odova sostar razmislinaja, so vaćeraja hem so ćeraja.

Te ponovina

• Sar valjani te dikha ko manušenge vlastija?

• Sar šaj te aćhova neutralna?

• Ked šaj te dićhol da li hijam neutralna?

RODE POBUTER

Ko so valjani te ove spremno ako mangeja te aćhove neutralno?

O Jehova niked na mukhlja amen (3:14)

So šaj o porodice te ćeren te pomožinen jekh jekhese te aćhon neutralna?

Aćhov neutralno (4:25)

Disave manuša phenena soj tani najbari čast te branina amari phuv. Da li tano odova ćaće ađahar?

„E Devleja sa šaj“ (5:19)

Dikh savi buti šaj te ćera hem sar šaj amare odluke te mothoven so na hijam deo ando akava sveto.

„Svako ka akhari poklo pharipe“ (Stražarska kula, 15. mart 2006)

Jekh dive sare amen ka doživina neko te protivini pe amenđe hem čak ka ova progonime. Da li valjani te dara odolestar?

1. Sar đanaja so ka ova progonime?

Ko Devleso Lafi pisini: „Sare kola mangena te živinen verno e Devlese ko jekhipe e Hristeja e Isuseja, ka oven progonime“ (2. Timoteju 3:12). O Isus hine progonimo sose na hine deo kotar Bengeso sveto. Isto ađahar, hem amen na hijam deo ando akava sveto. Odolese, na hijam iznenadime ked o vlastija hem razna religije protivinena pe amenđe (Jovan 15:18, 19).

2. Sar šaj već akana te pripremina amen aso progonstvo?

Već akana valjani te zorjaćera amaro poverenje ko Jehova. Odova šaj te ćera ađahar so svako dive ka molina amen olese, ka čitina oleso Lafi hem redovno ka đa ko amare sastankija. Sa odova ka del amen snaga te aćhova verna ked hijam progonime, čak ked amari porodica protivini pe amenđe. O apostol Pavle, kova but putija hine progonimo, pisinđa: „O Jehova tano mo pomoćniko, na ka darav“ (Jevrejima 13:6).

Ked redovno propovedinaja, odova pomožini amen te ova hrabra. Ki služba šaj te sikljova te oslonina amen upro Jehova hem te na dara ando manuša (Poslovice 29:25). Ako već akana hrabro propovedinaja, ka ova spremna te propovedina čak ked o vlastija ka zabraninen amenđe te ćera odova (1. Solunjanima 2:2).

3. Sose tano šukar te aćhova verna ked hijam progonime?

Niko na mangela te ovel progonimo. Ama, ako istrajinaja amari vera ka ovel pana pozorali hem ka ova pana popaše e Jehovaja sose osetinđam sar o Jehova pomožinđa amen ked više na hine amen snaga. (Čitinen Jakovljeva 1:2-4.) E Jehova dukhala ked dikhela so patinaja, ama bahtalo tano ked dikhela so hijam istrajna. Ko Devleso Lafi pisini: „Ako patinena sebepi so ćerena odova soj tano šukar hem ako ko sa odova hijen istrajna, tegani o Devel ka ovel zadovoljno“ (1. Petrova 2:20). Ako aćhovaja verna e Jehovase, ov ka del amen večno te živina ko nevo sveto. Tegani, sare ka služina olese hem niko na ka protivini pe amenđe (Matej 24:13).

SIKLJOV POBUTER

4. Šaj te aćhove verno ked ti porodica protivini pe tuće

O Isus šukar đanđa so amari odluka te služina e Jehovase na ka sviđini pe sarinenđe ki amari porodica. Čitinen Matej 10:34-36, hem palo odova vaćeren ando akava pućibe:

• Sar šaj disave te reagujinen ked neko andi porodica mangela te služini e Jehovase?

Dikhen o VIDEO, kova mothovi so disave Jehovase svedokija nakhlje hem palo odova vaćeren ando akava pućibe.

VIDEO: O Jehova niked na mukhlja amen (5:13)

• So šaj te ćere ako neko kotar ti porodica ja to amal pherela ti godi te na služine e Jehovase?

Čitinen Psalam 27:10 hem Marko 10:29, 30. Palo odova so ka čitinen akala stihija, vaćeren ando akava pućibe:

• Sar šaj akala lafija te pomožinen tut ked neko andi ti porodica ja te amala protivinena pe tuće?

5. Služin e Jehovase iako hijan progonimo

VIDEO: Hrabra iako tane progonime (6:27)

• Sar akala iskustvija zorjaćerena tut?

Čitinen Dela apostolska 5:27-29 hem Jevrejima 10:24, 25. Palo odova so ka čitinen akala stihija, vaćeren ando akava pućibe:

• Sose tano važno te služina e Jehovase čak ked disave amare aktivnostija tane zabranime?

6. O Jehova ka pomožini tut te aćhove lese verno

VIDEO: O Jehova ka zorjaćeri man (3:40)

• So pomožinđa e phralenđe hem e phenjenđe te aćhon verna?

Čitinen Rimljanima 8:35, 37-39 hem Filipljanima 4:13. Palo odova so ka čitinen akala stihija, vaćeren ando akava pućibe:

• Sar akala stihija uverinena tut so šaj te aćhove verno ko sa o pharipa?

Čitinen Matej 5:10-12, hem palo odova vaćeren ando akava pućibe:

• Sose šaj te ove bahtalo iako hijan progonimo?

SO SIKLJILJAM

O Jehova na bistrela odova so daja sa amendar verno te služina lese čak iako hijam progonime. Ked o Jehova pomožini amen, sa ka nakha!

Te ponovina

• Sar đanaja so ka ova progonime?

• So šaj već avdije te ćera te ova spremna aso progonstvo?

• Sar šaj hrabro te služina e Jehovase iako isi amen pharipa?

RODE POBUTER

So pomožinđa jekhe terne phralese te aćhol verno ked hine ko phanlipe sebepi pi neutralnost?

Aćhov verno ked hijan progonimo (2:34)

Dikh sar jekh bračno par verno služinđa e Jehovase iako beršencar hine progonime.

Služin e Jehovase iako te okolnostija menjinena pe (7:11)

So šaj te pomožini tut te ove hrabro ked hijan progonimo?

„Akana pripremin tut aso progonstvo“ (Stražarsko kula, jul 2019)

Sar valjani te dikha ked amari porodica protivini pe amenđe, sar šaj te arakha mir hem te aćhova verna e Jehovase?

„O ćaćipe na anela mir nego mač“ (Stražarska kula, oktobar 2017)