Ko celo sveto, o manuša averćhane dikhena ko alkohol. Disave uživinena podijekh puti te ćeden pe pekle amalencar hem te pijen diso. Avera hić na mangena te pijen. A disave avera manuša odobor pijena so maćona. Ama, so i Biblija vaćeri ando alkohol?

1. Da li tano pogrešno te pija alkohol?

I Biblija na vaćeri soj tano lošno te pija alkohol. Maškaro but buća kola o Devel dinđa amen tano hem „o vino kova ćerela e manuše te ovel bahtalo“ (Psalam 104:14, 15). Disave verna murša hem đuvlja kolendar i Biblija vaćeri, podijekh puti pilje alkohol (1. Timoteju 5:23).

2. So i Biblija vaćeri ando alkohol?

O Jehova na mangela ked neko but pijela hem maćola (Galatima 5:21). Ko oleso Lafi pisini: „Ma ov okolencar so but pijena vino“ (Poslovice 23:20). Odolese, ako odlučinaja te pija ked hijam negde vićime ja ked hijam kokri, valjani te pazina kobor pijaja. Na isminaja te pija odobor te rumina amaro sastipe, te na đana so ćeraja hem so vaćeraja. Ako našti te kontrolišina kobor pijaja, tegani hić na valjani te pija.

3. Sar šaj te mothova so poštujinaja averenge odluke?

Svako valjani kokri pese te odlučini da li ka pijel alkohol ja na. Amen na valjani te kritikujina okolen so odlučinđe podijekh puti te pijen hem na valjani zorjeja te ćhiva nekas te pijel ako na mangela (Rimljanima 14:10). Čak, šaj na ka pija alkohol ako odova nekase smetini. (Čitinen Rimljanima 14:21.) Amen na mangaja „te dikha samo amenđe te ovel šukar nego hem averenđe te ovel šukar.“ (Čitinen 1. Korinćanima 10:23, 24.)

SIKLJOV POBUTER

4. Da li ka pije?

Sar o Isus dikhlja ko alkohol? O odgovor ka arakha ko prvo čudo kova ćerđa. Čitinen Jovan 2:1-11, hem palo odova vaćeren ando akala pućiba:

• So akava čudo mothovi, sar o Isus dikhlja ko alkohol hem ko manuša kola pilje?

• O Isus na phenđa soj tano lošno te pija alkohol. Tegani, sar amen valjani te dikha upro manuša kola podijekh puti pijena alkohol?

Odova so amenđe nane zabranimo podijekh puti te pija alkohol na značini soj tano odova uvek mudro. Čitinen Poslovice 22:3, hem palo odova vaćeren sar akala buća soj tane dinde tele šaj te pomožinen amen te odlučina da li te pija ja na ako. . .

• valjani te vozine.

• hijan khamni.

• o doktori phenela tuće te na pije alkohol.

• na đaneja ked tano dosta.

• o zakon na mukhela te pijel pe alkohol.

• tuvaja tano neko ko na pijela alkohol sose angleder but pilja.

Ama so ako ćereja bijav ja disavo aver skup? Da li valjani te služine alkohol? Dikhen o VIDEO kova šaj te pomožini tut te đane savi odluka te ane.

VIDEO: Da li valjani te služinav alkohol? (2:41)

Čitinen Rimljanima 13:13 hem 1. Korinćanima 10:31, 32. Palo odova so ka čitinen svako stih, vaćeren ando akava pućibe:

• Sar šaj akava načelo te pomožini tut te ane odluka koja ka ćerel e Jehova bahtalo?

5. Kobor ka pije?

Ako odlučineja podijekh puti te pije alkohol, ma bistri so iako o Jehova na phenela soj tano lošno te pija alkohol, ov na mangela ked neko but pijela. Sose? Čitinen Osija 4:11, 18, hem palo odova vaćeren ando akava pućibe:

• So šaj te ovel ked neko but pijela?

So šaj te pomožini amen te na pija but? Amen valjani te ova skromna ja te đana kaj tani amari granica. Čitinen Poslovice 11:2, hem palo odova vaćeren ando akava pućibe:

• Sose tano šukar ked pijaja te ćhiva amenđe granica?

6. So šaj te pomožini nekase te ćhinavi te pijel?

VIDEO: „Mo životi alo maje đi o nakh“ (6:32)

• So ćerđa o Dmitrij ked pilja?

• Da li o Dmitrij kotar jekhvar ćhinavđa te pijel?

• So pomožinđa lese te ćhinavi te pijel?

Čitinen 1. Korinćanima 6:10, 11, hem palo odova vaćeren ando akala pućiba:

• Kobor tano ozbiljno ako neko maćola?

• So mothovi so neko ko but pijela šaj te menjini pe?

Čitinen Matej 5:30, hem palo odova vaćeren ando akava pućibe:

• Ked o Isus phenđa so valjani te ćhina amaro vas, ov manglja te phenel so valjani te aćhava disave buća ako mangaja te ugodina e Jehovase. So šaj te ćere ako mangeja te ćhinave te pije?a

Čitinen 1. Korinćanima 15:33, hem palo odova vaćeren ando akava pućibe:

• Sar šaj te amala te utičinen ko odova kobor pijeja?

SO SIKLJILJAM

O Jehova dinđa amen o alkohol te šaj te uživina ko životi. Ama, ov na mangela ked neko but pijela hem maćola.

Te ponovina

• So i Biblija vaćeri ando alkohol?

• Sose tano lošno ked neko but pijela?

• Sar šaj te mothova so poštujinaja averenge odluke?

RODE POBUTER

Ked vaćeri pe ando alkohol, sar šaj o terne te anen šukar odluke?

Razmislin angleder te pije (2:31)

So šaj te pomožini tuće ako but pijeja?

„Sar šaj te kontrolišinav kobor pijava?“ (Stražarska kula, 1. januar 2010)

Da li o hrišćanija valjani te nazdravinen?

„Pućiba ando čitaocija“ (Stražarska kula, 15. februar 2007)

Čitin o iskustvo „But piljum“ hem dikh sar jekh manuš ćhinavđa te pijel.

„I Biblija pomožini e manušenđe te menjinen po životi“ (Stražarska kula, 1. maj 2012)

Sare amen đanaja sar mangaja te urava amen hem sar mangaja te izgledina. Ked ićeraja amen ko biblijake načelija, ka urava amen sar so amen mangaja hem ka ćera e Jehova te ovel bahtalo. Te dikha nekobor ando odola načelija.

1. Ando kola načelija valjani te razmislina ked birinaja so ka urava hem sar ka izgledina?

Amen valjani te urava amen pristojno, te ova skromna, razborita hem te ova čista te šaj odoleja te mothova averenđe so služinaja e Devlese (1. Timoteju 2:9, 10). Akana ka dikha štar načelija kola ka pomožinen amen ko odova: (1) Amen valjani te urava amen pristojno. Sar so dikhljan ko amare sastankija, e Jehovase sluge na uravena pe sa isto. Ama, odova sar uravena pe hem sar izgledinena mothovi so poštujinena e Devle. (2) Amaro urajbe valjani te mothovi so hijam skromna. Odova značini so na ka urava amen izazovno ja ađahar so sare ka dikhen ano amende. (3) Amen mothovaja so hijam razborita ked na pratinaja svako moda koja ikljola. (4) Amaro izgled valjani te mothovi averenđe so služinaja e Devlese (1. Korinćanima 10:31).

2. Sar šaj amaro urajbe te utičini upro amare phralja hem phenja?

Iako isi amen sloboda te urava amen sar mangaja, ipak valjani te razmislina sar amaro urajbe ka utičini upro avera. Amen na mangaja nekase te ovel neprijatno sebepi amaro urajbe, već mangaja te da sa amendar „te ćera odova soj tano šukar averenđe te šaj te zorjaćera len.“ (Čitinen Rimljanima 15:1, 2.)

3. Sar šaj amaro urajbe te pomožini averenđe te mangen te sikljon ando Devel?

Amen uvek mangaja te urava amen pristojno. Ama, posebno pazinaja so ka urava ked valjani te đa ko sastankija ja ki služba. Na mangaja amaro urajbe te cidel e manušen andi šukar vest. Sebepi amaro urajbe o manuša šaj ka mangen te šunen ando amaro Devel hem ađahar ka „ukrasina o sikljoviba ando amaro Spasitelj, o Devel“ (Titu 2:10).

SIKLJOV POBUTER

4. Amaro urajbe mothovi so poštujinaja e Jehova

Kova tano najvažno razlog sose valjani te pazina ko amaro urajbe? Čitinen Psalam 47:2, hem palo odova vaćeren ando akala pućiba:

• Sar odova so predstavinaja e Jehova valjani te utičini ko amaro urajbe?

• Da li tano ćaće važno sar uravaja amen ked đaja ko sastankija ja ki služba? Sose mislineja ađahar?

5. Sar šaj te đana da li tano amaro urajbe šukar?

Dikhen o VIDEO.

VIDEO: „Sa ćeren e Devlese ki slava“ (10:18)

Nane važno da li amare šeja tane skupa ja jeftina. Važno tano te oven čista hem te odgovorinen asi odija prilika. Čitinen 1. Korinćanima 10:24 hem 1. Timoteju 2:9, 10, hem palo odova vaćeren sose nane šukar amaro urajbe te ovel. . .

• neuredno hem but opušteno?

• tesno, phravdo ja izazovno?

Iako na ićeraja amen ko Mojsijeso zakon, ov šaj te pomožini amenđe te haljova sar o Jehova razmislini. Čitinen Ponovljeni zakoni 22:5, hem palo odova vaćeren ando akava pućibe:

• Sose na valjani i đuvli te uravi pe sar murš, niti o murš te uravi pe sar đuvli?

Čitinen 1. Korinćanima 10:32, 33 hem 1. Jovanova 2:15, 16, hem palo odova vaćeren ando akala pućiba:

• Sose valjani te pazina amaro urajbe te na spotaknini nekas ki skupština ja nekas odothe kaj bešaja?

• Sar uravena pe o manuša odothe kaj tu bešeja?

• So mislineja, da li isi disavo urajbe kova nane e hrišćanenđe? Sose mislineja ađahar?

SO SIKLJILJAM

Ked pazinaja sar uravaja amen hem sar izgledinaja mothovaja so poštujinaja e Jehova hem averen.

Te ponovina

• Sose tano e Jehovase važno sar uravaja amen hem sar izgledinaja?

• Ando kola načelija valjani te razmislina ked birinaja sar ka urava amen hem sar ka izgledina?

• Sar amaro urajbe šaj te utičini ko odova sar avera ka dikhen ko Jehova?

RODE POBUTER

Odova sar uravaja amen mothovi save manuša hijam. So to urajbe vaćeri tutar?

„Savo tano mo urajbe?“ (članko ko amaro sajt)

Dikh sose tano važno te razmisline angleder te ćere tuće tetovaža.

„So e Devleso Lafi vaćeri ando tetoviranje?“ (članko ko amaro sajt)

Kola pana načelija šaj te pomožinen amen ked razmislinaja ando odova sar ka urava amen?

„Da li amare urajbaja slavinaja e Jehova?“ (Stražarska kula, septembar 2016)

So pomožinđa jekha romnjaće te poštujini averen iako uravđe pe averćhane olatar?

„Hine maje pharo te menjinav mo stav ando urajbe“ (Probudite se!, 22. decembar 2003)